Ripitison di Lei 25 - BIBLIA - traduson antigu in Krioulo

¹ Si dus omi tene keŝa na se metadi, e bai pa kau di fasi justisa pa kasu pudi julgadu, juisis na da roson pa kil ki justu, e na kondena kil ku ten kulpa.

² Si ki kulpadu mersi suti, juis na pul pa i dita, i na manda sutal si dianti ku ki numeru di ŝikotiada ku markadu konformi si krimi,

³ ma i ka pudi dal mas di ki korenta ŝikotiada pabia, si i manda dal mas di ki kila, bu ermon na fika disgrasadu na uju di jinti.

⁴ Ka bu mara boka di turu ku sta na tarbaju di masa arus.

⁵ Si ermons mora juntu, un delis muri sin i ka disa fiju, si viuva ka dibi di kasa fora di familia. I obrigason di si kuñadu pa tomal, i kasa ku el.

⁶ Purmeru fiju ke padi na sta na nomi di si ermon ku muri, pa si nomi ka pirdi na Israel.

⁷ Si si kuñadu ka misti kasa ku el, ki viuva na bai pa garandis na porton di prasa, i na fala: “Ña kuñadu nega pui pa nomi di si ermon kontinua na Israel; i ka misti fasi si dever ku mi.”

⁸ Garandis di prasa na comal, e papia ku el. Si i kontinua nega i fala: “N ka misti kasa ku el,”

⁹ viuva di si ermon na bai pa el, dianti di garandis, i na tiral sapatu na pe, i na kuspil na rostu, i fala: “Asin ki ta fasidu ku omi ku nega da si ermon un jorson.”

¹⁰ Jorson di ki omi i na comadu na Israel: “Familia di diskalsadu.”

¹¹ Si dus omi na geria, minjer di un delis ciga pa libra si omi na mon di ki utru ku na sutal, si kontra i distindi mon, i pega na omi na kau ki ka dibi di toka,

¹² bu na kortal mon; bu ka na ten pena del.

Pesu ku midida justu

¹³ Ka bu tene dus pesu diferenti na bu bolsu, un pa pesa kusas di kumpra, utru pa pesa kusas di bindi.

¹⁴ Ka bu tene dus litru diferenti na bu kasa, un garandi, un pikininu.

¹⁵ Bu na tene pesus ku mididas justu, pa bu pudi tarda na tera ku SIÑOR bu Deus na dau.

¹⁶ SIÑOR bu Deus nuju tudu jinti ku ta fasi nogos na tarpasa.

Amalek na kabadu ku el

¹⁷ Lembra di ke ku amalekitas fasiu na kamiñu oca ku bu na bin di Ejitu.

¹⁸ Ocau kansadu, sin forsa, e sai pa bo na kamiñu, e atakau di tras, e mata ki frakus ku ka pudiba janti. E ka sinti medu di Deus.

¹⁹ Ora ku SIÑOR bu Deus dau diskansu di tudu bu inimigus na roda, na tera ki na dau pa bu tenel suma yardansa, bu ten ku pui nomi di amalekitas diskisidu di un bias na mundu. Ka bu diskisi!