Ripitison di Lei 16 - BIBLIA - traduson antigu in Krioulo

Paskua

¹ Guarda festival di Paskua pa SIÑOR bu Deus na mis di Abib, pabia i na ki mis ki tirau di Ejitu di noti.

² Sakrifika karnel o baka di Paskua pa SIÑOR bu Deus na kau ki na kuji pa pui si nomi la.

³ Ka bu kume pon ku kumpudu ku fermentu juntu ku karni di Paskua, ma pa seti dia bu na kume pon sin fermentu, ku ta comadu pon di sufrimentu, pa bu pudi ba ta lembra sempri di ki dia ku bu sai kinti-kinti na tera di Ejitu.

⁴ Na ki seti dia i ka na ojadu nin fermentu na tudu bu tera; tambi karni ku bu sakrifika di tardi na purmeru dia i ka pudi sobra tok sol mansi.

⁵ Bu ka pudi sakrifika Paskua na kualker un di bu prasas ku SIÑOR bu Deus dau,

⁶ ma son na kau ku SIÑOR bu Deus na kuji pa pui si nomi la. La ku bu na sakrifika Paskua, di tardi, ora ku sol na noti, na aniversariu di bu saida di Ejitu.

⁷ Yasal, bu kume na kau ku SIÑOR bu Deus kuji; parmaña bu ta riba pa bu kau.

⁸ Duranti seis dia bu na kume pon ku ka tene fermentu; na setimu dia bu na tene juntamentu pa SIÑOR bu Deus; bu ka na fasi nin un tarbaju na ki dia.

Festival di kebur, di semanas o di Pentekostis

⁹ Disna di dia ku bu pui ŋoroto na kebur, kumsa fasi konta di seti semana.

¹⁰ Dipus bu ta fasi festival di semanas pa SIÑOR bu Deus, bu leba oferta di bu libri vontadi, konformi benson ku SIÑOR bu Deus bensuau ku el.

¹¹ Abo, bu fijus macu ku femia, bu katibus macu ku femia ku levita ku sta na bu prasa, ku stranjeru ku orfan ku viuva ku sta na bu kau, bo ta kontenti dianti di SIÑOR bu Deus na kau ki kuji pa pui si nomi la.

¹² Lembra kuma bu seduba katibu na Ejitu, bu obdisi tudu e regras.

Festival di barakas

¹³ Dipus di bu kaba masa miju, bu pirmi uvas, bu ta guarda festival di barakas pa seti dia,

¹⁴ bu kontenti na ki festival, abo ku bu fijus macu ku femia, bu katibus macu ku femia, ku levita, stranjeru, orfan ku viuva ku sta na bu prasa.

¹⁵ Bu na guarda seti dia di festival pa SIÑOR bu Deus na kau ki na kuji, pabia SIÑOR bu Deus na bensuau na tudu bu kebur ku tudu bu tarbaju; pa kila bu dibi di sta kontenti.

¹⁶ Tudu omi ten ku pursenta dianti di SIÑOR bu Deus tris bias kada anu, na kau ku SIÑOR kuji: na festival di pon sin fermentu, festival di semanas ku festival di barakas. E ka na pursenta na ki festival dianti di SIÑOR mon limpu.

¹⁷ Kada kin i na leba oferta konformi benson ku SIÑOR Deus dal.

Juisis

¹⁸ Pui juisis ku funsionarius pa kada jorson na porton di tudu prasas ku SIÑOR bu Deus dau, pa e julga pobu ku justisa.

¹⁹ Ka bu tursi justisa, ka bu fasi skuju di jinti, nin ka bu seta suku di bas, pabia suku di bas ta sega uju di jinti jiru, i ta tursi palabra di justus.

²⁰ Justisa diritu, el son ku bu na fasi, pa bu pudi vivi, bu kontinua tene bu yardansa na tera ku SIÑOR bu Deus na dau.

²¹ Ka bu firmanta kualker po dedikadu pa Aserá lungu di altar ku bu kumpu pa SIÑOR bu Deus,

²² nin ka bu lantanda kuluna sagradu, pabia SIÑOR bu Deus nuju ki kusas.