Ripitison di Lei 12 - BIBLIA - traduson antigu in Krioulo

I SIÑOR ku na kuji kau di kultu

¹ Esis i regras ku leis ku bo ten ku toma sintidu pa obdisi tudu tempu ku bo na sta na ki tera ku SIÑOR Deus di bo papes da bos pa bo tene.

² Bo ten ku dana-dana tudu lugaris nunde ku jinti ku bo na bai toma se tera ta adora se deusis, riba di montañas altu, ku montisiñus, ku bas di tudu arvuris garandi.

³ Bo na durba se altaris, bo kebra se kulunas sagradu, bo kema se idulus di Aserá na fugu, bo bati tambi imaẑens labradu di se deusis, pa se nomi ka comadu mas na ki kau.

⁴ Ka bo adora SIÑOR bo Deus suma ke ta adora se deusis,

⁵ ma bo na buska kau ku SIÑOR bo Deus kuji na metadi di tudu bo jorsons pa pui si moransa ku si nomi; i la ku bo dibi di bai,

⁶ bo leba bo ofertas kemadu, bo sakrifisius, bo dizimus, bo ofertas spesial, kil ku bo fala bo na da, kil ku bo na da di libri vontadi, ku purmeru fijus di bo bakas ku bo karnel.

⁷ Bo na kume la, abos ku bo familias, dianti di SIÑOR bo Deus, bo kontenti ku frutu di bo tarbaju, pabia SIÑOR bo Deus bensua bos.

⁸ Ka bo bai fasi na ki tera suma ku no na fasi li aos, manera ku kada kin ta adora Deus na manera ki misti,

⁹ pabia te gosi bo ka yentra na diskansu nin na yardansa ku SIÑOR bo Deus na da bos.

¹⁰ Bo na kamba Jordon pa bai mora na tera ku SIÑOR bo Deus na fasi bos pa bo yarda. El i na da bos diskansu di tudu bo inimigus ku sta na bo roda; asin bo na mora suguru.

¹¹ SIÑOR bo Deus na kuji un kau nunde ku si nomi na sta nel; i la na ki kau ku bo na leba tudu ku N manda bos: bo ofertas kemadu, bo sakrifisius, bo dizimus, bo ofertas spesial, ku tudu kusas di balur ku bo fala bo na da SIÑOR.

¹² Bo kontenti dianti di SIÑOR bo Deus, abos ku bo fijus macu ku femia, ku bo katibus macu ku femia, ku levita ku sta na bo prasa, pabia el i ka tene terenu nin yardansa.

¹³ Toma sintidu pa ka bu pursenta bu ofertas kemadu na kualker kau ku bu misti,

¹⁴ ma son na kau ku SIÑOR kuji na tera di un di bu jorsons. I la ku bu na pursenta bu ofertas kemadu, bu fasi tudu kil ku N mandau.

¹⁵ Bu pudi mata limaria na kualker di bu prasas, bu kume tudu karni ku bu misti, konformi benson ku SIÑOR bu Deus dau. Algin puru ku kil ki impuru e pudi kumel, suma i karni di gazela o kabra-matu,

¹⁶ ma ka bu kume sangi; bu ten ku darmal na con suma yagu.

¹⁷ Ka bu kume dizimu di bu miju na bu prasas, nin dizimu di biñu nobu nin di azeiti, nin purmeru fiju di bu baka nin di karnel, nin kualker oferta ku bu fala bu na da, nin oferta spesial, nin kil ku bu na da di libri vontadi.

¹⁸ Bu na kume ki kusas dianti di SIÑOR bu Deus na kau ku el i kuji, bu kontenti ku frutu di bu tarbaju, abo ku bu fijus macu ku femia, ku bu katibus macu ku femia, suma tambi levita ku sta na bu prasa.

¹⁹ Toma sintidu pa ka bu diskisi di jubi levita; bu dal kil ki di sil nkuantu bu na vivi na bu tera.

²⁰ Ora ku SIÑOR bu Deus aumenta bu terenu suma ki purmitiu, si bu sinti kuma bu misti karni pa kume, bu fala: “N dija kume karni,” bu pudi kumel konformi ku bu misti.

²¹ Si bu mora lunju di kau ku SIÑOR bu Deus kuji pa pui si nomi la, bu pudi mata baka o karnel ku SIÑOR dau, suma ku N mandau; bu pudi kume karni na bu prasa, konformi bu misti.

²² Kumel suma ku bu ta kume gazela o kabra-matu. Algin puru, o nin si i impuru, i pudi kumel.

²³ Toma sintidu son pa ka kume sangi, pabia i vida; bu ka pudi kume karni tudu ku si vida.

²⁴ Asin, ka bu kume sangi, ma darmal na con suma yagu.

²⁵ Ka bu kumel, pa kusas pudi kuriu diritu, ku bu fijus dipus di bo, pabia bu na fasi diritu dianti di SIÑOR.

²⁶ Bu kusas sagradu, ku ofertas ku bu fala bu na da, bu na leba elis na kau ku SIÑOR kuji.

²⁷ Pursenta bu limarias pa ofertas kemadu, karni ku sangi, riba di altar di SIÑOR bu Deus. Sangi di utru sakrifisius na darmadu riba di altar di SIÑOR bu Deus, ma karni, bu pudi kumel.

²⁸ Toma sintidu pa obdisi tudu regras ku N na dau, pa tudu kuriu sempri ben, ku bu fijus dipus di bo, pabia bu na fasi kil ki diritu i bon dianti di SIÑOR bu Deus.

²⁹ SIÑOR bu Deus na kaba ku ki nasons ku bu na yentra pa toma se tera pa mora nel.

³⁰ Ora ke kabadu ku el bu dianti, toma sintidu pa ka bin pañadu na lastru di se kustumus. Ka bu buska sibi aserka di se deusis, bu punta: “Kuma ku e jinti ta adoraba se deusis? N na fasi tambi suma elis.”

³¹ Ka bu adora SIÑOR bu Deus di ki manera ke ta adoraba se deusis, pabia e fasiba tudu kusa nujenti ku SIÑOR ka gosta del; te se fijus macu ku femia, e kema elis na fugu suma sakrifisiu pa se deusis.

³² Ba ta obdisi tudu ku N mandau; ka bu buri nada riba del nin ka bu rapatil.