Ripitison di Lei 28 - BIBLIA - traduson antigu in Krioulo

Bensons pa obdientis

¹ Si bu para oreja pa kil ku SIÑOR bu Deus na fala, bu pui sintidu pa obdisi tudu si mandamentus ku N na mandau aos, SIÑOR bu Deus na yalsau riba di tudu nasons di mundu.

² Tudu e bensons na yangasau, e fika riba di bo, si bu obdisi palabra di SIÑOR bu Deus.

³ Bu na sortiadu na prasa, tambi na bu lugar di labur.

⁴ Bu na sortiadu tok bu padi ciu, tambi na kriason di bu limarias; bu bakas ku karnel na padi ciu, bu lugar na pruduzi ciu.

⁵ Bu balai di yurni arus na sortiadu; bu pilon na sortiadu tambi.

⁶ Bu na sortiadu ora ku bu yentra; tambi ora ku bu sai bu na sortiadu.

⁷ SIÑOR na dau vitoria riba di bu inimigus ku lanta kontra bo; e na sai na un kamiñu son kontra bo, ma e na kuri di bo na seti kamiñu.

⁸ SIÑOR na manda si benson riba di tudu tarbaju ku bu na fasi, i inci bu bemba. I na bensuau na tera ki na dau.

⁹ SIÑOR na konfirmau pa bu sedu si pobu sagradu, suma ki jurmenta, si bu obdisi mandamentus di SIÑOR bu Deus, bu yanda na si kamiñus.

¹⁰ Asin tudu nasons na mundu na oja kuma bu comadu pa nomi di SIÑOR, e na ten medu di bo.

¹¹ SIÑOR na dau manga di rikesa na tera ki jurmenta pa bu papes kuma i na dau, na fijus ku bu na padi, na fijus di bu limarias, tambi na prudutu di bu con.

¹² SIÑOR na yabri seu, si armazen di rikesa, pa manda cuba na bu tera na si tempu, pa bensua tudu tarbaju ku bu ta fasi. Bu na pista pa manga di nason, ma abo, bu ka na pista nada di ningin.

¹³ SIÑOR na pou pa bu sedu kabesa, bu ka na sedu rabu. Si bu para atenson pa mandamentus di SIÑOR bu Deus ku N na dau aos, pa pui elis na pratika, bu na sta sempri riba; nunka bu ka na sta bas.

¹⁴ Ka bu disvia, nin pa direita nin pa skerda, di tudu palabras ku N na dau aos, pa bai tras di utru deusis pa sirbi elis.

Maldison pa disobdientis

¹⁵ Si bu ka para atenson pa palabra di SIÑOR bu Deus, bu ka pui sintidu pa obdisi tudu si mandamentus ku leis ku N na dau aos, tudu e maldison na yangasau, i fika riba di bo.

¹⁶ Bu na maldisuadu na prasa, tambi na bu lugar di labur.

¹⁷ Bu kufu na maldisuadu, ku bu pilon.

¹⁸ Bu na maldisuadu na padi, tambi na kriason di bu bakas ku karnel; bu lugar ka na pruduzi ciu.

¹⁹ Bu na maldisuadu ora ku bu yentra, tambi ora ku bu sai bu na maldisuadu.

²⁰ Si bu yanda na maldadi, bu bandona SIÑOR, i na manda maldison riba di bo, ku kunfuson ku mufunesa na tudu kil ku bu na fasi, tok bu kabadu ku el, bu pirdi di repenti.

²¹ SIÑOR na pui duensa mau pa i pegau, tok i kaba ku bo na tera ku bu na bai toma.

²² SIÑOR na kastigau ku tuberkulosi, febri, incasku, kalur forti, falta di yagu, duensa di plantas ku bulur; es tudu na ŝatiau tok bu pirdi.

²³ Seu ku sta riba di bu kabesa i na sedu di bronzi; con bas di bo i na sedu di feru.

²⁴ Te pa SIÑOR dau cuba, i na dau turbada di puera ku reia, ku na kai riba di bo tok bu pirdi.

