Ripitison di Lei 14 - BIBLIA - traduson antigu in Krioulo

Leis pa pobu di Deus

¹ Bo sedu fijus di SIÑOR bo Deus. Ka bo laña bo kurpu, nin ka bo rapa kabelu na parti di frenti di bo kabesa pabia di algin ku muri.

² Abos i pobu sagradu pa SIÑOR bo Deus. SIÑOR kuji bos di tudu rasas na mundu pa bo sedu si pobu spesial.

Limarias ku dibi di kumedu ku kilis ku ka dibi di kumedu

³ Ka bo kume nin un kusa nujenti.

⁴ Esis i limarias ku bo pudi kume: Baka, karnel, kabra,

⁵ gazela, frintamba, bufalu, kabra-matu, baka di yagu, turu brabu ku antilopi.

⁶ Bo pudi kume tudu limarias ku tene uña findidu na dus, ku ta rumina.

⁷ I ten utrus ku ta rumina, o e tene uña findidu, ku bo ka dibi di kume, ku sedu kamelu, lebri ku kueliu, pabia e ta rumina ma e ka tene uña findidu. E ka sedu puru pa bos.

⁸ Purku tambi i ka puru pa bos; i tene uña findidu ma i ka ta rumina. Ka bo kume karni de limarias ku kaba di comadu, nin ka bo toka na se kadaver.

⁹ Na metadi di tudu limarias ku ta vivi na yagu, bo pudi kume kil ku tene barbatanas ku skama.

¹⁰ Ma tudu kil ku ka tene barbatanas tudu ku skama, ka bo kumel; i ka puru pa bos.

¹¹ Bo pudi kume tudu kacu puru,

¹² ma esis i kilis ku bo ka dibi di kume: Agia, kebrantós, mañoti,

¹³ jugude, pega, tudu koldadi falkon,

¹⁴ tudu koldadi korvu,

¹⁵ avestruz, moŝu, kuku, tudu koldadi gavion,

¹⁶ bufu, kuruẑa, gralia,

¹⁷ sisni, pilikanu, korvu di mar,

¹⁸ segoña, tudu koldadi garsa, popa ku mursegu.

¹⁹ Tudu insetu ku ta bua i ka puru pa bos, i ka pudi kumedu,

²⁰ ma bo pudi kume insetus ki puru.

²¹ Limaria ku muri sin i ka matadu, bo pudi dal pa kualker stranjeru ku sta na bo prasa, pa i kumel, o bo pudi bindil pa un ospri, ma ka bo kumel, pabia bo sedu pobu sagradu pa SIÑOR bo Deus. Ka bo kusña kabritu ku liti di si mame.

Dizimus

²² Kada anu bu ten ku separa un desimu parti di tudu prudutu di bu labur.

²³ Bai dianti di SIÑOR bu Deus na kau ki kuji pa pui si nomi la, bu kume dizimu di bu miju, bu biñu nobu ku bu azeiti, ku purmeru fijus di bu baka ku karnel, pa bu bin sibi rispita SIÑOR bu Deus sempri.

²⁴ Si kau ku SIÑOR bu Deus na kuji pa pui si nomi la fika lunju di bu kasa, si SIÑOR bu Deus bensuau tok bu ka pudi karga tudu ki dizimu na ki kamiñu kumpridu,

²⁵ bu pudi bindil, bu leba diñeru na mon, bu bai pa ki kau ku SIÑOR bu Deus kuji.

²⁶ Si bu ciga la, bu pudi kumpra tudu kusa ku bu misti ku ki diñeru, suma bakas, karnel, biñu ku bibida forti, ku tudu utru kusas ku bu dija. Asin bu ta kumel la dianti di SIÑOR bu Deus, bu kontenti, abo ku bu familia.

²⁷ Ka bu diskisi di levita ku sta na bu prasa, pabia i ka tene terenu nin yardansa suma ku bu tene.

²⁸ Na kabantada di kada terseru anu bu ta tira tudu dizimus di bu kebur na ki mesmu anu, bu rakadal dentru di bu prasa.

²⁹ Utru jinti ku sta na bu prasa, suma levita ku ka tene terenu nin yardansa suma ku bu tene, ku stranjeru ku orfan ku viuva, e ta bin kume, e farta, pa SIÑOR bu Deus pudi bensuau na tudu tarbaju ku bu na fasi.