Numerus 9 - BIBLIA - traduson antigu in Krioulo

Paskua na lala di Sinai

¹ Na purmeru mis di sugundu anu dipus de sai na Ejitu, SIÑOR papia ku Moisés na lala di Sinai, i falal:

² “Israelitas dibi di guarda Paskua na tempu markadu,

³ ku sedu na dia 14 de mis, ora ku sol na kai. Bo na guardal konformi tudu si regras ku kustumus.”

⁴ Asin Moisés fala fijus di Israel pa e guarda Paskua.

⁵ E guardal na lala di Sinai, na dia 14 di purmeru mis, oca ku sol na kai. E fasi tudu konformi ordis ku SIÑOR daba Moisés.

⁶ I tenba utrus ku ka pudiba toma parti na Paskua na ki dia pabia e tokaba na kurpu di un omi ku muri, e fika impuru. Asin e ciga nunde Moisés ku Aron na ki mesmu dia,

⁷ e falal: “No sta impuru pabia no toka na un difuntu, ma kuma ku no pudi tujidu da oferta pa SIÑOR na tempu markadu, juntu ku utru fijus di Israel?”

⁸ Moisés fala elis: “Bo pera tok N obi kal ordi ku SIÑOR ten pa bos.”

⁹ SIÑOR fala Moisés

¹⁰ pa i papia ku fijus di Israel, i fala elis: “Si algin na bo metadi o, mas tardi, na metadi di bo jorsons, fika impuru pabia di un difuntu, o si i bai bias, tudu manera i dibi di toma parti na Paskua di SIÑOR.

¹¹ Na dia 14 di sugundu mis e pudi guarda festival, e kume karnel di Paskua ku pon sin fermentu ku ortalisa ku tene gustu forti.

¹² E ka dibi di disa nada di karni tok sol mansi; tambi pa ka e kebra nin un os. E na fasi festival konformi tudu lei di Paskua.

¹³ Ma si un omi sta puru, i ka bai bias, ma i ka guarda Paskua, i na tiradu na metadi di ña pobu, pabia i ka da oferta di SIÑOR na tempu markadu. Ki omi na fika ku kulpa di si pekadu.

¹⁴ “Si un stranjeru ku mora na bo metadi misti toma parti na festival di Paskua, i dibi di fasil konformi leis ku regras di Paskua. Lei i un son pa bos, fijus di tera o stranjeru.”

Nuven bai dianti

¹⁵ Na dia ku tabernakulu lantandadu, nuven ria i kubril, riba di tenda di tustumuñu; di noti ki nuven ta yardi suma fugu tok sol mansi.

¹⁶ Asin ki kontinua; nuven ta kubril; di noti i ta yardi suma fugu.

¹⁷ Ora ku nuven lanta, fijus di Israel ta pega si tras; kau ku nuven para, la ke ta kampa nel.

¹⁸ Konformi ordi di SIÑOR, fijus di Israel ta pega kamiñu; konformi ordi di SIÑOR e ta yarma se tenda. Tudu dia ku nuven fika paradu riba di tabernakulu, e ta sintaba.

¹⁹ Ora ku nuven tarda pa manga di dia riba di tabernakulu, fijus di Israel ta peraba ordi di SIÑOR, e ka ta baiba dianti.

²⁰ Utru ora nuven ta tene puku dia riba di tabernakulu; e ta sukuta ordi di SIÑOR pa para; e ta sukutal tambi pa bai.

²¹ Si nuven fika paradu di tardi tok sol mansi, dipus i lanta, e ta pega kamiñu. Nin ki di dia o di noti ku nuven lanta, e tenba ku bai.

²² Si nuven para riba di tabernakulu dus dia, o un mis, o un anu, tementi i ka lanta, fijus di Israel ta fika, e ka ta bai, ma si nuven lanta, e ta bai.

²³ Konformi ordi di SIÑOR e ta kampa; konformi ordi di SIÑOR e ta pega kamiñu pa bai. E ta obdisi tudu ordi ku Deus da pa boka di Moisés.