Ripitison di Lei 15 - BIBLIA - traduson antigu in Krioulo

Anu di diskansu

¹ Na kabantada di kada seti anu bu ta purda dibidas.

² Asin ki na fasidu: Si algin pistaba si kumpañer o si ermon un kusa, i ten ku purdal, i ka na kobral el, pabia purdon di SIÑOR i anunsiadu.

³ Bu pudi kobra stranjeru dibida, ma kil ku bu ermon dibiu, bu ta purdal el.

⁴ I ka dibi di ten koitadi na bo metadi, pabia SIÑOR bu Deus na bensuau ciu na tera ki na dau pa bu tenel suma yardansa,

⁵ si bu pui sintidu pa obdisi palabra di SIÑOR bu Deus, bu pratika ku mpeñu tudu e mandamentus ku N na dau aos.

⁶ SIÑOR bu Deus na bensuau suma ki fala; asin bu na pista pa manga di nason, ma abo bu ka na pista di ningin. Bu na manda riba di manga di nason, ma elis e ka na manda riba di bo.

⁷ Si i ten un koitadi na metadi di bu ermons israelita na kualker prasa di tera ku SIÑOR bu Deus na dau, ka bu ndurusi bu korson, nin ka bu fasi risu mon pa bu ermon koitadi,

⁸ ma yabri bu mon diritu pa el, bu pistal, di bon vontadi, tudu kil ki pirsisa del.

⁹ Toma sintidu pa ka da lugar pa un pensamentu malvadu, pa bu fala: “Setimu anu, ku sedu anu di purda dibida, i sta ja pertu;” asin bu jubi bu ermon koitadi ku mau rostu, bu ka dal nada. Si i coma pa SIÑOR kontra bo, bu na ojadu kulpadu di pekadu.

¹⁰ Dal ku mon abertu; ka bu miskiña na bu korson ora ku bu na dal. Si bu da di bon korson, SIÑOR bu Deus na bensuau na tudu kil ku bu na fasi ku bu mon.

¹¹ Sempri i na ten jinti koitadi na metadi di Israel. E ku manda N dau ordi, N falau: Yabri diritu bu mon pa bu ermon ku ten falta, kil ki koitadi na bu tera.

Libertason di katibus

¹² Si bu kumpra un israelita, omi o minjer, pa i sedu bu katibu, i na sirbiu pa seis anu, ma na setimu anu bu na largal.

¹³ Ora ku bu na dispidil, ka bu mandal mon limpu.

¹⁴ Yabri bu mon bu dal un parti di kil ku SIÑOR bu Deus bensuau ku el, di limaria, biñu ku miju.

¹⁵ Lembra kuma bu seduba katibu na tera di Ejitu, ma SIÑOR bu Deus libertau di la. E ku manda N na dau e ordi aos.

¹⁶ Si bu katibu falau kuma i ka misti sai na bu mon, pabia i amau ku bu familia, i sinti kuma i sta diritu na bu mon,

¹⁷ bu ta toma guja gros, bu fural oreja kontra porta; i ta sedu bu katibu pa sempri. Bu ta fasi mesmu kusa ku katibu femia.

¹⁸ Ka bu oja kuma i kansadu pa bu larga bu katibu, pabia, na ki seis anu, ki tarbaju ki fasi pa bo i bali dus bias mas di ki tarbaju di algin ku bu na paga. Si bu largal, SIÑOR bu Deus na bensuau na tudu ku bu na fasi.

Purmeru fijus di limarias

¹⁹ Tudu limaria macu ku sedu purmeru fiju di si mame, na metadi di bu bakas ku karnel, bu na pul aparti pa SIÑOR bu Deus. Turu ku sedu purmeru fiju di si mame, bu ka na pul tarbaja, nin bu ka na tiskia purmeru fiju di bu karnel.

²⁰ Kada anu abo ku bu familia bo na kume elis dianti di SIÑOR bu Deus na kau ki na kuji.

²¹ Ma si i tene kualker difeitu, si i manku o segu, o i tene kualker utru difeitu, ka bu sakrifikal pa SIÑOR bu Deus.

²² Bu pudi kumel na bu prasa; algin puru ku kil ki ka puru pudi kumel, suma ora ke na kume gazela.

²³ Ka bu kume si sangi; bu na darmal na con suma yagu.