Oseias 14 - BIBLIA - traduson antigu in Krioulo

Oseias konsija Israel

¹ O Israel, riba pa SIÑOR bu Deus. Bu pekadus pou pa bu kai.

² Bo toma palabras, bo riba pa SIÑOR, bo falal: “Tira tudu no pekadu, bu risibinu ku bondadi. Asin no na pursenta no orason suma turu di sakrifisiu.

³ Asiria ka pudi salbanu; no ka na monta kabalus di gera; no ka na torna fala un kusa ku no kumpu ku no mon: ‘Abo i no Deus’, pabia i na bo ku orfan ta oja miserikordia.”

SIÑOR na da vida nobu pa Israel

⁴ “N na kura se kurupson, N na ama elis di korson, pabia N ka ten mas raiba kontra elis.

⁵ Ami N na sedu suma serenu pa Israel; i na da floris suma liriu, i manda si raisis pa fundu suma sedru di Líbanu.

⁶ I na soronda ramus nobu, i na bonitu suma olivera, ku purfumu suma sedru di Líbanu.

⁷ Jinti na torna bin sinta bas di si sombra. E na tene nobu vida suma trigu, e tene manga di flor suma pe di uva. Se fama na sedu suma kil di biñu di Líbanu.

⁸ Efrain na punta: ‘Ke ku N ten mas ku idulus?’ Ami N obi si orason, N na toma konta del. Ami i suma piñeru, sempri verdi; si frutu ta ojadu na mi.”

⁹ Kin ki jiru? I na sibi kuma e kusas i sertu. Kin ku ten ntindimentu? I na ntindi elis. Kamiñus di SIÑOR i retu; jinti justu na yanda nelis, ma kilis ku ta kebra lei e na kai na ki kamiñus.