Oseias 10 - BIBLIA - traduson antigu in Krioulo

¹ Pobu di Israel i suma pe di uva bonitu ku padi manga di fruta. Konformi fruta na buri, asin ke kumpu mas altaris; konformi con na pruduzi mas, asin ke faja kulunas sagradu.

² Se korson sta divididu; asin e na kulpadu. Deus na bati se altaris, i dana se kulunas sagradu.

³ E na bin fala: “No ka tene rei pabia no ka tenba rispitu pa SIÑOR, ma, nin si no teneba rei, ke ki pudiba fasi pa nos?”

⁴ E ta papia manga di palabra amonton, e jurmenta na nada, e fasi kontratus. E ku manda keŝas na otridadi na ciu suma paja ku ta mata ku na lastra na reguas di lugar.

⁵ Pobu ku mora na Samaria na ten medu pabia di ki bakasiñu di Bet-Aven; e na cora pa el; saserdotis ku ta sirbilba na cora tambi; e ta kontenti ba ku gloria di ki idulu, ma ki gloria pirdi.

⁶ Ki idulu na lebadu pa Asiria suma pursenti di mpustu pa rei Jareb. Efrain na fika na kunfuson, Israel na sta na borgoña pabia i seta konsiju di idulu.

⁷ Rei di Samaria na lebadu suma kabaku riba di yagu.

⁸ Kaus altu di Aven, nunde ku Israel ta fasi pekadu, e na danadu. Pe di fidida ku tudu plantas ku ta fidi na nasi, e kubri se altaris. E na fala montañas: “Bo kubrinu!” E na fala montis: “Bo kai riba di nos!”

⁹ “O Israel, bu ka para peka disna di tempu di Jibeá. E toma pusison firmi la. Gera na Jibeá bin paña ki jinti ku fasi mal.

¹⁰ Ora ku N misti, N na kastiga Israel. Utru nasons na juntadu kontra elis, pa prindi elis pabia di se pekadu.

¹¹ “Efrain seduba baka nobu ku trenadu diritu, ku gostaba di tarbaju di masa arus. N pasa sintu na si garganti bonitu, N pul pa i junda ŝarua mas pisadu. Judá na labra, Israel na kopoti con risu.

¹² N fala bos pa bo bai bo labra con ku nunka ka labradu, bo sumia bondadi pa bos, bo kebra frutu di amor, pabia tempu ciga pa buska SIÑOR, tok i bin manda cuba di bondadi riba di bos.

¹³ Ma bo labraba pekadu, bo kebra maldadi, bo kume frutu di mintida. Suma ku bu fiansa na bu forsa, ku bu manga di tropa,

¹⁴ baruju di gera na lanta na metadi di bu pobu; tudu bu kuartelis na danadu, suma ku Salman kaba ku Bet-Arbel na dia di gera; mame padasadu la juntu ku si fijus.

¹⁵ Asin ku bo na fasidu, Betel, pabia di bo garandi maldadi. Parmaña sedu, rei di Israel na kabadu ku el di un bias.”