Romanus 11 - BIBLIA - traduson antigu in Krioulo

Futuru di Israel

¹ E ku manda N na punta: Nta Deus nega si pobu? I ka nega elis. Ami i israelita, di jorson di Abraon, di rasa di Benjamin.

² Deus ka nega si pobu ki kunsi disna di kumsada. O bo ka sibi ke ku Skritura konta di Elias, kuma ki papia ku Deus kontra Israel? I fala:

³ “Siñor, e mata bu anunsiaduris, e bati bu altaris; i ami son ku fika; e na buska ña vida.”

⁴ Kuma ku Deus ruspundil? I falal: “N guarda pa mi seti mil omi ku ka finka juju dianti di Baal.”

⁵ Asin tambi, ne tempu, i fika un restu ku Deus kuji na si fabur.

⁶ Si i pa fabur, i ka pabia di kusas ke fasi. Si i ka asin, fabur ka ta sedu fabur.

⁷ Nta i ke? Kil ku Israel na buska i ka yangasal, ma kilis ku kujidu e yangasal. Ki utrus bida duru.

⁸ Suma ki sta skritu: “Deus da elis spiritu kingitidu, ujus pa ka oja, orejas pa ka obi, te aos.”

⁹ Davi fala: “Se festas ta bida lastru ku armadilia ku mbaransa pa se kastigu,

¹⁰ pa se ujus sukurusi pa ka e oja, se kostas pa e fika sempri dobradu.”

¹¹ Nta N punta: E mbaransa pa e pudi kai? Nau, i ka el. Pabia di se kaida salbason bin pa kilis ki ka judeu, pa lantanda judeus kumbosadia.

¹² Si kaida di judeus tisi rikesa pa mundu, tambi si se mingua tisi rikesa pa kilis ki ka judeu, ku fadi gora ora ke riba pa se forsa!

¹³ I abos ki ka judeu ku N na papia ku el. Suma ku N sedu apostolu di kilis ki ka judeu, N ten garandesa na ña tarbaju,

¹⁴ pa N jubi si di kualker manera N pudi lantanda kumbosadia na jinti di ña rasa, pa utrus pudi salba.

¹⁵ Oca Deus nega judeus, i yabri kamiñu pa mundu torna si amigu. Ora ku Deus torna seta judeus, ke ki na sedu? I na sedu vida pa kilis ku sta mortu.

¹⁶ Si Deus dadu purmeru padas di pon, tudu pon i pa el. Si i dadu tambi rais, tudu ramu i di sil.

¹⁷ Si utru ramus kebradu, abo ku sedu olivera brabu bu njujadu na lugar delis, bu ten parti na rais ku liti di olivera,

¹⁸ ka bu njata kontra ki ramus kebradu. Si bu na njata, lembra kuma i ka abo ku nguenta rais, ma i rais ku nguentau.

¹⁹ Bu na fala: “Ramus kebradu pa N pudi njujadu na se lugar.”

²⁰ I sta bon! E kebradu pabia di se falta di fe. Abo bu sta firmi pabia di bu fe. Ka bu ronka, ma ten medu.

²¹ Si Deus ka disa ramu natural, talves i ka na disau tambi.

²² Pensa na manera ku Deus i bon, ma tambi i risu. Pa kilis ku kai i ta risu ku elis, ma pa bo i ta bon, si bu kontinua na si bondadi. Si i ka asin, tambi bu na kortadu.

²³ Elis tambi, si e ka kontinua na se falta di fe, Deus ta njuja elis, pabia i ten puder pa torna njuja elis.

²⁴ Si bu kortadu na olivera brabu, bu njujadu na olivera puru kontra naturesa, ku fadi kil ku sedu olivera propi pa i torna njujadu na si propi olivera.

²⁵ Ermons, N misti pa bo sibi e sigridu, pa bo ka yalsa ombra, kuma ndurusimentu bin riba di Israel pa un tempu markadu, tok numeru di jintius ku na yentra kompleta.

²⁶ Asin tudu Israel na sedu salbu, suma ki sta skritu: “Libertadur na bin di Sion; i na tira tudu maldadi di Jakó.

²⁷ Es i ta sedu ña kontratu ku elis ora ku N tira se pekadu.”

²⁸ Na ladu di Bon Noba elis i inimigu pabia di bos, ma, suma Deus kuji elis, e sedu amadu pabia di se papes antigu.

²⁹ Deus ka ta muda si sintidu pa kilis ki kuji, i pati kusas.

³⁰ Abos purmeru ba bo disobdisi Deus, ma gosi bo yangasa miserikordia pabia di disobdiensia di judeus.

³¹ Asin tambi e disobdisiba pa e pudi yangasa miserikordia pabia di miserikordia ku bo yangasa.

³² Pabia Deus kondena tudu jinti pabia di disobdiensia, pa i pudi usa di miserikordia pa tudu.

Kantiga di adorason

³³ O fundura di rikesa di jiresa di Deus, ku si kuñisimentu! Kin ku pudi splika kusas ki disidi? Kin ku pudi ntindi si planu?

³⁴ Kin ku ciga di kunsi pensamentu di Siñor? Kin ku sedu si konsijadur?

³⁵ O kin ku dal purmeru pa i kumsa bin torna si dunu?

³⁶ Tudu kusa, i el ku kumpul, el ku ta sustental; i pa el tambi. Gloria pa el pa sempri! Amen.