Numerus 8 - BIBLIA - traduson antigu in Krioulo

Kanderus

¹ SIÑOR fala Moisés

² pa i papia ku Aron, i falal: “Ora ku bu na sindi kanderus, lampadas dibi di pudu di un manera ke na numia pa dianti.”

³ Aron obdisi ki ordi ku SIÑOR da Moisés, i sindi lampadas pa lus pudi bin dianti di kanderu.

⁴ Kanderu i kumpuduba di uru batidu, desdi si pe te na si floris la riba; i kumpudu konformi modelu ku SIÑOR mostraba Moisés.

Dedikason di levitas

⁵ SIÑOR papia ku Moisés i falal:

⁶ “Tira levitas na metadi di fijus di Israel, bu purifika elis

⁷ de manera: Waga yagu di purifikason riba delis, bu pui elis pa e rapa tudu se kurpu, e laba se ropa. Asin e na sta puru.

⁸ Dipus e na toma un turu nobu ku si oferta di foriña finu masadu ku azeiti; bu na toma utru turu nobu pa sakrifika pa purdon di pekadu.

⁹ Ciganta levitas dianti di tenda di juntamentu, bu junta tudu pobu di Israel.

¹⁰ Leba levitas dianti di SIÑOR; fijus di Israel na pui se mon riba delis.

¹¹ Aron na pursenta levitas dianti di SIÑOR suma oferta spesial di fijus di Israel; e na dedikadu pa fasi tarbaju di SIÑOR.

¹² “Levitas na pui se mon riba di kabesa di ki turus; bu na sakrifika un suma oferta pa pekadu; ki utru na sedu oferta kemadu pa SIÑOR, pa i pudi purda pekadu di levitas.

¹³ Bu na pui levitas pa e firma dianti di Aron ku si fijus, bu na pursenta elis suma oferta spesial pa SIÑOR.

¹⁴ Asin bu na separa levitas na metadi di fijus di Israel, pa e sedu di mi.

¹⁵ “Dipus ku bu purifika levitas, bu pursenta elis suma oferta spesial, e na yentra pa fasi sirvis na tenda di juntamentu.

¹⁶ I elis ku na tiradu na metadi di fijus di Israel pa mi; N na toma elis pa mi na lugar di tudu purmeru fiju macu di si mame.

¹⁷ Tudu purmeru fiju di Israel, di omis o di limarias, i di mi. N separa elis pa mi na ki dia ku N mata tudu purmeru fijus na tera di Ejitu,

¹⁸ ma N toma ja levitas na konta di purmeru fijus di Israel.

¹⁹ Na metadi di israelitas N toma levitas, N da elis pa Aron ku si fijus pa sirbi fijus di Israel na tenda di juntamentu, pa sakrifika pa elis, pa kastigu ka bin pa israelitas si e ciga pertu di kau sagradu.”

²⁰ Asin Moisés, Aron ku tudu juntamentu di Israel dedika levitas konformi tudu ordi ku SIÑOR daba Moisés.

²¹ Levitas kumpri kustumus di purifikason, e laba se ropa; Aron pursenta elis suma oferta spesial pa SIÑOR, i fasi sakrifisiu pa elis pa e pudi purifikadu.

²² Dipus di kila, levitas yentra pa fasi sirvis na tenda di juntamentu bas di Aron ku si fijus. Ordis ku SIÑOR da Moisés aserka di levitas e kumpridu tudu.

²³ SIÑOR fala ku Moisés,

²⁴ i dal e ordis aserka di levitas: “Kilis ku tene vinti i sinku anu o mas e ta yentra pa fasi sirvis na tenda di juntamentu,

²⁵ ma si e ciga na idadi di sinkuenta anu e ten ku raforma, e ka na sirbi mas.

²⁶ E pudi bai juda se ermons na tarbaju ke ten ku fasi na tenda di juntamentu, ma elis propi e ka na toma konta di sirvis. Asin ku bu na ranja sirvis di levitas.”