Romanus 1 - BIBLIA - traduson antigu in Krioulo

Kumsada ku manteña

¹ Ami Paulu, servu di Kristu Jesus, comadu pa sedu apostolu, separadu pa prega Bon Noba di Deus, N na skirbi pa bos na Roma.

² Deus tarda fasi purmesa de Bon Noba na Skritura Sagradu ku si anunsiaduris skirbi.

³ E Bon Noba i di si Fiju, Jesus Kristu no Siñor, ku padidu na jorson di sangi di Davi,

⁴ ma na ladu di Spiritu di santidadi, manera ki lanta di mortu, i mostradu ku puder kuma el i Fiju di Deus.

⁵ Pabia del no risibi fabur di sedu apostolus pa amor del, pa leba jinti di tudu rasa pa e obdisil, e fia nel.

⁶ Abos tambi bo comadu juntu ku elis pa sedu di Jesus Kristu.

⁷ N skirbi pa bos tudu ku sta na Roma, ku Deus ama, i coma si pobu. N misti pa Deus no Pape, ku Siñor Jesus Kristu, da bos fabur ku pas.

Paulu misti oja romanus

⁸ Purmeru, N fala Deus obrigadu, na nomi di Jesus Kristu, pabia di bos tudu, manera ku na tudu mundu jinti na konta di bo fe.

⁹ Deus i ña tustumuña, ku N ta sirbi ku tudu ña korson, manera ku N ta konta Bon Noba di si Fiju. I sibi kuma N ta lembra di bos sempri

¹⁰ na ña orason; N ta pidil, si i si vontadi, un dia i ta yabrin kamiñu pa N bai jubi bos.

¹¹ N misti oja bos, pa N pudi rapati ku bos puder spiritual, pa bo pudi fika mas forti.

¹² Kusa ku N misti fala: ami ku bos juntu no pudi fortifika ŋutru, ami pabia di bo fe, abos pabia di ña fe.

¹³ Ermons, N misti pa bo sibi kuma manga di bias N pui pa N bai jubi bos, pa N pudi ten algun frutu na bo metadi, suma N tenba ja na utru jintius, ma te gosi N tujidu bai.

¹⁴ Ami N ten obrigason ku tudu, kilis di prasa ku kilis di matu, kilis ku sibi lei ku kilis ku ka sibi.

¹⁵ Asin N sta ku garandi vontadi pa konta Bon Noba pa bos tambi ku sta na Roma.

¹⁶ N ka ta sinti borgoña di Bon Noba di Kristu, pabia i puder di Deus pa salba tudu kil ku fia nel, purmeru judeus, ku kilis ki ka judeus tambi.

¹⁷ I ta mostra kuma ku Deus ta fasi algin justu si dianti. Di kumsada te fin i son pa fe, suma ki sta skritu na palabra di Deus: “Omi justu i na vivi pabia di si fe.”

Tudu jinti i kulpadu dianti di Deus

¹⁸ Deus mostra si raiba di seu riba di tudu maldadi ku pekadu di omis ku sukundi bardadi na se maldadi.

¹⁹ Kil ku no pudi ntindi di Deus i klaru pa elis, pabia i Deus propi ku mostra elis.

²⁰ Si koldadi ku ka ta ojadu ku uju, ku sedu si puder sin fin suma el i Deus, i un kusa klaru disna ki kumpu mundu; i ojadu pabia di kusas ki kumpu. Asin e jinti ka ten diskulpa.

²¹ E kunsi Deus ma e ka rispital suma Deus, nin e ka gardisil. Se ntindimentu saklata; se korson tulu bida sukuru.

²² E fala kuma e jiru ma e bida tulu.

²³ Te pa e adora Deus ku ka ta muri, e torkial pa imaẑens ku parsi ku omi ku ta muri, ku kacus ku limarias ku bicus ku ta rasta.

²⁴ E ku manda Deus disa elis pa e sigi diseẑu susu di se korson, pa lebsimenti di se kurpus.

²⁵ E torkia bardadi di Deus pa mintida; e adora, e sirbi kriaturas mas di ki kil ku kumpu elis, kil ku dibi di ngabadu pa sempri. Amen!

²⁶ E ku manda Deus bandona elis pa se vontadi forti di mal. Te se minjeris rabida manera di usu natural pa usu entri elis ku ka bali.

²⁷ Asin tambi omis rabida manera di usa ku minjer, e kumsa sinti vontadi forti ku na yardi dentru delis pa sirbi un ku utru. Omi ku omi e na fasi saklata, tok e bin na risibi kastigu di se maldadi na se kurpu.

²⁸ Suma ke ka mporta pa kunsi Deus, Deus tambi bandona elis pa pensamentu mau pa e fasi kusas ku ka bali.

²⁹ E inci ku tudu koldadi pekadu, maldadi, malisia ku kubisa; e inci tambi ku nveẑa, matansa, gera, nganu ku ruñesa;

³⁰ e sedu ruiduris, disfamaduris, nfastiaduris di Deus, kobaduris, kunfiadus, orgulyosus, nventaduris di mal, disobdienti pa pape ku mame,

³¹ tulus, infiel na kontratu, ku ka ten amor, ku ka ten pena di utrus.

³² E jinti e kunsi lei di Deus diritu, ku fala kuma kilis ku ta fasi e koldadi kusas e mersi mortu, ma i ka son kuma e ta fasil; tambi e ta kontenti pa utrus fasil.