Numerus 34 - BIBLIA - traduson antigu in Krioulo

Fronteras di tera

¹ SIÑOR fala Moisés

² pa i da fijus di Israel ordi, i fala elis: “Ora ku bo yentra na tera di Kanaan, bo tenel suma yardansa, tera na tene si fronteras.

³ “Bo frontera di sul i na sedu di lala di Zin te na frontera di Edon. I na kumsa na saida di sol na ponta di Mar Salgadu,

⁴ i na vira pa sul pa subida di Akrabin, i pasa na Zin, dipus mas pa sul te Kades-Barneia. Di la i na bai pa Azar-Adar, i pasa pa Azmon,

⁵ nunde ki na vira mas pa bai pa riu di Ejitu, i pasa te na Mar Mediteraneu.

⁶ “Bo frontera na ladu di kaida di sol i na sedu Mar Mediteraneu.

⁷ “Pa bo frontera di norti bo pudi marka sinal di Mediteraneu te na monti di Or;

⁸ di la i ta bai pa entrada di Amat, i kontinua te na Zedad,

⁹ i pasa na Zifron, i kaba na Azar-Enan. I es ku na sedu bo frontera di norti.

¹⁰ “Pa bo frontera di saida di sol, bo marka sinal di Azar-Enan te na Sefan.

¹¹ Frontera na bai di Sefan pa Ribla, pa lesti di Ain, i na kontinua na montis na ladu di lesti di Mar di Kineret,

¹² i na sigi lungu di riu Jordon te na Mar Salgadu. “Es ku na sedu bo tera, ku si fronteras na tudu ladu.”

¹³ Moisés da ordi pa fijus di Israel, i fala elis: “Bo na juga sorti, bo rapati e con pa yardansas. SIÑOR fala kuma i ten ku dadu pa novi jorson ku metadi,

¹⁴ pabia familias di jorsons di Ruben ku Gad, ku metadi di jorson di Manasés, e risibi ja se yardansa.

¹⁵ E dus jorson ku metadi e risibi ja se yardansa ne ladu di riu Jordon di Jerikó, na ladu di saida di sol.”

Omis ku dibi di rapati tera

¹⁶ SIÑOR papia mas ku Moisés i falal:

¹⁷ “Esis i nomis di omis ku na rapati bos tera pa yardansa: Saserdoti Eleazar ku Josué, fiju di Nun.

¹⁸ Bo na toma tambi un ŝef di kada jorson pa juda rapati tera pa yardansa.

^19-28 Es i nomis di ki ŝefis: Di Judá, Kaleb, fiju di Jefoné; di Simeon, Semuel, fiju di Amiud; di Benjamin, Elidad, fiju di Kislon; di Dan, Buki, fiju di Jogli; di José (Manasés), Aniel, fiju di Efod; di Efrain, Kemuel, fiju di Siftan; di Zebulon, Elizafan, fiju di Parnak; di Isakar, Paltiel, fiju di Azan; di Aser, Aiud, fiju di Selomi; di Naftali, Pedael, fiju di Amiud.”

Di Judá, Kaleb, fiju di Jefoné;

²⁹ Esis i kilis ku SIÑOR da ordi pa rapati tera di Kanaan pa yardansa di fijus di Israel.