Oseias 2 - BIBLIA - traduson antigu in Krioulo

¹ Bo fala bo ermons: “Abos i ña pobu;” bo fala bo irmas: “Abos i amadu.”

Gomer infiel, Israel infiel

² Bo pidi bo mame; el i ka sedu ja ña minjer, nin ami N ka sedu si omi, ma bo pidil pa i lunjusi si mau vida di si rostu, i tira si amantis na metadi di si pitu.

³ Si i ka asin, N na disal nun suma na dia ki padidu; N na fasil suma un lala, pa i parsi suma tera seku; N na matal ku sedi.

⁴ N ka na mostra amor pa si fijus, pabia e sedu fijus di algin di mau vida.

⁵ Se mame bindi si kurpu pa utru omis, ku padi elis; i fika i na yandaba na borgoña. I fala: “N na bai tras di ña amantis, ku ta dan ña pon ku yagu, ña lan ku liñu, ña azeiti ku bibidas.”

⁶ Ami N na tajal kamiñu ku pe di fidida. N na lantanda paredi di sibi pa i ka pudi oja kamiñu.

⁷ I na kuri tras di si amantis, ma i ka na paña elis; i na buska elis ma i ka na oja elis. Dipus i na fala: “N na riba pa ña purmeru omi, pabia na ki tempu N staba diritu mas di ki gosi.”

⁸ I ka rikuñisi kuma i ami ku dal miju, biñu nobu ku azeiti; i ami ku dal manga di prata ku uru, ke usa pa Baal.

⁹ Asin, N na tira ña miju ora ki kusidu; N na tira ña biñu nobu ora ku uva kusidu. N na tiral ña lan ku ña liñu ku N dal pa i kubri ku el.

¹⁰ N na dispil pa mostra si borgoña dianti di si amantis; ningin ka na libral na ña mon.

¹¹ N na kaba ku tudu si gozu: si festivalis anual ku di lua nobu, si dias di diskansu — tudu si kultus.

¹² N na dana si pes di uva ku si figeras, ki ta fala kuma kilas i ke ku si amantis pagal. N na fasi elis un matu ficadu; limarias di matu na kume elis.

¹³ N na kastigal pabia di ki dias ki kema nsensu pa Baal; i faja si kurpu ku brinkus ku fius di garganti, i bai tras di si amantis, i diskisi di mi. Asin ku SIÑOR fala.

Amor di SIÑOR pa si pobu

¹⁴ N na atrail, N lebal pa lala, N bai papia diritu ku el.

¹⁵ N na tornal si ortas di uva; N na fasi kobon di Akor porta di speransa. I na kanta la, suma na dias di si nobresa, suma tambi na ki dia ki sai na tera di Ejitu.

¹⁶ SIÑOR fala: “Na ki dia i na coman ‘ña omi’; i ka na coman mas ‘ña Baal’.

¹⁷ N na tira nomis di Baalis na si boka; se nomis ka na comadu mas.

¹⁸ Na ki dia N na fasi kontratu pa elis ku limarias di matu ku kacus ku ta bua, ku limarias ku ta rasta na con. N na tira mansasa ku spada ku gera na tera pa e pudi dita e durmi suguru.

¹⁹ N na fasiu ña minjer pa sempri; N na tomau na bardadi, N sedu fiel pa bo, N mostrau amor ku miserikordia.

²⁰ N na guarda ña purmesa pa bo pa bu sedu di mi; bu na rikuñisin suma SIÑOR.

^21-22 “Na ki dia ami, SIÑOR, N na ruspundi Jizreel, N na papia ku seu, i na ruspundi, i manda cuba na tera; tera na ruspundi, i pruduzi trigu, uvas ku azeitonas.

²³ N na parantal pa mi na tera. N na ten amor pa Lo-Ruama; N na fala Lo-Ami: ‘Abo i ña pobu.’ El i na falan: ‘Abo i ña Deus!’ ”