Romanus 13 - BIBLIA - traduson antigu in Krioulo

Obdisi otridadi

¹ Kada kin dibi di obdisi otridadi ku sta riba del, pabia i ka ten otridadi ku ka bin di Deus. Otridadi ku ten, Deus ku pul.

² E ku manda kin ku sta kontra otridadi i sta kontra kil ku Deus manda. Kilis ku nega obdisi e na tisi kondenason riba di se kabesa.

³ Kilis ku ta fasi ben e ka pirsisa di ten medu di polisia, ma son kilis ku ta fasi mal. Bu misti fika libri di medu di otridadi? Ba ta fasi ben; i ta ngabau.

⁴ El i sta na sirvis di Deus pa ben di bo. Ma si bu fasi mal, bu ten ku medi, pabia i ka ta tisi ki spada amonton. I sta na sirvis di Deus; i vingadur pa kastiga kil ku fasi mal.

⁵ E ku manda bo dibi di obdisil. I ka son pabia di kastigu, ma tambi i pabia di bo konsiensia.

⁶ Bo dibi di paga mpustu, pabia e sta na sirvis di Deus pa e pudi fasi e tarbaju propi.

⁷ Asin, bo da kada kin kil ku bo dibi di da. Bo paga kontribuison pa kil ku bo dibi di paga. Bo paga mpustu pa kil ku bo dibi di paga. Bo da rispitu ku onra pa kilis ku ten diritu di risibil.

Manera di trata utru jinti

⁸ Ka bo dibi ningin nada, son amor pa ŋutru, pabia kil ku ama si kumpañer, i kumpri lei.

⁹ Na bardadi, “Ka bu dita ku kin ku bu ka kasa ku el,” “Ka bu mata,” “Ka bu furta,” “Ka bu lantanda falsu tustumuñu,” “Ka bu kubisa,” ku kualker utru mandamentu ku ten, i sta juntu ne un palabra: “Ama bu kumpañer suma bo propi.”

¹⁰ Kil ku ten amor i ka ta fasi si kumpañer mal. E ku manda, kil ku ten amor i ta kumpri tudu lei.

¹¹ Bo fasi asin, suma ku bo sibi tempu ku no sta nel, kuma ora ciga pa no korda di sonu, pabia no libertason sta mas pertu gosi di ki oca no seta Kristu.

¹² Noti pasa ja; dia ciga. No dispi tudu kusas ku ta fasidu na sukuru; no bisti armadura di lus.

¹³ No yanda onestu, suma kin ku na yanda di dia. Ka no yanda na wukesa, na camidera, na vida susu, na puku borgoña, na jusia, nin na nveẑa,

¹⁴ ma bo kubri ku armadura di Siñor Jesus Kristu. Ka bo alimenta mau diseẑu di bo naturesa.