Oseias 6 - BIBLIA - traduson antigu in Krioulo

Ripindimentu finjidu di pobu

¹ Jinti fala: “Bo bin, no riba pa SIÑOR, pabia i padasanu, ma i na kuranu; i molostanu ma i na mara no caga.

² Dipus di dus dia i na danu vida; na terseru dia i na tornanu suma ku no staba, pa no pudi vivi si dianti.

³ No ba ta kunsi SIÑOR; no bai dianti pa no pudi kunsil mas diritu. Si saida i sertu suma sol di mandrugada; i na bin pa nos suma cuba, ki purmeru cuba ku ta regua con.”

⁴ SIÑOR punta: “Ke ku N na fasi ku bo, Efrain? Judá, ke ku N na fasi ku bo? Bo amor i suma nuven di parmaña, i suma serenu di mandrugada ku ta pasa sedu.

⁵ N pui ña palabra na boka di anunsiaduris pa e avisa bos di kastigu ku mortu. Ña lei i klaru suma lus.

⁶ Kusa ku N mas misti i miserikordia, i ka sakrifisiu. N mas misti pa bo kunsin te pa bo kema ofertas pa mi.

⁷ Ma elis e kebra kontratu suma Adon; e sedu infiel kontra mi.

⁸ Jilead i prasa di jinti ku ta fasi mal; manca di sangi sta nel.

⁹ Kompañia di saserdotis ku ta mata na kamiñu di Siken e sedu suma grupu di bandidus ku monta mboskada pa un omi; asin ke ta pratika kusas nujenti.

¹⁰ N na oja un kusa meduñu na Israel: Efrain miti na mau vida; Israel sta kontaminadu.

¹¹ “Abo tambi, Judá, i markadu un kebur di kastigu pa bo.