Oseias 8 - BIBLIA - traduson antigu in Krioulo

Kastigu pa Israel

¹ SIÑOR fala: “Pui boka na korneta pa tokal. Inimigu na bin suma agia kontra kasa di SIÑOR, pabia ña pobu kebra ña kontratu, e ravolta kontra ña lei.

² E ta coman, e fala: ‘No Deus, anos, Israel, no kunsiu!’

³ Ma Israel nega kil ki bon; asin inimigu na pirsigil.

⁴ Elis e pui reis riba delis, ma i ka ami ku da elis ordi; e kuji ŝefis, e ka kontan. E fasi idulus pa se kabesa ku se prata ku uru; pabia di kila e na kabadu ku el.

⁵ O Samaria, bu idulu di baka na fedi pa mi. Ña raiba na yardi kontra kilis ku ta ronial. Kal dia ke na limpa se vida, pa e ojadu sin kulpa?

⁶ Ki idulu, i son di Israel; i un omi di jitu di la ku kumpul; i ka Deus. I na kebradu padas padas, ki baka di Samaria!

⁷ “E ta sumia bentu, e ta kebra turbada. Kebur ka ten; pe di miju ka pudi padi; asin i ka na ten foriña. Ma nin si i tenba, stranjerus na ngulilba.

⁸ Israel ngulidu; gosi i sta na metadi di nasons suma puti ku kebra, ku ningin ka misti.

⁹ Suma buru di matu ku ta yanda el son, asin ku Efrain bai pa Asiria. I bindi si kurpu pa si amantis.

¹⁰ Mesmu ke bai ku diñeru pa manga di nason, ami N na junta elis. E kumsa ja na rapati, pabia di rei garandi ku na kalka elis.

¹¹ “Efrain, na si pekadu, i buri kumpu manga di altar, ma ki altaris bin bida pekadu pa el.

¹² N skirbi elis manga di kusa di ña lei, ma e tenel suma kusa strañu.

¹³ Ki sakrifisius ke ta patin, e ta mata elis, e kume karni, ma ami, SIÑOR, N ka na seta elis. N na lembra di se maldadi, N na kastiga se pekadus. E na riba pa Ejitu.

¹⁴ Israel diskisi di si Kriadur, i kumpu palasius; Judá kumpu manga di prasa fortifikadu, ma N na manda fugu riba di se prasas ku na kaba ku se palasius.”