Ripitison di Lei 20 - BIBLIA - traduson antigu in Krioulo

Leis di gera

¹ Ora ku bu sai pa bai geria kontra bu inimigus, bu oja se kabalus ku karus, ku tropas mas ciu di ki di bo, ka bu ten medu delis, pabia SIÑOR bu Deus, ku tirau di tera di Ejitu, i sta ku bo.

² Antis di bo kumsa geria, saserdoti na bin pa frenti, i na papia ku tropas,

³ i fala elis: “Omis di Israel, bo sukuta. Aos bo na bai geria ku bo inimigus; ka bo pirdi animu; ka bo ten medu nin ka bo tirmi, nin ka bo panta se dianti,

⁴ pabia SIÑOR bo Deus, i el ku na bai ku bos pa geria kontra bo inimigus, pa da bos vitoria.”

⁵ Ŝefis di tropa na punta se jinti: “I ten omi li ku kumpu kasa nobu, i ka dedikal inda? Minjor i riba pa kasa, pa ka i bin bai muri na gera; utru algin ta dedikal.

⁶ O i ten tambi omi li ku paranta orta di uva, ku ka kume inda si fruta? Minjor i riba pa kasa, pa ka i bin bai muri na gera; utru algin ta fika i kumel.

⁷ O i ten tambi omi li ku tene kumprumis ku minjer, ma i ka kasa ku el inda? Minjor i riba pa kasa, pa ka i bin muri na gera; utru omi ta fika i kasa ku el.”

⁸ Ŝefis na punta inda: “I ten omi li kobardu, ku ten medu na si korson? Minjor i riba pa kasa, pa ka i pui si ermons sinti medu tambi na se korson.”

⁹ Ora ku ŝefis kaba papia, e na kuji utru ŝefis pa e bai dianti di tropas.

¹⁰ Ora ku bu ciga pa geria kontra un prasa, da elis oportunidadi di rindi, pa e pui pas.

¹¹ Si e seta, e ruspundiu ku pas, e yabriu porton, tudu jinti ku sta la e na sedu katibus pa tarbaja pa bo.

¹² Si e nega fasi pas ku bo, e ntema son pa geria, bu ta taja prasa.

¹³ Ora ku SIÑOR bu Deus ntregal na bu mon, mata ku spada tudu omis ku sta la.

¹⁴ Bu pudi toma minjeris, mininus ku limarias pa bo, ku tudu kusas ku sta na ki prasa. Usa rikesa di bu inimigus, ku SIÑOR bu Deus dau.

¹⁵ Asin ku bu na fasi ku tudu prasas ku sta lunju di bo, ku ka pertensi nasons pertu.

¹⁶ Na prasas di ki nasons ku SIÑOR bu Deus na dau pa bu yarda, bu ka na disa nada ku tene folgu ku vida.

¹⁷ Kaba ku elis tudu — eteus, amoreus, kananeus, perizeus, eveus ku jebuseus — suma ku SIÑOR bu Deus mandau,

¹⁸ pa ka e bin nsina bos fasi tudu kusas nujenti ke ta fasi pa se deusis; asin bo ta bin peka kontra SIÑOR bo Deus.

¹⁹ Ora ku bu taja un prasa pa manga di tempu, bu geria kontra el pa tomal, ka bu dana tudu si arvuris ku mancadu, pabia bu pudi kume se fruta. Asin ka bu korta elis. Nta arvuris e sedu omis, pa bu geria kontra elis?

²⁰ Arvuris ku bu sibi kuma e ka ta padi fruta ku ta kumedu, bu pudi dana elis, bu korta elis, pa monta elis kontra mura suma rampa di kamba pa ki prasa ku na geria kontra bo, tok bu batil.