Numerus 5 - BIBLIA - traduson antigu in Krioulo

Puresa di kampamentu

¹ SIÑOR fala Moisés:

² “Da fijus di Israel ordi pa e tira fora di kampamentu tudu jinti ku tene mpincu, o kusa na sai na se kurpu, ku tudu kilis ku sta impuru pabia e toka na un kurpu ku muri.

³ Bo ten ku tira elis fora di kampamentu, nin si i omi o i minjer, pa ka e kontamina kampamentu nunde ku N mora.”

⁴ Asin fijus di Israel obdisi ke ku SIÑOR fala Moisés, e tira elis fora di kampamentu.

Pagamentu pa kulpa

⁵ SIÑOR papia mas ku Moisés, i falal

⁶ pa i fala fijus di Israel: “Ora ku kualker omi o minjer fasi mal kontra utru algin, i ta oja i kebra lei di SIÑOR, i sta kulpadu.

⁷ I ten ku konfesa pekadu ki fasi, i paga tudu ki dibi di paga pa si kulpa, i buri mas un kintu parti, i da tudu pa ki algin ki yara.

⁸ Ma si ki algin ki yara muri ja, i ka tene parenti ku ten diritu di risibi ki diñeru, ki kulpadu na da SIÑOR el; i na bai pa saserdoti. Ki pagamentu i ka na juntu ku ki karnel ki na leba pa saserdoti pudi sakrifikal, pa ki pekadu purdadu.

⁹ Tambi tudu oferta ku fijus di Israel leba pa SIÑOR i na sedu di saserdoti ku si dunu ntregal pa el.

¹⁰ Tudu oferta sagradu ku algin leba i da un saserdoti, i di ki saserdoti.”

Minjeris ku se omis ka fia nelis

¹¹ SIÑOR papia mas ku Moisés i falal

¹² pa i da e ordi pa fijus di Israel: “I pudi sedu ku minjer di algin disvia, i peka kontra el,

¹³ i kai ku utru omi, i fika kontaminadu, ma maridu ka ojal, nin i ka tene tustumuña kontra el pabia i ka pañadu.

¹⁴ Omi pudi sinti siumi di si minjer, i diviña kuma minjer sta kontaminadu, ma omi pudi bin sinti siumi di si minjer, nin si minjer ka kai ku utru omi.

¹⁵ Ki omi pudi leba si minjer dianti di saserdoti; i na leba tambi, na konta di minjer, un oferta di dus litru di foriña di sevada, ma i ka na darma azeiti nel, nin i ka na pui nsensu riba del, pabia i oferta di siumi, pa pekadu pudi sai na lus.

¹⁶ “Saserdoti na ciganta minjer, i pul dianti di SIÑOR.

¹⁷ Dipus, i na pui yagu sagradu na un testu, i na toma puera di con di tabernakulu, i pul na yagu;

¹⁸ i na pursenta minjer dianti di SIÑOR, i na diskubri si kabesa, i na pui na si mon ki oferta di foriña, di siumi. Saserdoti na pega na si mon ki yagu malgos ku ta tisi maldison.

¹⁹ Dipus i na pui minjer bas di juramentu, i na falal: ‘Si ningin ka dita ku bo, bu ka yara bu maridu, bu ka sedu impuru, e yagu malgos di maldison ka na fasiu mal,

²⁰ ma si bu yara bu maridu, bu kontamina bu kurpu, bu dita ku utru omi ku ka sedu bu maridu,’

²¹ (ali saserdoti ten ku pui minjer bas di maldison di juramentu) ‘SIÑOR na pui bu pobu pa e maldisuau ora ki pui bu koŝa pa i pirdi forsa, i pui bu bariga pa i inca.

²² E yagu di maldison pa i yentra na bu kurpu, i pui bu bariga pa i inca, i pui bu koŝa pa i pirdi forsa.’ Minjer na fala: ‘Amen! Pa i sedu asin.’

²³ “Saserdoti na skirbi e maldisons na un rolu; dipus i na laba elis ku ki yagu malgos.

²⁴ Antis di da minjer ki yagu malgos di maldison pa i bibi, ku na yentra na si kurpu pa dal dur forti,

²⁵ saserdoti na toma ki oferta di foriña di siumi na mon di minjer, i na sana ki oferta dianti di SIÑOR, i na pursental na altar.

²⁶ I na toma un mon incidu di ki foriña di oferta pa tisi pekadu pa lus, i na kemal riba di altar. Dipus i na da minjer ki yagu pa i bibi.

²⁷ Si na bardadi minjer kontaminaba si kurpu, i peka kontra si maridu, ora ki kaba bibil, ki yagu di maldison na yentra nel, i na dal dur forti; si bariga na inca, si koŝa na pirdi forsa; si nomi i na sedu maldisuadu na metadi di si pobu.

²⁸ Si minjer ka kontamina si kurpu ma i sta puru, i na fika libri di kulpa, i na pudi padi fijus.

²⁹ “Es i lei di siumi, ora ku minjer kasadu disvia, i fika kontaminadu,

³⁰ o ora ku omi sinti siumi di si minjer. Minjer na pursentadu dianti di SIÑOR; saserdoti na kumpri tudu e lei riba del.

³¹ Omi na fika libri di kulpa, ma si minjer sta kulpadu i na sufri pa si pekadu.”