Oseias 9 - BIBLIA - traduson antigu in Krioulo

Oseias fala di kastigu pa Israel

¹ Israel, ka bu kontenti tok bu jukuta, suma utru nasons, pabia bu bai suma minjer di mau vida, bu disa bu Deus. Bu ama pagamentu di bu mau vida na tudu kau di masa trigu.

² Miju ku uvas ka na ciga pa pobu; e ka na tene biñu.

³ E ka na fika na tera di SIÑOR, ma Efrain na riba pa Ejitu, i na kume kumida impuru na Asiria.

⁴ E ka na darma oferta di biñu pa SIÑOR, nin e ka na lebal sakrifisius ku ta kontental. Se kumida na sedu suma pon di cur pa elis; tudu algin ku kumel i na fika impuru. Se kumida na sedu son pa mata fomi; i ka na lebadu pa kasa di SIÑOR.

⁵ Ke ku bo na fasi na dia di festival, ki dia di festival di SIÑOR?

⁶ Jinti na kuri pa kapli ku se vida; Ejitu na risibi elis — son pa ntera elis na Memfis! Se rikesas di prata ku se moradias, pe di fidida ku paja brabu na toma konta delis.

⁷ Dia di kastigu ciga, dia pa kada kin risibi ke ki mersi. Si i ciga, Israel na sibi! Anunsiadur ta tratadu suma tulu; omi ku nspiradu i ta tratadu suma dudu. Bu pekadu ciu; e ku manda bu ten odiu garandi.

⁸ Deus manda anunsiadur pa i avisa Efrain, ma armadilias na peral na tudu kamiñu ki ta yanda nel, ku inimisadi na kasa di si Deus.

⁹ E murguja na kurupson, suma na dias di Jibeá. Deus na lembra di se maldadi, i na kastiga se pekadus.

¹⁰ Deus fala: “Purmeru dia ku N oja Israel, i suma ora ku algin oja uvas na lala; N oja bo papes, N kontenti ku elis, suma ora ku algin oja purmeru figu kusidu, ma e bai pa Baal-Peor, e dedika pa ki kusa di borgoña; e bida nujenti suma ki kusa ke ama.

¹¹ Gloria di Efrain na bua suma kacu; minjeris ka na preña, e ka na padi; fijus ka na ten.

¹² Mesmu ke ciga di kria se fijus, N na roba elis, pa ka i fika nin un son. Ai delis ora ku N bandona elis!

¹³ N oja Efrain, suma Tiru, parantadu na un kau bonitu, ma Efrain na leba si fijus pa e matadu.”

¹⁴ O SIÑOR, da elis — ma ke ku bu na da elis? Bu ta pui elis pa se bariga ba ta sai, pa se mama fika seku.

¹⁵ Deus fala: “Se maldadi kumsa na Jilgal; la ku N kumsa ten odiu delis. Pabia di kusas mau ke fasi, N na tira elis fora di ña kasa. N ka na ama elis mas; tudu se ŝefis sedu rebeldi.

¹⁶ Efrain i suma planta ku tene duensa; si rais seku; i ka na padi frutu. Mesmu ke bin padi, N na mata ki fijus ke ama ciu.”

¹⁷ Ña Deus na nega elis pabia e ka obdisil. E na yanda-yanda na metadi di nasons.