Oseias 4 - BIBLIA - traduson antigu in Krioulo

SIÑOR akusa Israel

¹ Abos, fijus di Israel, bo obi palabra di SIÑOR, pabia SIÑOR tene un kusa kontra bos ku mora ne tera. I fala: “I ka ten bardadi nin amor ne tera, nin jinti ku ta rikuñisi Deus.

² Kusa ku ten nel i son kebra juramentu, konta mintida, mata, furta, pekadu seksual ku violensia. E na darma sangi tudu dia.

³ E ku manda tera na seku; jinti ku mora nel na magru; elis tudu ku limarias di matu, ku kacus ku ta bua, te ku pis di mar, e na muri.

SIÑOR akusa saserdotis

⁴ “Ningin ka dibi di tisi keŝa, nin pa raprindi utru algin. Abo, saserdoti, ña keŝa i kontra bo.

⁵ Bu ta da tapada di dia ku di noti; anunsiadur ta da tapada juntu ku bo. N na kaba ku bu mame, Israel.

⁶ Ña pobu kabadu ku el pa falta di kuñisimentu. Suma ku bu nega kuñisimentu, ami tambi N negau pa bu ka sedu saserdoti ña dianti. “Suma ku bu diskisi di lei di bu Deus, ami tambi N na diskisi di bu fijus.

⁷ Mas ku saserdotis buri, mas ke peka kontra mi. N na muda se onra pa borgoña.

⁸ Suma ku pekadu di ña pobu ta da elis bon purbitu, saserdotis ta ten forti diseẑu pa kilas kontinua na maldadi.

⁹ Pabia di kila, saserdoti na kastigadu suma pobu. N na kastigal konformi si kamiñus, N pagal pa kusas ki fasi.

¹⁰ E na kume ma e ka na farta; e na miti na pekadu seksual ma e ka na padi, pabia e bandona SIÑOR, e bai tras di utru deusis.

¹¹ “Biñu, nobu ku beju, i ta tira ntindimentu di ña pobu.

¹² E ta bai pidi konsiju na se idulu di madera; po ta da elis rasposta! Elis e disvia, e bandona Deus. Suma ku minjer ta yentra na mau vida, asin tambi e nganadu, e bai tras di utru deusis.

¹³ E ta sakrifika limarias riba di montañas, e kema nsensu riba di montis, bas di arvuris garandi ku tene bon sombra, pabia la i kau sabi. E ku manda bo fijus femia ta bindi se kurpu; minjeris di bo fijus ta dita ku utru omis.

¹⁴ “N ka na kastiga bo fijus femia ku ta bindi se kurpu, nin minjeris di bo fijus ku ta dita ku utru omis, pabia omis propi ta bai pa minjeris ku ta bindi kurpu, e ta sakrifika juntu ku elis na balobas. Un pobu ku ka ten ntindimentu na tene vida tarpajadu.

¹⁵ “Abo, Israel, nin ku bu misti yanda na mau vida, ka bu pui Judá pa i sedu kulpadu; ka bo bin pa Jilgal, nin pa Bet-Aven, nin ka bo jurmenta pa vida di SIÑOR.

¹⁶ Israel sedu ntemus suma baka. Kuma gora ku SIÑOR pudi bakial suma i na bakia un fiju di karnel na un kampada garandi?

¹⁷ Efrain sta ja mitidu na kusa di idulus; disal!

¹⁸ Ora ke kaba bibi, e ta pega na mau vida. Se ŝefis gosta di borgoña.

¹⁹ Urdumuñu na leba elis; e na fika ku borgoña pabia di se sakrifisius.