Ripitison di Lei 22 - BIBLIA - traduson antigu in Krioulo

Amor pa kumpañer

¹ Si bu oja turu o karnel di bu kumpañer i na yanda-yanda, ka bu finji kuma bu ka ojal; bu dibi di lebal pa bu kumpañer.

² Si kontra i ka mora pertu di bo, o bu ka sibi kin ki si dunu, bu ta tenel na bu kau te ora ku bu kumpañer bin buskal; bu ta ntregal el.

³ Mesmu kusa ku bu na fasi si bu oja buru di bu kumpañer, suma tambi si kamisa, o kualker kusa ki pirdi; ka bu finji kuma bu ka ojal.

⁴ Si bu oja buru di bu kumpañer kai na kamiñu, o si turu, ka bu finji kuma bu ka ojal, ma judal lantandal.

Utru leis

⁵ Minjer ka pudi bisti ropa di omi, nin omi ka pudi bisti ropa di minjer, pabia SIÑOR bu Deus i nuju algin ku fasil.

⁶ Si bu oja niñu di kacu na kamiñu, o na un po o na con, si mame sta riba di si fijus o ovus, ka bu tomal tudu ku si fijus.

⁷ Bu pudi toma fijus ma bu ten ku disa mame; asin kusas ta kuriu diritu, bu ta tene vida kumpridu.

⁸ Ora ku bu kumpu kasa nobu, bu ten ku taja kankra na roda, pa ka bu tisi kulpa di darmamentu di sangi riba di bu kasa si algin kapli la i kai.

⁹ Ka bu sumia dus koldadi simentera na bu orta di uva, pabia si bu fasil, uvas na sedu kontaminadu, suma tambi ki kusa ku bu sumia.

¹⁰ Ka bu junta buru ku turu pa e labra.

¹¹ Ka bu bisti ropa tisidu ku lan ku liñu tudu juntu.

¹² Fasi borlas na kuatru ponta di panu ku bu ta kubri ku el.

Kastigu pa pekadu seksual

¹³ Si un omi kasa minjer, i dita ku el, dipus i ka bin gosta del,

¹⁴ i papia mal kontra el, i disfamal, i fala: “Oca ku N toma e minjer, N ka ojal bajuda,”

¹⁵ pape ku mame di minjer e na toma lensol ku na proba kuma i seduba bajuda, e lebal pa garandis na porton di prasa.

¹⁶ Pape di minjer na fala garandis: “N da ña fiju pa i kasa ku e omi, ma omi ka bin gosta del,

¹⁷ i disfamal, i fala kuma i ka oja ña fiju bajuda, ma ali proba di kuma i ojal bajuda.” E na distindi ki lensol dianti di garandis di prasa.

¹⁸ Garandis na toma ki omi, e kastigal,

¹⁹ e pul paga multa di sen mueda di prata pabia i disfama un bajuda di Israel. E na da ki diñeru pa pape di minjer. Dipus i na fika ku ki minjer; i ka na pudi dispidil tok mortu rapati elis.

²⁰ Si ki kusa ku omi fala i bardadi, tambi si proba ka ojadu di kuma i ojadu bajuda,

²¹ e na leba minjer pa porta di kasa di si pape; omis di si prasa na dal ku pedra tok i muri, pabia i fasi kusa di borgoña na Israel, manera ki kai ku omi oca ki staba inda na kasa di si pape. Asin bu ta tira ki mal na bo metadi.

²² Si un omi pañadu cai ku minjer kasadu ku utru omi, elis tudu dus e na matadu. Asin bu ta tira e mal na tera di Israel.

²³ Si i ten un bajuda ku toma kumprumis pa kasa ku omi, si utru omi bin ojal na prasa, i dita ku el,

²⁴ bo na leba elis pa porton di ki prasa, bo da elis ku pedra tok e muri. Minjer na matadu pabia i staba na prasa ma i ka grita; omi na matadu pabia i abusa na minjer di si kumpañer. Asin bu ta tira ki mal na bo metadi.

²⁵ Si i la na matu ku omi oja bajuda ku sta pa kasa ku si omi, i pañal, i dita ku el, ki omi ku dita ku el, el son ku na muri.

²⁶ Ka bu fasi bajuda nada, pabia i ka fasi kusa ku na pul pa i matadu. E kasu i parsi ku kasu di omi ku lanta kontra si kumpañer i matal,

²⁷ pabia i na matu ku omi oja ki bajuda ku staba pa kasa. Bajuda grita, ma i ka ten ningin pa judal pa i kapli.

²⁸ Si un omi oja un bajuda ku ka ten kumprumis di kasamenti, i pegal, i dita ku el; si e bin pañadu,

²⁹ ki omi ku dita ku bajuda i na da pape di bajuda sinkuenta mueda di prata. I ten ku kasa ku bajuda pabia i abusa nel; nunka i ka pudi dispidil tok mortu rapati elis.

³⁰ Nin un omi ka dibi di toma minjer di si pape, pa ka tisi borgoña riba di si pape.