Ripitison di Lei 24 - BIBLIA - traduson antigu in Krioulo

¹ I pudi sedu ku un omi kasa ku minjer; dipus i ka bin gosta del pabia i oja un kusa fiu nel, i skirbi karta di kaba-kasamenti, i dal el, i dispidil di si kasa.

² Minjer pudi sai na si kasa, i bai kasa ku utru omi.

³ Ki sugundu omi tambi i pudi bin ka gosta di minjer, i skirbi karta di kaba-kasamenti, i dal el, i dispidil di si kasa; o ki sugundu omi ku kasal i pudi muri.

⁴ Na un kasu suma es, ki si purmeru omi ku dispidil i ka pudi torna risibil pa i sedu si minjer, pabia i sta ja kontaminadu. Si i fasi asin, i ta sedu un kusa nujenti dianti di SIÑOR. Ka bu tisi pekadu pa tera ku SIÑOR bu Deus dau pa bu yarda.

⁵ Ora ku un omi kumsa kasa ku si bajuda, i ka dibi di mandadu pa gera, nin i ka dibi di pudu utru kargu publiku. I ten ku fika libri na si kasa pa un anu ntidu, pa el ku si minjer pudi kontenti.

⁶ Si bu pista algin, ka bu pul pa i mpiñau si dus pedra di mui, nin mesmu ki pedra di riba, pabia i ta sedu suma i mpiñau si vida.

⁷ Si i diskubridu kuma algin furta un di si ermons israelita, pa tenel suma katibu o pa bindil, ki ladron ten ku matadu. Asin bu ta tira ki mal na bo metadi.

⁸ Toma sintidu ku mpincu ku ta kamba, bu fasi konformi saserdotis levita nsinau; bu pui sintidu pa obdisi tudu ordis ku N da elis.

⁹ Lembra di kil ku SIÑOR bu Deus fasi Mirian na kamiñu, dipus ku bu sai na Ejitu.

¹⁰ Si bu pista bu kumpañer un kusa, ka bu yentra na si kasa pa toma ropa ki na dau pa mpiñau.

¹¹ Fika la fora; ki omi ku bu pista kusa i na tisiu ki ropa fora.

¹² Si ki omi i koitadi, ka bu bai dita ku ki ropa inda na bu mon.

¹³ Ora ku sol na noti, sin falta bu ta tornal el, pa i pudi durmi ku si ropa, i bensuau. SIÑOR bu Deus ta oja kuma bu fasi un kusa ki diritu.

¹⁴ Ka bu splora un tarbajadur pobri ku ten falta, nin si i di Israel o i stranjeru ku mora na un di bu prasas.

¹⁵ Si i tarbaja pa bo, bu ta pagal na ki mesmu dia, antis di sol noti, pabia el i koitadi, i na pera risibi si diñeru. Si i ka ojal, i pudi coma pa SIÑOR kontra bo; bu ta ojadu ku pekadu.

¹⁶ Papes ka na matadu pabia di krimis di se fijus, nin fijus ka na matadu pa krimis di se papes; kada kin i na matadu pabia di si propi pekadu.

¹⁷ Ka bu nega fasi justisa sertu pa stranjerus ku orfans, nin ka bu seta pa viuva mpiñau si ropa.

¹⁸ Lembra di kuma bu seduba katibu na Ejitu, ma SIÑOR kaplintiu di la. E ku manda N na dau ordi pa bu fasi asin.

¹⁹ Ora ku bu na kebra na bu lugar, si bu diskisi di utru maradura, ka bu riba tras pa tomal; i na fika pa stranjeru, orfan ku viuva, pa SIÑOR bu Deus pudi bensuau na tudu bu tarbaju.

²⁰ Ora ku bu sakudi bu olivera, ka bu riba tras pa buska kilis ku kapliu; e ta fika pa stranjeru ku orfan ku viuva.

²¹ Ora ku bu kuji uvas na bu orta, ka bu riba tras pa buska kilis ku kapliu; e ta fika pa stranjeru ku orfan ku viuva.

²² Lembra di kuma bu seduba katibu na tera di Ejitu; e ku manda N na dau ordi pa bu fasi asin.