Ripitison di Lei 3 - BIBLIA - traduson antigu in Krioulo

Israel ngaña Og, rei di Basan

¹ Dipus, no rabida no bai na kamiñu di Basan. Og, rei di Basan, i sai ku tudu si tropas pa geria ku nos na Edrei.

² SIÑOR falan: “Ka bu ten medu del, pabia N ntregal ja na bu mon, ku tudu si tropas ku si tera. Bu na fasil suma ku bu fasi Sion, rei di amoreus, ku moraba na Esbon.”

³ Asin SIÑOR no Deus ntreganu Og, rei di Basan, ku tudu si tropas. No mata elis tok ningin ka sobra ku vida.

⁴ Na ki tempu no toma tudu si prasas; nin un ka kaplinu na ki sesenta prasa na tudu reẑion di Argob, na renu di Og di Basan.

⁵ Tudu ki prasas seduba fortifikadu ku muras kumpridu, ku portons ku trinkus, fora di manga di tabanka sin mura.

⁶ No kaba ku elis, suma ku no fasi Sion, rei di Esbon; no kaba ku tudu prasas, ku omis, minjeris ku mininus.

⁷ Ma tudu limarias, ku rikesa di prasas, no tomal pa nos.

⁸ Asin na ki tempu no toma na mon di ki dus rei di amoreus tera na lesti di riu Jordon, desdi riu Arnon te na monti di Ermon.

⁹ (Jinti di Sidon e ta coma Ermon Sirion; amoreus ta comal Senir.)

¹⁰ No toma tudu prasas na kau altu i rasu, tudu Jilead, ku tudu Basan te Salka ku Edrei, prasas di renu di Og na Basan.

¹¹ (Son Og, rei di Basan, ku sobraba inda di jigantis. Si kama di feru, ku teneba 4 metru di kumprimentu ku kuas 2 metru di largura, konformi midida normal, i sta na prasa di Rabá, na tera di amonitas.)

Yardansa di jorsons na ladu di lesti di Jordon

¹² N rapati tera ku no toma na ki tempu, N da rubenitas ku gaditas ki parti desdi Aroer, ku sta lungu di kobon di Arnon, ku metadi di reẑion di montañas di Jilead, ku tudu si prasas.

¹³ Pa metadi di jorson di Manasés N da restu di Jilead, suma tambi tudu Basan, renu di Og. (Tudu ki reẑion di Argob na Basan ta comaduba tera di jigantis.)

¹⁴ Jair, di jorson di Manasés, i toma tudu reẑion di Argob te na frontera di jesuritas ku maakatitas, i pul si propi nomi. Asin te aos Basan ta comadu Avot-Jair.

¹⁵ N da Jilead pa Makir.

¹⁶ N da rubenitas ku gaditas ki parti desdi Jilead te frontera na metadi di kobon di Arnon, tambi te riusiñu di Jabok ku sedu frontera di fijus di Amon.

¹⁷ Se frontera na kaida di sol sedu bulaña di Jordon desdi Kineret te na Mar Salgadu, lungu di monti Pisga pa lesti.

¹⁸ Na ki tempu N fala bos: “SIÑOR bo Deus da bos e tera pa bo tenel, ma abos, tudu omis forti, bo ten ku kamba, yarmadu, dianti di bo ermons, fijus di Israel.

¹⁹ Son bo minjeris ku mininus ku bo limarias (pabia N sibi kuma bo tene manga di limaria), elis ku na fika na prasas ku N da bos,

²⁰ tok SIÑOR da bo ermons diskansu, suma ki da bos, pa elis tambi e pudi toma tera ku SIÑOR bo Deus na bin da elis na utru banda di Jordon. Dipus bo ta riba, kada kin pa yardansa ku N da bos.”

²¹ Tambi na mesmu tempu N da ordi pa Josué, N falal: “Bu oja ku bu uju tudu ku SIÑOR bu Deus fasi ki dus rei; asin ki na fasi ku tudu renu la na utru banda nunde ku bu na bai.

²² Ka bo medi elis, pabia SIÑOR bo Deus, el ku na geria pa bos.”

Moisés ka disadu yentra na Kanaan

²³ Na ki tempu N roga SIÑOR, N falal:

²⁴ “SIÑOR Deus, bu kumsa ja mostra bu servu bu garandesa ku bu mon forti, pabia i ka ten utru deus na seu nin na tera ku pudi fasi kusas garandi suma ku bu ta fasi ku bu forsa.

²⁵ N pidiu, disan pa N kamba pa bai jubi ki bon tera na utru banda di Jordon, ki montaña bonitu, ku Líbanu.”

²⁶ Ma SIÑOR paña raiba di mi pabia di bos, i nega obin. I falan: “I justa; ka bu falan mas ne asuntu.

²⁷ Subi riba di monti Pisga, bu yalsa uju pa norti, pa sul, pa lesti ku kaida di sol. Jubi diritu ku bu uju, pabia bu ka na kamba riu Jordon.

²⁸ Nkarga Josué, bu dal animu, bu fortifikal, pabia i el ku na kambanta e pobu pa e bai yarda tera ku bu na oja.”

²⁹ Asin no fika na kobon dianti di Bet-Peor.