Numerus 29 - BIBLIA - traduson antigu in Krioulo

Festival di kornetas

¹ “Na purmeru dia di setimu mis bo na tene juntamentu sagradu; ka bo fasi nin un tarbaju na ki dia. I na sedu un dia pa bo toka korneta.

² Bo na leba un turu nobu, un karnel macu ku seti fiju di karnel, macu, di un anu, tudu sin difeitu, suma oferta kemadu ku na cera sabi pa SIÑOR.

³ Se oferta di kumida na sedu foriña finu masadu ku azeiti; bo na da 6 litru di foriña pa turu, 4 litru pa karnel

⁴ ku 2 litru pa kada un di ki seti fiju di karnel.

⁵ Bo na leba un kabra macu pa purdon di bo pekadu.

⁶ Tudu e limarias i fora di oferta kemadu di mis ku si oferta di kumida, ku oferta kemadu di kada dia ku si ofertas di kumida ku bibida, konformi ordi. Elis e sedu oferta ku ta cera sabi, ku ta pasadu na fugu, pa SIÑOR.

Dia di sakrifisiu pa purdon di pekadu

⁷ “Na dia 10 di setimu mis, bo na tene juntamentu sagradu; bo nega bo kabesa, bo disa tudu bo tarbaju.

⁸ Bo na leba un turu nobu, un karnel macu ku seti fiju di karnel, macu, di un anu, tudu sin difeitu, suma oferta kemadu ku na cera sabi pa SIÑOR.

⁹ Oferta di kumida ku ta kumpaña ki limarias i na sedu foriña finu masadu ku azeiti; bo na da 6 litru pa turu, 4 litru pa karnel,

¹⁰ ku 2 litru pa kada un di ki seti fiju di karnel.

¹¹ Bo na leba tambi un kabra macu pa purdon di bo pekadu, fora di ki utru limarias ku na sakrifikadu na ki dia pa purdon di pekadu, ku oferta kemadu di kada dia ku si ofertas di kumida ku bibida.

Ofertas na festival di barakas

¹² “Na dia 15 di setimu mis bo na tene un juntamentu sagradu. Ka bo fasi nin un tarbaju na ki dia. Pa seti dia bo ta fasi festival pa SIÑOR.

¹³ Bo leba trezi turu nobu, dus karnel macu ku katorzi fiju di karnel, macu, di un anu, tudu sin difeitu, suma oferta kemadu ku ta cera sabi, ku pasadu na fugu pa SIÑOR.

¹⁴ Se oferta di kumida na sedu foriña finu masadu ku azeiti; 6 litru di foriña pa kada un di ki trezi turu, 4 litru pa kada un di ki dus karnel,

¹⁵ ku 2 litru pa kada un di ki katorzi fiju di karnel.

¹⁶ Bo na leba tambi un kabra macu pa purdon di bo pekadu, fora di oferta kemadu di kada dia ku si ofertas di kumida ku bibida.

¹⁷ “Na sugundu dia bo leba dozi turu nobu, dus karnel macu, katorzi fiju di karnel, macu, di un anu, tudu sin difeitu,

¹⁸ ku se ofertas di kumida ku bibida pa kada un konformi regras.

¹⁹ Bo leba tambi un kabra macu pa purdon di bo pekadus, fora di oferta kemadu di kada dia ku si ofertas di kumida ku bibida.

²⁰ “Na terseru dia bo leba onzi turu nobu, dus karnel macu, katorzi fiju di karnel, macu, di un anu, tudu sin difeitu,

²¹ ku se ofertas di kumida ku bibida pa kada un konformi regras.

²² Bo leba tambi un kabra macu pa purdon di bo pekadus, fora di oferta kemadu di kada dia ku si ofertas di kumida ku bibida.

²³ “Na kuartu dia bo leba des turu nobu, dus karnel macu, katorzi fiju di karnel, macu, di un anu, tudu sin difeitu,

²⁴ ku se ofertas di kumida ku bibida pa kada un konformi regras.

²⁵ Bo leba tambi un kabra macu pa purdon di bo pekadus, fora di oferta kemadu di kada dia ku si ofertas di kumida ku bibida.

²⁶ “Na kintu dia bo leba novi turu nobu, dus karnel macu, katorzi fiju di karnel, macu, di un anu, tudu sin difeitu,

²⁷ ku se oferta di kumida ku bibida pa kada un konformi regras.

²⁸ Bo leba tambi un kabra macu pa purdon di bo pekadus, fora di oferta kemadu di kada dia ku si ofertas di kumida ku bibida.

²⁹ “Na sestu dia bo leba oitu turu nobu, dus karnel macu, katorzi fiju di karnel, macu, di un anu, tudu sin difeitu,

³⁰ ku se oferta di kumida ku bibida pa kada un konformi regras.

³¹ Bo leba tambi un kabra macu pa purdon di bo pekadus, fora di oferta kemadu di kada dia ku si ofertas di kumida ku bibida.

³² “Na setimu dia bo leba seti turu nobu, dus karnel macu, katorzi fiju di karnel, macu, di un anu, tudu sin difeitu,

³³ ku se oferta di kumida ku bibida pa kada un konformi regras.

³⁴ Bo leba tambi un kabra macu pa purdon di bo pekadus, fora di oferta kemadu di kada dia ku si ofertas di kumida ku bibida.

³⁵ “Oitavu dia na sedu dia di festival pa bos; nin un tarbaju bo ka na fasi.

³⁶ Bo na leba un turu nobu, un karnel ku seti fiju di karnel, macu, di un anu, tudu sin difeitu, suma oferta kemadu ku ta cera sabi, pasadu na fugu pa SIÑOR.

³⁷ Ofertas di kumida ku bibida pa turu, pa karnel ku fijus di karnel e ta sedu konformi regras.

³⁸ Bo leba tambi un kabra macu pa purdon di bo pekadu, fora di oferta kemadu di kada dia ku si ofertas di kumida ku bibida.

³⁹ “Bo na leba e kusas pa SIÑOR na dias di festival markadu, fora di bo ofertas di votu, ofertas di libri vontadi, ofertas kemadu, ofertas di kumida ku bibida, ku bo ofertas di pas.”

⁴⁰ Moisés konta pobu di Israel tudu kusa ku SIÑOR mandal pa i fasidu.