Ripitison di Lei 21 - BIBLIA - traduson antigu in Krioulo

Kasu di matadur diskuñisidu

¹ Si un omi ojadu mortu na matu, na tera ku SIÑOR bu Deus na dau pa bu yarda, sin i ka sibidu kin ku matal,

² bu garandis ku juisis na sai, e midi distansia di kau nunde ku kurpu dita nel te na prasas na roda.

³ Garandis di prasa ku fika mas pertu di ki difuntu e na toma un baka nobu ku nunka ka pudu kanga riba del pa i tarbaja,

⁴ e lebal na un kobon ku nunka ka labradu nin sumiadu, nunde ku yagu na lagua, e kebra si garganti.

⁵ Saserdotis di jorson di Levi na bin mati tambi, pabia SIÑOR bu Deus kuji elis pa e sirbil, pa e bensua na nomi di SIÑOR, tambi pa e julga tudu keŝas ku kasus di violensia, pa e toma disison.

⁶ Dipus, tudu garandis di ki prasa mas pertu di ki difuntu e nala ba se mon riba di ki baka ku kebradu si garganti na kobon,

⁷ e na diklara, e fala: “I ka no mon ku darma ki sangi, nin no uju ka ojal.

⁸ O SIÑOR, seta e sakrifisiu pa purdon di bu pobu Israel ku bu liberta; ka bu pui kulpa di sangi riba di bu pobu Israel di algin ku ka mersi muri.” Asin ki darmamentu di sangi ta purdadu,

⁹ ki kulpa ta tiradu riba di bos pabia bo fasi kil ki diritu na uju di SIÑOR.

Minjer ku prindidu na gera

¹⁰ Ora ku bu sai pa geria kontra bu inimigus, si SIÑOR bu Deus ntrega elis na bu mon, bu leba utru prezu,

¹¹ si bu oja un minjer bonitu na metadi di ki katibus, bu gosta del, bu pudi tomal pa i sedu bu minjer.

¹² Lebal pa bu kasa, nunde ki na rapa kabesa, i korta uñas,

¹³ i tira ropa ki bisti oca ki prindidu. Dipus di mora na bu kasa, i cora si pape ku mame un mis ntidu, bu pudi tomal, bu sedu si omi, el i ta sedu bu minjer.

¹⁴ Mas tardi, si bu ka bin kontinua gosta mas del, bu ten ku disal pa i bai pa nunde ki misti. Bu ka pudi bindil, nin bu ka na tratal suma katibu, pabia bu disonral.

Diritu di purmeru fiju

¹⁵ Si un omi tene dus minjer, i ama un ma i ka ama ki utru, elis tudu dus e padi fiju ku el, si purmeru fiju i di kil ki ka ama,

¹⁶ ora ki na ruma yardansa pa si fijus, i ka pudi pui purmeru fiju di ki minjer ki ama dianti di fiju di kil ki ka ama, ku sedu si purmeru fiju di bardadi.

¹⁷ I ten ku rikuñisi fiju di minjer ki ka ama suma si purmeru fiju, i dal dus bias mas di si rikesa di ki kil ki na da ki utru, pabia el ku sedu purmeru frutu di si forsa; diritu di purmeru fiju i di sil.

Fijus ku ka ta obi

¹⁸ Si algin tene un fiju rebeldi ku ta ntema dimas, ku ka ta obdisi si pape ku si mame; nin si i kastigadu, i ka ta obi,

¹⁹ si pape ku mame ten ku pegal, e lebal pa garandis na porton di prasa,

²⁰ e fala ki garandis: “E no fiju i rebeldi, kaba i ntemus, i ka ta obdisinu; son kume ku cami!”

²¹ Tudu omis di se prasa e na dal ku pedras tok i muri. Asin bu na tira ki mal na bo metadi; tudu jinti di Israel ku obi e noba e na medi.

Kadaveris ten ku tiradu na po

²² Si algin fasi un pekadu ku pul i mersi mortu, si i nforkadu na un po,

²³ si kurpu ka pudi durmi la. Bu ten ku nteral na ki mesmu dia, pabia kil ku pindradu na un po i sta bas di maldison di Deus. Asin, ka bu kontamina bu tera ku SIÑOR bu Deus dau pa bu yarda.