²⁵ SIÑOR na da bu inimigus vitoria riba di bo; bu na sai na un kamiñu kontra elis, ma bu na kuri se dianti na seti kamiñu. Tudu renus di mundu na panta si e oja ke ku pasa ku bo.

²⁶ Bu kadaver na sedu kumida pa tudu kacus ku ta bua, ku limarias di matu; i ka na ten kin ku na serka elis.

²⁷ SIÑOR na kastigau ku cagas suma ejipsius ta tene, ku tumoris, sarna ku kosera ku ka pudi kuradu.

²⁸ SIÑOR na kastigau ku dudesa, segera, ku kunfuson di kabesa.

²⁹ Bu na palpa-palpa di dia suma segu ku na palpa na sukuru; nada ka na kuriu diritu; bu na kalkadu tudu dia; jinti na furta bu kusas; i ka na ten kin ku na librau.

³⁰ Bu na tene kumprumis pa kasa ku minjer, ma utru omi na dita ku el; bu na kumpu kasa ma bu ka na mora nel; bu na paranta orta di uva, ma bu ka na kume si fruta.

³¹ Bu turu na matadu bu dianti, ma bu ka na kume nin un padas di si karni; bu buru na furtadu bu dianti, i ka na tornadu pa bo; bu karnel na dadu pa bu inimigus; i ka na ten kin ku na libral.

³² Bu dianti bu fijus macu ku femia na dadu suma katibus pa utru nason. Bu uju na pirdi forsa kada dia, manera di jubi kamiñu si e na bin, ma bu ka na pudi fasi nada.

³³ Un pobu ku bu ka kunsi na kume prudutu di bu con ku bu tarbaju. Bu na kalkadu, bu maltratadu tudu dia.

³⁴ Bu kabesa na fika mbariadu pa kusas ku bu na oja ku bu uju.

³⁵ SIÑOR na kastiga bu juju ku bu perna ku manditas ku ta de dimas, ku ka pudi kuradu; e na sai na bo desdi pata di pe te na kabesa.

³⁶ SIÑOR na lebau, abo ku bu rei ku bu pui riba di bo, pa un pobu ku bu ka kunsi, nin abo nin bu papes. La bu na sirbi utru deusis di po ku di pedra.

³⁷ Bu na sedu ditu di tudu rasas ku SIÑOR lebau na se metadi; e na fika pasmadu ku ke ku SIÑOR fasiu, ma e na ri di bo.

³⁸ Bu na sumia ciu ma bu na kebra puku, pabia gamfañotis na kumel.

³⁹ Bu na paranta orta di uva, bu toma konta del, ma bu ka na kuji si uva nin bu ka na bibi si biñu, pabia bicus na kumel.

⁴⁰ Bu na tene oliveras na tudu parti di bu tera, ma bu ka na tene azeiti pa unta, pabia azeitonas na konkoñi e kai.

⁴¹ Bu na padi fijus macu ku femia ma bu ka na tene elis, pabia e na lebadu pa katiberasku.

⁴² Bicus na kume tudu bu arvuris ku plantas di bu con.

⁴³ Stranjeru ku mora na bo metadi i na ngaña puder kada bias mas riba di bo; abo bu na ria son pa bas.

⁴⁴ I na pistau, ma bu ka na tene pa pistal; el i na sedu kabesa; bu na sedu rabu.

⁴⁵ Tudu e maldisons na bin riba di bo, e fika bu tras, e yangasau, tok bu kabadu ku el, pabia bu ka para sintidu pa palabra di SIÑOR bu Deus, pa obdisi si mandamentus ku si leis ku N mandau.

⁴⁶ E na sedu sinal ku dimirason pa bo ku bu jorson pa sempri.

⁴⁷ Suma ku bu ka sirbi SIÑOR bu Deus ku kontentamentu, ku bon vontadi, oca ku bu teneba ciu rikesa,

⁴⁸ asin bu na sirbi bu inimigus ku SIÑOR na manda kontra bo. Bu na fasil ku fomi, ku sedi, sin ropa, ku falta di tudu. SIÑOR na pui un korenti di feru na bu garganti tok i kaba ku bo.

