Ripitison di Lei 27 - BIBLIA - traduson antigu in Krioulo

Altar na monti Ebal

¹ Moisés, juntu ku garandis di Israel, i da ordi pa pobu, i fala: “Obdisi tudu e mandamentus ku N na dau aos.

² Na dia ku bu kamba Jordon pa tera ku SIÑOR bu Deus na dau, bu na lantanda pedras garandi, bu kaia elis,

³ bu skirbi nelis tudu palabras de lei. Dipus di bu kamba pa ki tera riku ku ta pruduzi ciu, ku SIÑOR, Deus di bu papes, na dau, suma ki falau,

⁴ si bu sta ja na utru banda di Jordon, bu ta lantanda ki pedras na monti Ebal, bu kaia elis, suma ku N mandau aos.

⁵ Tambi bu na kumpu un altar di pedras pa SIÑOR bu Deus; ka bu usa feramentu di feru nelis,

⁶ ma usa son pedras ku ka kortadu pa kumpu altar di SIÑOR bu Deus. Bu ta pursenta riba del ofertas kemadu pa SIÑOR bu Deus,

⁷ bu sakrifika tambi ofertas di pas, bu kume la, bu kontenti dianti di SIÑOR bu Deus.

⁸ Na ki pedras ku bu kaia, bu na skirbi ben klaru tudu palabras de lei.”

⁹ Moisés, juntu ku saserdotis levita, i papia mas pa tudu Israel, i fala: “O Israel, para atenson, bu sukuta! Gosi ja bu sedu pobu di SIÑOR bu Deus.

¹⁰ Asin, bu ten ku obdisi palabra di SIÑOR bu Deus, bu pratika si mandamentus ku si leis ku N na dau aos.”

Maldisons na monti Ebal

¹¹ Na ki mesmu dia Moisés da pobu ordi, i fala:

¹² Dipus ku bo kamba Jordon, jorsons ku na firma na Monti Jerizin, nkuantu benson na anunsiadu pa pobu, i esis: Simeon, Levi, Judá, Isakar, José ku Benjamin.

¹³ Jorsons ku na firma na Monti Ebal, nkuantu maldison na anunsiadu, i esis: Ruben, Gad, Aser, Zebulon, Dan ku Naftali.

¹⁴ Levitas na anunsia pa tudu Israel ku vos altu, e fala:

¹⁵ “Maldisuadu omi ku labra imaẑen, o i kumpu un idulu di feru, i pul na un kau sukundidu pa adoral, pabia kusa suma es ku omis kumpu i nujenti pa SIÑOR.” Tudu pobu na ruspundi e fala: “Amen.”

¹⁶ “Maldisuadu kil ku dispreza si pape o si mame.” Tudu pobu na ruspundi e fala: “Amen.”

¹⁷ “Maldisuadu kil ku mundanta pedra di frontera di terenu di si kumpañer.” Tudu pobu na ruspundi e fala: “Amen.”

¹⁸ “Maldisuadu kil ku pui algin segu pa i yara ku kamiñu.” Tudu pobu na ruspundi e fala: “Amen.”

¹⁹ “Maldisuadu kil ku nega fasi justisa sertu pa stranjeru, orfan ku viuva.” Tudu pobu na ruspundi e fala: “Amen.”

²⁰ “Maldisuadu kil ku dita ku minjer di si pape, pabia kila ta tisi borgoña pa si pape.” Tudu pobu na ruspundi e fala: “Amen.”

²¹ “Maldisuadu kil ku ten relason seksual ku kualker limaria.” Tudu pobu na ruspundi e fala: “Amen.”

²² “Maldisuadu kil ku dita ku si irma, ku junta pape o mame.” Tudu pobu na ruspundi e fala: “Amen.”

²³ “Maldisuadu kil ku dita ku mame di si minjer.” Tudu pobu na ruspundi e fala: “Amen.”

²⁴ “Maldisuadu kil ku mata si kumpañer na sigridu.” Tudu pobu na ruspundi e fala: “Amen.”

²⁵ “Maldisuadu kil ku seta pagadu pa mata algin ku ka ten kulpa.” Tudu pobu na ruspundi e fala: “Amen.”

²⁶ “Maldisuadu kil ku ka kumpri palabras de lei pa konfirma elis.” Tudu pobu na ruspundi e fala: “Amen.”