Ripitison di Lei 13 - BIBLIA - traduson antigu in Krioulo

Kastigu pa adoraduris di idulus

¹ Ora ku un anunsiadur o suñadur lanta na bo metadi, i anunsia bos un sinal o milagri

² ku bin sedu suma ki fala, si i bin fala bos pa bo bai tras di utru deusis ku bo ka kunsi, pa adora elis,

³ ka bo sukuta palabra di ki anunsiadur o suñadur. SIÑOR bo Deus na proba bos, pa sibi si bo amal ku tudu bo korson ku alma.

⁴ Son tras di SIÑOR bo Deus ku bo na yanda; i el ku bo na rispita, i si mandamentus ku bo na obdisi, si palabra ku bo na obi, i el son ku bo na ciga pertu del pa sirbi.

⁵ Ki anunsiadur o suñadur ten ku matadu, pabia i fala bos pa bo ravolta kontra SIÑOR bo Deus, kil ku tira bos di Ejitu, i liberta bos di tera di katiberasku; ki algin buska disvianta bos di kamiñu ku SIÑOR bo Deus manda bos pa bo yanda nel. Asin bo dibi di tira ki mal na bo metadi.

⁶ Si bu ermon ku bu junta mame ku el, o bu fiju macu o femia, o bu minjer ku bu ama, o bu amigu di korson, misti cuciu, i falau na sigridu: “Bin no bai adora utru deusis” (deusis ku nin abo nin bu papes ka kunsi,

⁷ deusis di jinti ku sta na bo roda, pertu o lunju, di un ladu di tera pa utru),

⁸ ka bu seta si palabra nin ka bu obdisil. Ka bu ten pena del nin ka bu jubi jitu di salbal, nin di sukundil.

⁹ Bu ten ku matal; bu mon na sedu purmeru kontra el pa matal, dipus mon di tudu pobu.

¹⁰ Dal ku pedras tok i muri, pabia i buska lunjusiu di SIÑOR bu Deus ku tirau di Ejitu, di tera di katiberasku.

¹¹ Asin tudu Israel na obi, e na sinti medu; ningin na bo metadi ka na torna fasi un kusa mau suma kila.

¹² Si bu obi jinti na papia di un di bu prasas ku SIÑOR bu Deus dau pa bu mora nel,

¹³ e fala kuma omis malvadu lanta na bo metadi, e cuci moraduris di prasa, e fala elis: “Bo bin no bai adora utru deusis” (ku nunka bo ka kunsi),

¹⁴ bu ta punta-punta diritu pa bu pudi sibi. Si kontra bu ten proba sertu kuma i bardadi ku ki kusa nujenti fasidu na bo metadi,

¹⁵ bu ten ku toma spada, bu mata tudu jinti ku mora na ki prasa, bu kaba ku prasa ku tudu kusas ku sta nel, te ku limarias.

¹⁶ Junta tudu rikesa na metadi di prasa, bu kema prasa ku tudu si rikesas tok i kaba, suma oferta ku kemadu pa SIÑOR bu Deus. I na fika danadu pa sempri; i ka na kumpudu mas.

¹⁷ Nada di ki kusas ku kondenadu pa danadu ka na ojadu na bu mon. Asin raiba di SIÑOR na para yardi; i na ten pena di bo, i mostrau si miserikordia, i fasiu pa bo ciu, suma ki jurmenta pa bu papes,

¹⁸ si bu obdisi palabra di SIÑOR bu Deus, ku tudu si mandamentus ku N na dau aos, bu fasi kil ki diritu dianti di SIÑOR bu Deus.