⁴⁹ SIÑOR na lantanda kontra bo un nason di lunju, di utru ladu di mundu, ku bu ka kunsi si lingua. I na pika riba di bo di repenti suma agia.

⁵⁰ Si omis ta tene rostu brabu; e ka na rispita bejus, nin e ka na sinti pena di mininus.

⁵¹ E na kume bu limarias, ku prudutu di bu con, tok fomi kaba ku bo. E ka na disau miju, biñu, azeiti, fijus di bu bakas nin di bu karnel, tok e kaba ku bo.

⁵² Na tudu parti di tera e na taja tudu bu prasas, tok ki muras kumpridu, forti, ku bu fiansaba nelis, e kai. Asin e na atakau na tudu prasas di tera ku SIÑOR bu Deus dau.

⁵³ Ora ku bu inimigus tajau, bu na foronta tok bu kume karni di bu propi fijus ku bu padi, ki fijus macu ku femia ku SIÑOR bu Deus dau.

⁵⁴ Ki omi mas finu na bo metadi, ku tene bon kriason, i ka na misti rapati nada ku si ermon, nin ku si minjer ki ama, nin ku si fijus ki sobra ku elis inda.

⁵⁵ Asin i ka na pati nin un delis un padas di karni di si fijus ki na kume, pabia i ka sobra ku utru kusa na ki tempu di foronta ku inimigus taja tudu bu prasas.

⁵⁶ Ki minjer mas finu na bo metadi, ku tene bon kriason, ku sedu finu dimas tok i ka ta osa pui pata di pe na con, i ka na misti rapati nada ku si omi ki ama, nin ku si fijus macu o femia.

⁵⁷ I tene si mparia ku sai na si bariga, ku fiju ki kumsa padi; i misti kume elis sukundidu pabia di falta di tudu na ki tempu di foronta ku inimigus taja bu prasas.

⁵⁸ Si bu ka pui sintidu pa obdisi tudu palabras de lei ku sta skritu ne libru, bu rispita e nomi gloriosu, meduñu, di SIÑOR bu Deus,

⁵⁹ SIÑOR na manda garandi kastigus meduñu, ku ka na lestu pa kaba, riba di bo ku bu jorson; i na manda tambi duensas mau ku na tarda na bo.

⁶⁰ Tudu ki duensas ku bu ta mediba na Ejitu, SIÑOR na torna pui elis riba di bo; e na pegau.

⁶¹ Tambi SIÑOR na tisi riba di bo tudu koldadi duensa ku mufunesa ku ka sta skritu ne libru di lei, tok bu kabadu ku el.

⁶² Abos ku seduba ciu suma strelas di seu, bo na bin fika puku, pabia bo ka para oreja pa obi palabra di SIÑOR bo Deus.

⁶³ Suma ku SIÑOR kontenti ba ku bos, i fasi bos ben, i aumenta bos, asin tambi ki na kontenti pa dana bos, i kaba ku bos. Bo na rinkadu na tera ku bo na bai toma.

⁶⁴ SIÑOR na pajiga bos na metadi di tudu nasons di un parti di mundu pa utru. La bu na sirbi utru deusis di po ku di pedra, ku nin abo nin bu papes ka kunsi.

⁶⁵ Na metadi di ki nasons bu ka na ten diskansu, nin kau pa diskansa bu pe. SIÑOR na dau korson ku ka na ten susegu; bu uju na fika kansadu, bu na fika disanimadu.

⁶⁶ Bu ka na ten sertesa di bu vida; bu na sinti medu di dia ku di noti. Suguransa ka na ten pa bo.

⁶⁷ Parmaña bu na fala: “A! pañan pa i sedu di noti!” Di tardi bu ta fala: “A! pañan pa sol mansi janan!” Bu na fala asin pabia bu korson na bati ku medu, tambi ku kusas ku bu na oja ku bu uju.

⁶⁸ SIÑOR na ribantau na barkus pa Ejitu, ki kau ku N falaba kuma nunka mas bu ka na ojal. La bo na bindi bo kabesa suma katibu macu ku femia pa bo inimigus, ma i ka na ten kin ku misti kumpra bos.