Romanus 14 - BIBLIA - traduson antigu in Krioulo

Ka bu julga bu ermon

¹ Bo risibi kil ki fraku na fe; ka bo diskuti ku el na sintidu ki ten.

² Utru ta oja kuma tudu kusa pudi kumedu. Utru ki fraku na fe ta kume son ortalisa.

³ Kil ku na kume tudu kusa, ka i njuti kil ku ka na kume. Kil ku na kume son ortalisa pa ka i julga kil ku na kume tudu kusa, pabia Deus setal.

⁴ Abo i kin ku na julga kriadu di utru? Pa si propi patron ki sta sikidu o ki kai. Ma i na firma, pabia Siñor ten puder pa firmantal.

⁵ Un ta diferensia dias, ma utru ta oja kuma tudu dia i mesmu. Kada kin dibi di ten sertesa na si kabesa propi.

⁶ Kil ku fasi kasu di dia, i fasil pa Siñor. Kil ku kume tudu kusa, i ta kume na fiansa di Siñor, pabia i ta fala Deus obrigadu. Kil ku ka na kume utru kusa, i pa Siñor ki ka na kumel; i ta fala tambi Deus obrigadu.

⁷ Nin un di nos ka na vivi son pa si kabesa, nin i ka na muri pa si kabesa.

⁸ Si no vivi, no vivi pa Siñor. Si no muri tambi, no muri pa Siñor. De manera, si no vivi o no muri, no sedu di Siñor.

⁹ I pabia des ku Kristu muri, i torna bibu, pa i sedu Siñor di mortus ku bibus.

¹⁰ Abo, pa ke ku bu na julga bu ermon? O abo tambi, pa ke ku bu na njuti bu ermon? Anos tudu no ten ku parsi dianti di tribunal di Deus.

¹¹ I sta skritu: “Siñor jurmenta pa si vida kuma tudu juju ten ku dobra si dianti; tudu jinti ten ku konta klaru kuma el i Deus.”

¹² Asin, kada un di nos na da konta di si kabesa dianti di Deus.

Liberdadi ku amor

¹³ Ka no julga mas ŋutru. I minjor bo pui sintidu pa ka pui kusa ku na mbaransa bo ermon, pa pul pa i kai na pekadu.

¹⁴ Ami N sibi ku tudu sertesa, na ña union ku Siñor Jesus, kuma i ka ten kumida ku Deus misti pa ka no kume, ma, si un algin kuda kuma un kusa ka dibi di kumedu, nta pa ki algin i ka puru.

¹⁵ Si bu na pui bu ermon tristi pabia di kusa di kume, nta bu ka na yanda ja suma ku amor manda. Abo, pabia di kumida ka bu pirdinti bu ermon ku Kristu muri pa el.

¹⁶ Ka bo disa jinti fala mal di kusa ku bo oja kuma i bon.

¹⁷ Renu di Deus i ka kumida, nin bibida, ma i pa tene vida justu ku pas ku alegria ku Spiritu Santu ta da.

¹⁸ Kin ku na sirbi Kristu asin, Deus ta kontenti ku el; jinti ta setal.

¹⁹ Asin, no ba ta sigi kusa ku ta tisi pas, ku ta judanu pa no edifika ŋutru.

²⁰ Ka bu dana tarbaju di Deus pabia di kumida. Bardadi, tudu kumida pudi kumedu, ma i mal pa kume un kusa ku na pui utru mbaransa.

²¹ I minjor ka bu kume karni, nin bibi biñu, nin fasi utru kusa ku na pui bu ermon pa i kai na pekadu, o pa i fraksi.

²² Fe ku bu ten dentru di bo, guardal entri bo ku Deus. Sortiadu i kil ku ka ta sinti kulpadu si i na fasi un kusa ki oja kuma i dibi di fasi,

²³ ma kil ku ten duvida, si i kume, i sta kondenadu, pabia i ka na kume ku fe. Tudu ku ka bin di fe i pekadu.