Ripitison di Lei 7 - BIBLIA - traduson antigu in Krioulo

Ordi pa kaba ku kananeus ku se idulus

¹ SIÑOR bu Deus na yentrandau na ki tera ku bu na bai toma pa bo. Ora ku bu yentra, i na tira fora seti nason mas ciu i mas forti di ki bo: eteus, jirgaseus, amoreus, kananeus, perizeus, eveus ku jebuseus.

² Ora ku SIÑOR bu Deus ntrega elis na bu mon pa bu ngaña elis, bu ten ku mata elis tudu. Ka bu fasi kontratu ku elis, nin ka bu ten pena delis.

³ Ka bu kasa ku elis; ka bu da bu fijus femia pa e kasa ku se fijus, nin ka bu toma se fijus femia suma minjeris pa bu fijus,

⁴ pabia e ta disvianta bu fijus di mi, e leba elis pa e sirbi utru deusis. Asin, raiba di SIÑOR i ta sindi kontra bos, i ta kaba ku bos kinti-kinti.

⁵ Asin ku bo na fasi elis: Bo bati se altaris, bo kebra se kulunas sagradu, bo dana se idulus di Aserá, bo kema se imaẑens labradu na fugu.

⁶ Abos i pobu sagradu pa SIÑOR bo Deus. El i kuji bos na metadi di tudu rasas na mundu pa bo sedu si propi pobu spesial.

⁷ I ka pabia bo seduba mas ciu di ki tudu utru rasas ku manda SIÑOR pui sintidu na bos, i kuji bos, ma bo seduba nason mas pikininu di tudu.

⁸ SIÑOR tenba amor pa bos, tambi i mistiba kumpri ki purmesa ki fasiba bo papes ku juramentu; e ku manda i tira bos ku mon forti, i kaplinti bos di tera di katiberasku, di mon di Faraó, rei di Ejitu.

⁹ Asin bu dibi di ntindi kuma SIÑOR bu Deus, el ki Deus; i Deus fiel ku ta guarda si kontratu. I na mostra bondadi te mil manjuandadi di kilis ku amal, e obdisi si mandamentus,

¹⁰ ma kilis ku odial, i ka na tarda pa da elis se pagamentu, i na kaba ku elis.

¹¹ Asin, ba ta obdisi mandamentus, regras ku leis ku N na dau aos.

Obdiensia ta tisi benson

¹² Si bu para atenson pa e leis, bu pui sintidu na obdisi elis, SIÑOR bu Deus na sedu fiel na guarda kontratu ki fasi ku bu papes ku juramentu, i na mostrau si bondadi.

¹³ I na amau, i bensuau, i aumenta bu numeru, i pui pa bu padi ciu. I na bensua prudutu di bu con, bu trigu, biñu nobu, azeiti, ku bu kriason di baka, karnel ku kabra, na tera ki jurmenta pa bu papes kuma i na dau.

¹⁴ Bu na sedu mas sortiadu di ki tudu utru rasas. I ka na ten ningin na bo metadi, nin macu nin femia, ku ka na pudi padi, nin na metadi di bo limarias tambi.

¹⁵ SIÑOR na librau di tudu duensa; i ka na manda riba di bo kualker di ki duensas mau di ejipsius ku bu kunsiba la na Ejitu, ma i na pui elis riba di kilis ku odial.

¹⁶ Bu ten ku kaba ku tudu rasas ku SIÑOR bu Deus ntrega na bu mon; ka bu mostra pena pa elis, nin ka bu sirbi se deusis, pabia kila i ta sedu lastru pa bo.

¹⁷ Bu pudi fala na bu sintidu: “Ki jinti e mas ciu di ki mi; kuma ku N na pudi tira elis fora?”

¹⁸ Ka bu ten medu delis, ma lembra sempri di kil ku SIÑOR bu Deus fasi Faraó ku tudu ejipsius.

¹⁹ Bu oja ki garandi kastigu ku bu uju, ku milagris ku kusas garandi ku SIÑOR fasi, manera ki distindi si mon forti i tirau. Asin ku SIÑOR bu Deus na fasi tudu ki rasas ku bu na sinti medu delis.

²⁰ Tambi SIÑOR bu Deus na manda bagera na se metadi, tok kilis ku kapli e sukundi di bo e kaba muri tudu.

²¹ Ka bo panta se dianti, pabia SIÑOR bo Deus ku sta na bo metadi i Deus garandi i meduñu.

²² SIÑOR bu Deus na tira ki jinti fora puku puku konformi ku bu na avansa. Bu ka na pudi kaba ku elis tudu di un bias, pa ka limarias di matu buri, e ataka bos.

²³ Ma SIÑOR na ntregau ki jinti, i na pui elis pa e panta dimas, tok e kabadu ku el.

²⁴ I na ntrega se reis na bu mon, pa bu mata elis tok se nomis ka na lembradu mas. Nin un omi ka na pudi firma kontra bo; bu na kaba ku elis.

²⁵ Bu na kema imaẑens labradu di se deusis na fugu; ka bu kubisa prata ku uru ku sta riba delis, nin ka bu tomal pa bo. I pudi sedu lastru pa pañau, pabia i kusa nujenti pa SIÑOR bu Deus.

²⁶ Ka bu miti un idulu nujenti na bu kasa, pa ka bu bin kabadu ku el, suma ku ki idulu na kabadu ku el. Bu ten ku nuju el, bu odial, pabia i sta bas di maldison, pa i kabadu ku el.