Ripitison di Lei 19 - BIBLIA - traduson antigu in Krioulo

Prasas di rogu

¹ Dipus di SIÑOR bu Deus kaba ku ki nasons ki na dau se tera, tambi dipus di bu toma se prasas ku se kasas, bu mora nelis,

² bu na separa tris prasa, kada un na sentru di si area di tera ku SIÑOR bu Deus na dau pa bu tene.

³ Tera ku SIÑOR bu Deus na dau pa bu yarda, bu na rapatil na tris reẑion. Kumpu stradas pa ki tris prasa, pa tudu omi ku mata algin pudi kuri pa la.

⁴ Es i regra aserka di algin ku mata utru, i kuri pa la pa salba si vida: I ten ku sedu algin ku yara, i mata si kumpañer sin i ka tenelba na sintidu,

⁵ suma algin ku bai matu ku si kumpañer pa korta leña. I lambu mancadu ku ki forsa pa korta po; feru salta na kaku, i paña si kumpañer, i matal. Ki omi ten ku kuri pa un di ki prasas pa salba si vida.

⁶ Si bu ka toma ki midida, vingadur di sangi pudi serka ki omi nkuantu i ten raiba; si kontra kamiñu lunju dimas, i pudi pañal, i matal, sin i ka mersi muri, pabia i ka teneba nada na si sintidu kontra si kumpañer.

⁷ I pabia di kila ku N mandau separa tris prasa.

⁸ Si SIÑOR bu Deus aumenta bu terenu suma ki jurmenta pa bu papes, si i dau tudu tera ki fala i na da elis,

⁹ bu na buri separa mas tris prasa fora di ki purmerus. I na dau ki tera si bu obdisi tudu e mandamentus ku N na dau aos, bu pui elis na pratika, bu ama SIÑOR bu Deus, bu yanda sempri na si kamiñus.

¹⁰ Separa ki prasas pa ka darmadu sangi di algin ku ka kulpadu na tera ku SIÑOR bu Deus dau pa bu yarda, pa abo propi bu ka bin sedu kulpadu di darma sangi.

¹¹ Si algin ten odiu kontra si kumpañer, i montia manera di yangasal, i lanta pa el, i matal, i kuri pa un di ki prasas,

¹² garandis di si prasa e na manda buskal la, e ntregal na mon di vingadur di sangi pa kila matal.

¹³ Bu ka na purdal, ma bu na tira di Israel kulpa di darma sangi di algin ku ka kulpadu. Asin kusas na kuriu diritu.

Pedras di limiti di terenu

¹⁴ Ka bu mundanta pedra di frontera di terenu di bu visiñu, ku jinti di antigu pui, oca ke rapati con ku bu yarda na tera ku SIÑOR bu Deus na dau pa bu tene.

Tustumuñas

¹⁵ Un tustumuña son ka ciga pa kondena algin pa kualker ofensa o pekadu ki akusadu del, ma i pirsis dus o tris tustumuña pa proba kuma ki algin i kulpadu.

¹⁶ Si un tustumuña malvadu lanta kontra algin, i akusal di un krimi,

¹⁷ ki dus omi ku sta mitidu na ki kasu e na bai na pursensa di SIÑOR, dianti di saserdotis ku juisis ku na julga na ki tempu.

¹⁸ Juisis na punta diritu; si i ojadu kuma ki tustumuña i munturus, i konta son mintida kontra si ermon,

¹⁹ bu na fasil suma ki mistiba fasi si ermon. Asin bu ta tira ki mal na bo metadi.

²⁰ Restu di pobu na obi ki kusa, e na sinti medu; nunka mas e ka na fasi un kusa suma es na bo metadi.

²¹ Ka bu purdal; vida pa vida, uju pa uju, dinti pa dinti, mon pa mon, pe pa pe.