Numerus 35 - BIBLIA - traduson antigu in Krioulo

Prasas pa levitas

¹ Na bulañas di Moab, lungu di riu Jordon, filadu ku Jerikó, SIÑOR fala Moisés:

² “Da ordi pa fijus di Israel di kuma e ten ku da levitas prasas pa e mora nel, ku terenu na roda delis. E ta tira ki prasas na se yardansa.

³ Asin levitas na tene ki prasas pa mora nel, ma terenu na roda i na sedu pa se bakas ku karnel ku tudu se limarias.

⁴ Terenu na roda i ten ku midi 450 metru di mura di prasa na kada ladu.

⁵ Di fora di prasa bo na midi 900 metru pa saida di sol, pa sul, pa kaida di sol ku pa norti. Es i na sedu terenu na roda, ku prasa na metadi.

⁶ “Seis di prasas ku bo na da levitas e na sedu prasas di rogu, nunde ku algin ku mata pudi kuri pa el. Fora de seis, bo na da elis korenta i dus prasa.

⁷ Asin, tudu prasas ku bo da pa levitas na sedu korenta i oitu, kada un ku si terenu na roda.

⁸ Kada jorson na da prasas pa levitas, konformi numeru di prasas di si yardansa. Bo na toma mas prasas di kilis ku tene ciu; bo na toma puku di kilis ku tene puku.”

Seis prasa di rogu

⁹ SIÑOR papia mas ku Moisés, i falal

¹⁰ pa i fala fijus di Israel: “Ora ku bo kamba Jordon pa tera di Kanaan,

¹¹ bo kuji prasas ku na sedu bo prasas di rogu, nunde ku algin pudi kuri pa el si i yara, i mata algin sin tenelba na sintidu.

¹² Ki prasas na sedu abrigu pa bos di parenti ku misti vinga, pa ki omi ku mata ka muri antis di i julgadu dianti di juntamentu di pobu.

¹³ Bo na da seis prasa di rogu,

¹⁴ tris ne ladu di Jordon ku mas tris na tera di Kanaan.

¹⁵ Ki seis prasa na sedu abrigu pa fijus di Israel, pa stranjeru, tambi pa kualker ospri ku sta na bo metadi. Asin algin ku yara, i mata si kumpañer, i pudi kuri pa la.

Kil ku mata si kumpañer i ten ku muri

¹⁶ “Si algin bati na si kumpañer ku un kusa di feru tok i muri, i matadur; i ten ku matadu.

¹⁷ Si algin tene pedra na mon ku pudi mata, i da algin ku el tok i muri, i matadur; i ten ku matadu.

¹⁸ Si algin tene po na mon ku pudi mata, i suta si kumpañer ku el tok i muri, i matadur; i ten ku matadu.

¹⁹ Parenti tokadu di kil ku matadu i ten ku vinga si sangi. Ora ki kontra ku matadur, i ten ku matal.

²⁰ “Si algin pinca si kumpañer ku odiu, o i pui sintidu pa ferca un kusa kontra el, tok i muri,

²¹ o ku inimisadi i dal suku ku si mon tok i muri, ki algin ten ku matadu pabia i matadur. Si vingadur di sangi kontra ku el, i ten ku matal.

²² “Ma i pudi sedu ku algin, sin kualker inimisadi, i pinca si kumpañer pa asidenti, o i ferca kualker kusa ku sutal, sin mau pensamentu kontra el,

²³ o i ka ojal, i disa pedra kai riba del tok i matal, ma i ka seduba si inimigu nin i ka mistiba fasil mal.

²⁴ Ne kasu, juntamentu di pobu ta julga si kasu ku di vingadur di sangi, konformi e leis.

²⁵ E ten ku libra ki omi ku mata si kumpañer na mon di vingadur di sangi, e ribantal pa prasa di rogu nunde ki kuriba pa el. La ki na fika tok ŝef di saserdoti muri, kil ku unjidu ku azeiti sagradu.

²⁶ “Si ki omi ku mata bin sai na prasa di rogu nunde ki kuri pa el,

²⁷ si vingadur di sangi kontra ku el, i matal, i ka na sedu kulpadu suma matadur.

²⁸ Ki omi ku mata i ten ku fika na prasa di rogu tok ŝef di saserdotis muri. Son dipus di kila ku ki algin pudi riba pa si propi tera.

²⁹ “E kusas na sedu un lei forti pa bos pa sempri na tudu kau ku bo mora nel.

³⁰ “Algin ku mata si kumpañer, i na matadu suma matadur son si i ten dus o mas jinti ku na testifika kontra el. Ningin ka pudi matadu pabia di tustumuñu di un algin son.

³¹ “Ka bo seta pagamentu pa vida di un matadur ku mersi muri. I ten ku matadu, sin falta.

³² “Si algin kuri pa prasa di rogu, ka bo seta pagamentu pa i riba pa si tera antis di ŝef di saserdoti muri.

³³ “Ka bo kontamina tera ku bo sta nel, pabia darmamentu di sangi i ta dana tera. Tera ka ta oja purdon pa sangi ku darmadu nel si i ka ku sangi di kil ku darmal.

³⁴ Asin, ka bo kontamina tera ku bo mora nel, nunde ku ami N mora nel tambi, pabia ami, SIÑOR, N mora na metadi di fijus di Israel.”