Ripitison di Lei 6 - BIBLIA - traduson antigu in Krioulo

Ama SIÑOR bu Deus

¹ Esis i mandamentus, regras ku leis ku SIÑOR bo Deus mandan pa N nsina bos, pa bo pudi pui elis na pratika na tera ku bo na kamba Jordon pa yarda.

² Rispita SIÑOR bu Deus nkuantu bu sta di vida, bu obdisi tudu si leis ku mandamentus ku N dau, abo, bu fiju, ku fiju di bu fiju; asin bu ta tene vida mas kumpridu.

³ O Israel, sukuta e mandamentus, bu pui sintidu pa obdisi elis, pa kusas kuriu diritu, pa bu numeru aumenta na ki tera riku ku ta pruduzi ciu, suma ku SIÑOR Deus di bu papes fala.

⁴ Israel, sukuta! SIÑOR no Deus, el son ku sedu SIÑOR.

⁵ Ama SIÑOR bu Deus ku tudu bu korson, tudu bu alma, ku tudu bu forsa.

⁶ Es ordis ku N na dau aos e ten ku sta na bu korson.

⁷ Nsina elis pa bu fijus, bu fala aserka delis ora ku bu sta sintadu na bu kasa, o bu na yanda na kamiñu, ora ku bu na dita o bu na lanta na kama.

⁸ Mara elis na bu mon, tambi na bu testa, suma sinal di lembransa;

⁹ bu skirbi elis na portas di bu kasa, ku na porton.

Avisu kontra disobdiensia

¹⁰ Suma ku SIÑOR bu Deus jurmenta pa bu papes, Abraon, Isak ku Jakó, i na yentrandau na un tera ku tene garandi prasas riku ku bu ka kumpu,

¹¹ ku kasas incidu ku tudu koldadi kusas bon ku bu ka pui la, ku fontis ku bu ka koba, ku ortas di pe di uva ku olivera ku bu ka paranta; bu na kume, bu farta.

¹² Ora ki yentrandau la, toma sintidu pa bu ka diskisi di SIÑOR, kil ku tirau di katiberasku na tera di Ejitu.

¹³ Rispita SIÑOR bu Deus; el son ku bu na sirbi; na si nomi ku bu na jurmenta.

¹⁴ Ka bu bai tras di utru deusis, ki deusis di nasons ku sta na bu volta,

¹⁵ pa raiba di SIÑOR bu Deus ka bin yardi kontra bo, tok i kaba ku bo, pabia SIÑOR bu Deus ku sta na bo metadi i ta ten siumi.

¹⁶ Ka bo tenta SIÑOR bo Deus, suma ku bo tental na Masá.

¹⁷ Bo pui sintidu pa obdisi mandamentus di SIÑOR bo Deus, ku si regras ku leis ki da bos.

¹⁸ Fasi kil ki retu i bon dianti di SIÑOR, pa kusas pudi kuriu diritu, pa bu yentra, bu toma ki bon tera ku SIÑOR fala bu papes ku juramentu kuma i na da elis,

¹⁹ pa i judau tira fora tudu bu inimigus dianti di bo, suma ku SIÑOR fala.

²⁰ Mas dianti bu fiju na bin puntau: “Kal ki signifikadu di mandamentus ku regras ku leis ku SIÑOR no Deus fala pa bo obdisi?

²¹ Bu ta ruspundi bu fiju, bu falal: “No seduba katibus di Faraó na Ejitu, ma SIÑOR tiranu di la ku mon forti.

²² Dianti di no uju SIÑOR fasi kusas garandi suma sinal, i fasi milagris meduñu na Ejitu riba di Faraó ku tudu si familia.

²³ I tiranu di la pa tisinu li, pa danu tera ki fala no papes ku juramentu kuma i na da elis.

²⁴ SIÑOR danu ordi pa obdisi tudu e leis, tambi pa rispita SIÑOR no Deus. Si no fasi asin, i ta sedu sempri pa ben di nos; no ta kontinua ku vida, suma aos.

²⁵ Si no pui sintidu na obdisi tudu e mandamentus dianti di SIÑOR no Deus, suma ki mandanu, no ta ojadu justu.