Numerus 7 - BIBLIA - traduson antigu in Krioulo

Ofertas pa dedikason di tabernakulu ku altar

¹ Na dia ku Moisés kaba lantanda tabernakulu, i unjil, i dedikal pa Deus, ku tudu si ekipamentu; i unji tambi altar ku tudu si material, i dedikal.

² Ki ŝefis ku tiradu na Israel suma ŝefis di se jorsons, pa juda fasi konta di pobu, e da ofertas.

³ Ofertas ke tisi pa SIÑOR dianti di tabernakulu e sedu seis karu ku kubertura, ku dozi turu; kada ŝef tisi un turu, kada dus e tisi un karu.

⁴ SIÑOR fala Moisés:

⁵ “Risibi elis na se mon pa tarbaju di tenda di juntamentu. Bu na da elis pa levitas konformi tarbaju ke ten ku fasi.”

⁶ Asin Moisés toma ki karus ku turus, i da levitas.

⁷ I da dus karu ku kuatru turu pa fijus di Jerson pa se tarbaju;

⁸ i da kuatru karu ku oitu turu pa fijus di Merari, konformi se tarbaju. Esis tudu e ta fasiba se tarbaju bas di ordi di Itamar, fiju di saserdoti Aron.

⁹ Ma i ka da nada pa fijus di Koat, pabia elis e tenba konta di kusas mas sagradu, e ta kargaba elis na ombras.

¹⁰ Ki ŝefis da tambi ofertas pa dedikason di altar na dia ki unjidu; e leba se ofertas dianti di altar.

¹¹ SIÑOR fala Moisés: “Kada ŝef na tene si dia pa da si oferta pa dedikason di altar.”

^12-83 Asin, kada dia un ŝef tisi oferta de manera: Dia: Jorson di: Ŝef: 1 Judá Naason, fiju di Aminadab 2 Isakar Netanel, fiju di Zuar 3 Zebulon Eliab, fiju di Elon 4 Ruben Elizur, fiju di Sedeur 5 Simeon Selumiel, fiju di Zuris 6 Gad Eliasaf, fiju di Deuel 7 Efrain Elisama, fiju di Amijud 8 Manasés Gamaliel, fiju di Pedazur 9 Benjamin Abidan, fiju di Jideoni 10 Dan Aiezer, fiju di Amisadai 11 Aser Pajiel, fiju di Okran 12 Naftali Aira, fiju di Enan Kada un tisi mesmu kusa pa oferta, ku sedu: un pratu di prata ku pesa 1,5 kilu, ku un basia di prata ku pesa 800 grama, kada un incidu di foriña finu masadu ku azeiti pa oferta di kumida; un tiẑela di uru ku pesa 115 grama, incidu ku nsensu; un turu nobu, un karnel macu ku un fiju macu di karnel di un anu pa oferta kemadu; un kabra macu suma oferta pa pekadu; ku dus turu, sinku karnel macu, sinku kabra macu ku sinku fiju macu di karnel, di un anu, pa sakrifisiu di pas.

Dia: Jorson di: Ŝef:

^84-88 Total di ofertas ku ki dozi ŝef tisi pa dedikason di altar i sedu: 12 pratu di prata ku 12 basia di prata ku pesa 27,6 kilu; 12 tiẑela di uru ku pesa 1,38 kilu, incidu ku nsensu; pa ofertas kemadu: 12 turu, 12 karnel macu ku 12 karnelsiñu macu di un anu, tudu ku oferta di kumida; pa oferta pa pekadu: 12 kabra macu; pa ofertas di pas: 24 turu, 60 karnel macu, 60 kabra macu ku 60 karnelsiñu macu di un anu. Asin ku altar dedikadu dipus ki unjidu.

⁸⁹ Kualker ora ku Moisés yentraba na tenda di juntamentu pa papia ku Deus, i ta obiba un fála ku na papia na metadi di ki dus kirubin ku staba na kau di miserikordia riba di arka di kontratu. Asin ke ta kombersaba.