Ripitison di Lei 34 - BIBLIA - traduson antigu in Krioulo

Mortu di Moisés

¹ Moisés sai na kau rasu di Moab, i bai pa monti Nebu, i subi na ponta mas altu di Pisga, filadu ku Jerikó. SIÑOR mostral tudu tera desdi Jilead te na Dan,

² tudu Naftali, tera di Efrain ku di Manasés, tudu con di Judá te na Mar Mediteraneu,

³ ladu di sul ku kau rasu, kobon di Jerikó, prasa di palmeras, te na Zoar.

⁴ SIÑOR falal: “Kila i tera ku N purmiti Abraon, Isak ku Jakó ku juramentu, oca ku N fala elis kuma N na dal pa se jorson. N na mostrau el pa bu ojal ku bu uju, ma bu ka na kamba pa la.”

⁵ Asin Moisés, servu di SIÑOR, muri la na tera di Moab, konformi kil ku SIÑOR fala.

⁶ Deus nteral na tera di Moab, na kobon dianti di Bet-Peor; te aos ningin ka sibi kau sertu ki nteradu nel.

⁷ Moisés muri ku sentu i vinti anu, ma nin si uju ka sukuru, nin i ka pirdi si forsa.

⁸ Fijus di Israel coral trinta dia na kau rasu di Moab, tok e kompleta dias di cur.

⁹ Josué, fiju di Nun, staba incidu ku spiritu di jiresa, pabia Moisés puiba mon riba del. Asin fijus di Israel obdisil, e fasi suma ku SIÑOR manda Moisés.

¹⁰ Nunka mas anunsiadur ka lanta na Israel suma Moisés, ku SIÑOR kunsi uju ku uju,

¹¹ ku fasi tudu ki sinal ku milagris ku SIÑOR mandal pa i fasi na tera di Ejitu, kontra Faraó ku tudu si ŝefis ku tudu si tera.

¹² I ka ten utru anunsiadur ku tenba puder pa fasi kusas meduñu suma kilis ku Moisés fasi dianti di uju di tudu Israel.