Romanus 12 - BIBLIA - traduson antigu in Krioulo

Ntrega Deus bu vida

¹ Asin ermons, pabia di garandi amor di Deus, N na pidi bos pa bo ntrega bo kurpu pa i sedu suma un sakrifisiu bibu, dedikadu son pa el, pa kontental. Es ki adorason ku bo dibi di fasi.

² Ka bo fasi suma ku mundu na fasi, ma bo disa Deus arnoba bo pensamentu, pa rabida bo manera di yanda. Asin bo ta pudi rapara kal ki vontadi di Deus, kil ki bon, i pirfitu, i sabi.

³ Pabia di tarbaju ku Deus dan, N ta konta kada un di bos pa ka i pui si kabesa na lugar ki ka yangasa, ma kada kin ta pensa pa si kabesa pensamentu justu, suma midida di fe ku Deus dal.

⁴ Suma ku na un kurpu i ten manga di parti kada un parti ten si tarbaju diferenti,

⁵ asin tambi anos no ciu, ma no sedu un kurpu son na Kristu. Kada kin sedu un parti ku liga ku utrus.

⁶ No ten diferenti dons suma ku Deus patinu. Asin si algin ten don di anunsia rekadu di Deus, i ta tarbaja ku el konformi fe ki ten.

⁷ Si i di tarbaju pratiku, i ta tarbaja. Si i di nsina, pa i ten vontadi di nsina.

⁸ Si i pa konsija jinti, nta pa i konsija. Kil ku ta rapati, pa i da ku mon abertu. Kil ku na manda, pa i manda ku forsa di vontadi. Kil ku na juda pobris, pa i fasil ku alegria.

Manga di konsiju

⁹ Ka bo ten amor finjidu. Bo nega mal; bo pega na kil ki bon.

¹⁰ Bo ama ŋutru di tudu bo korson, suma ermons. Bo da ŋutru purmeru lugar ku rispitu.

¹¹ Ka bo sedu divagarosu na tarbaju, ma bo sedu kinti na spiritu pa sirbi Siñor.

¹² Bo kontenti na speransa ku bo ten, bo ten pasensa na foronta, bo pega tesu na orason.

¹³ Bo juda krentis ku ten nesesidadi, bo sedu gasijadur di ospri.

¹⁴ Bo pidi benson pa kilis ku ta pirsigi bos. Bo bensua elis; ka bo maldisua elis.

¹⁵ Bo kontenti ku kilis ku sta kontenti, bo cora ku kilis ku na cora.

¹⁶ Bo sedu unidu entri bos. Ka bo buska garandesa ma bo sedu amigu di jinti umildi. Ka bo oja na bo kabesa kuma bo sibi.

¹⁷ Ka bo torna ningin mal pa mal. Bo buska sedu retu dianti di tudu jinti.

¹⁸ Bo fasi mas ku bo pudi pa ten pas ku tudu jinti.

¹⁹ Ña ermons, ka bo vinga, abos propi, ma bo disal pa Deus, pabia i sta skritu kuma Siñor fala: “Vingansa i di mi. I ami ku na torna.”

²⁰ Asin, “Si bu inimigu tene fomi, dal pa i kume. Si i tene sedi, dal pa i bibi, pabia si bu fasi asin, bu na fasil rostu kinti ku borgoña.”

²¹ Ka bu disa mal ngañau, ma ngaña mal ku ben.