Numerus 33 - BIBLIA - traduson antigu in Krioulo

Bias di Ejitu pa Moab

¹ Es i relatoriu di bias ku fijus di Israel fasi, oca Moisés ku Aron tira elis di Ejitu, konformi se jorsons.

² Konformi ordi di SIÑOR Moisés skirbi nomi di kada kau ke sinta nel na bias.

³ Fijus di Israel sai na Ramasés na dia 15 di purmeru mis, ku sedu dia dipus di Paskua. E sai ku koraẑen na uju di tudu ejipsius,

⁴ nkuantu e na nteraba tudu se purmeru fijus ku SIÑOR mataba, oca ki na julga deusis di Ejitu.

⁵ Dipus ku fijus di Israel sai na Ramasés, e sinta na Sukot.

⁶ Di la e bai sinta na Etan, na frontera di lala.

⁷ Di Etan e riba pa Pi-Airot pa lesti di Baal-Zefon, e sinta dianti di Migdol.

⁸ Di Pi-Airot e kamba mar pa lala. E yanda pa tris dia na lala di Etan, e sinta na Mara.

⁹ Di la e bai sinta na Elin nunde ki ten dozi fonti di yagu ku setenta palmera.

¹⁰ E sai na Elin, e bai sinta lungu di Mar Burmeju.

¹¹ Di la e bai sinta na lala di Sin.

¹² Di la e bai sinta na Dofka.

¹³ Dipus e sinta na Alus.

¹⁴ Di Alus e bai sinta na Refidin, nunde ki ka tenba yagu pa pobu bibi.

^15-37 Di Refidin te na monti di Or, e sinta ne lugaris: Lala di Sinai, Kibrot-Ataavá, Azerot, Ritma, Rimon-Perez, Libna, Risa, Kelata, Sefer, Arada, Makelot, Taat, Tera, Mitka, Asmona, Moserot, Bene-Jaakan, Or-Ajigad, Jotbatá, Abrona, Ezion-Jeber, lala di Zin ku sedu Kades, ku monti di Or na frontera di tera di Edon.

³⁸ Konformi ordi di SIÑOR, saserdoti Aron subi na monti di Or, i muri la, na purmeru dia di kintu mis na anu 40 dipus di saida di fijus di Israel na tera di Ejitu.

³⁹ Aron teneba sentu i vinti i tris anu oca ki muri la na monti di Or.

⁴⁰ Ki kananeu, rei di Arad, ku moraba na sul di Kanaan, i obi kuma Israel na bin.

^41-49 Di monti di Or te na bulañas di Moab, israelitas sinta ne lugaris: Zalmona, Punon, Obot, montisiñus di Abarin na frontera di Moab, Dibon-Gad, Almon-Diblatain, montis di Abarin dianti di Nebu, ku na bulañas di Moab, lungu di Jordon di Jerikó, na metadi di Bet-Jesimot ku Abel-Sitin.

Deus manda tira fora moraduris di Kanaan

⁵⁰ Na bulaña di moabitas, lungu di riu Jordon filadu ku Jerikó, SIÑOR papia ku Moisés, i falal

⁵¹ pa i fala fijus di Israel: “Ora ku bo kaba kamba Jordon pa tera di Kanaan,

⁵² bo tira fora tudu moraduris di tera, bo dana tudu se imaẑens labradu, bo kaba tambi ku tudu se idulus di metal, bo pajiga tudu se kaus sagradu.

⁵³ Bo toma tera pa bos, bo mora nel, pabia N da bos el pa bo tene.

⁵⁴ Bo na juga sorti pa rapati ki tera konformi bo familias, tambi konformi nomi di pape di kada jorson. Jorson mas garandi na yarda kau garandi; jorson pikininu na yarda kau pikininu. Kau ku sorti di algin kai nel, la ku na sedu di sil.

⁵⁵ “Ma si bo ka tira ki moraduris di tera, kilis ku bo disa pa e fika e na sedu suma puera na bo uju, suma fididas na bo pontada. E na bin kansa bos na tera nunde ku bo sinta.

⁵⁶ Asin N na fasi bos kil ku N na pensa fasi elis.”