Romanus 10 - BIBLIA - traduson antigu in Krioulo

Judeus nega pa Deus fasi elis justu

¹ Ermons, diseẑu di ña korson ku ña orason pa Deus i pa Israel sedu salbu.

² Ami N sedu tustumuña kuma e misti sirbi Deus dimas, ma e ka ten ntindimentu.

³ E ka kunsi manera ku Deus ta fasi jinti justu. E buska sedu justu na se propi manera; e ka seta manera ku Deus ranja pa elis.

⁴ Kristu i kabantada di lei di Moisés, pa tudu kilis ku seta Kristu pudi ojadu justu.

⁵ Moisés skirbi aserka di kumpri lei pa ojadu justu; i fala kuma, kil ku fasi e kusas di lei, i ta vivi na lei.

⁶ Aserka di sedu justu pabia di fe, i fala: “Ka bu punta na bu korson: ‘Kin ku na subi na seu?’ ” (ku sedu pa bai tisi Kristu di riba)

⁷ “o: ‘Kin ku na ria na koba fundu?’ ” (ku sedu pa fasi Kristu lanta na metadi di mortus).

⁸ Kusa ki fala i asin: “Palabra sta pertu di bo, na bu boka, na bu korson,” ku sedu e palabra di fe ku no prega,

⁹ kuma, si ku bu boka bu diklara kuma Jesus i Siñor, na bu korson bu fia kuma Deus lantandal na metadi di mortus, bu na sedu salbu.

¹⁰ Ku korson no ta fia pa no ojadu justu; ku boka no ta konta pa no yangasa salbason.

¹¹ Skritura fala kuma tudu ku setal ka ta pasa borgoña.

¹² Deus ka ta diferensia judeu ku kil ki ka judeu. Ki mesmu algin i Siñor di tudu; i riku pa tudu ku ta comal,

¹³ pabia “Tudu kil ku coma nomi di Siñor i ta sedu salbu.”

¹⁴ Kuma ke na coma kil ke ka fia nel? Kuma ke na fia na kin ke ka obi faladu del? Kuma ke na obi si i ka ten kin ku na konta?

¹⁵ Kuma ke na konta si e ka mandadu? Suma ki sta skritu: “Bonitu i pes di kilis ku ta konta Bon Noba!”

¹⁶ Ma i ka tudu ku seta e Bon Noba. Isaias punta: “Siñor, kin ku seta no rekadu?”

¹⁷ Asin, obi rekadu ta danu fe. Rekadu bin di palabra di Kristu.

¹⁸ Ma N na punta: Nta e ka obi? Sertamenti e obi. “Se vos sai pa tudu tera; se palabra bai te na kau mas lunju di mundu.”

¹⁹ N punta inda: Israel ka sibiba es? Moisés purmeru i fala: “N na pui bos na kumbosadia ku kilis ku ka sedu pobu. N na pui bos raiba ku un pobu ku ka ten ntindimentu.”

²⁰ Isaias osa skirbi kuma Deus fala: “Kilis ku ka buskan, e ojan. N parsi pa kilis ku ka punta pa mi.”

²¹ Ma i fala tambi di Israel: “Tudu dia N distindi ña mon pa un pobu rebeldi, ntemus.”