Numerus 30 - BIBLIA - traduson antigu in Krioulo

Regras aserka di votus

¹ Moisés papia ku ŝefis di jorsons di fijus di Israel, i fala elis: “Esis i ordis ku SIÑOR da.

² Si un omi fasi purmesa pa SIÑOR, o i mara si kabesa bas di un juramentu, i ka pudi kebra si palabra. Tudu ki papia ku si boka, i ten ku fasil.

³ “Si un minjer nobu, ku sta inda na kasa di si pape, i fasi purmesa pa SIÑOR, o i mara si kabesa ku juramentu,

⁴ si si pape obi ki purmesa o ki juramentu, ma i ka falal nada, tudu ki fala o i jurmenta i na firma.

⁵ Ma si si pape tujil na ki dia ki obil, tudu si purmesas o si juramentu ki mara kabesa ku el i ka na kontadu ku el. SIÑOR na purdal pabia si pape tujil.

⁶ “Si un minjer fasi purmesa o i mara si kabesa ku palabras ki papia sin pensa diritu, dipus i bin kasadu,

⁷ si si omi obil, ma i kala na ki dia, si purmesas ku si palabra ki mara si kabesa ku el i na firma.

⁸ Ma si si omi tujil na ki dia ki obil, i nega ki purmesa o ki palabra ki mara si kabesa ku el, SIÑOR na purdal.

⁹ “Si i viuva o minjer divorsiadu ku da purmesa, tudu palabra ki mara si kabesa ku el na firma.

¹⁰ “Si minjer ku mora na kasa di si omi fasi purmesa o i mara si kabesa ku juramentu,

¹¹ si si omi obil, i kala, i ka tujil, tudu si purmesas ku si juramentu ki mara si kabesa ku el na firma.

¹² Ma si si omi tujil na ki dia ki obil, tudu palabra ki papia ku si boka, ku juramentu ki mara si kabesa ku el, i ka na firma. SIÑOR na purdal pabia si omi tujil.

¹³ Tudu purmesa o juramentu ku minjer fasi pa nega si kabesa, si omi pudi firmantal o negal.

¹⁴ Ma si si omi ka falal nada di un dia pa utru, i na firmanta tudu si purmesas ku juramentus ku na maral. I firmantal ki purmesas pabia i ka falalba nada na ki dia ki obil.

¹⁵ Si omi pera dias pasa, i kumsa bin tujil kumpri si purmesa, i na sedu kulpadu pa falia di si minjer.”

¹⁶ Esis i regras ku SIÑOR da Moisés aserka di omi ku si minjer, tambi aserka di pape ku si fiju femia ku sta inda na si kasa.