Numerus 27 - BIBLIA - traduson antigu in Krioulo

Fijus femia di Zelofead

¹ Makla, Noa, Ogla, Milka ku Tirza e seduba fijus femia di Zelofead, fiju di Efer, fiju di Jilead, fiju di Makir, fiju di Manasés, fiju di José.

² E bai firma dianti di Moisés ku saserdoti Eleazar, ku ŝefis, ku tudu juntamentu, na porta di tenda di juntamentu, e fala:

³ “No pape muri na lala. I ka staba na metadi di ki jinti di Koré ku lanta kontra SIÑOR, ma i muri na si propi pekadu, i ka disa fiju macu.

⁴ Kuma ku nomi di no pape na tiradu na metadi di si familia suma ki ka tene fiju macu? Danu con na metadi di ermons di no pape.”

⁵ Moisés leba se kasu dianti di SIÑOR.

⁶ SIÑOR fala Moisés:

⁷ “Fijus di Zelofead papia kusa sertu. Bu ten ku da elis con pa e yarda na metadi di ermons di se pape. Bu na pasanta yardansa di se pape pa elis.

⁸ “Konta fijus di Israel kuma, si algin muri, i ka disa fiju macu, yardansa ten ku pasa pa si fiju femia.

⁹ Si i ka disa fiju femia, si yardansa ta dadu pa si ermons.

¹⁰ Si i ka tene tambi ermons, si yardansa ta dadu pa ermons di si pape.

¹¹ Si si pape tambi ka tene ermons, si yardansa ta dadu pa parenti mas pertu di familia, pa i pudi tenel. Moisés, es na sedu un lei forti pa fijus di Israel konformi ordi ku N na dau.”

Deus konta Moisés kuma i na muri

¹² Dipus, SIÑOR fala Moisés: “Subi na monti di Abarin, bu jubi pa tera ku N da pa fijus di Israel.

¹³ Dipus ku bu ojal, bu na muri, bu rukujidu pa bu pobu, suma bu ermon Aron,

¹⁴ pabia, oca tudu pobu na jusiaba lungu di yagu di Meribá di Kades, na lala di Zin, abos dus bo disobdisi ña ordi pa mostra ña santidadi dianti di se uju.”

¹⁵ Moisés fala SIÑOR:

¹⁶ “N misti pa SIÑOR, Deus ku ta da vida pa tudu jinti, pa i pui un omi ku na sta riba de kumunidadi,

¹⁷ ku ta leba elis fora, i tisi elis pa dentru, i yanda sempri se dianti, pa pobu di SIÑOR ka sedu suma karnel ku ka tene bakiadur.”

Deus kuji Josué na lugar di Moisés

¹⁸ SIÑOR fala Moisés: “Toma Josué, fiju di Nun, un omi ku tene spiritu, bu pui mon riba del,

¹⁹ bu lebal dianti di saserdoti Eleazar, ku tudu juntamentu, bu dal ordis se dianti.

²⁰ Rapati bu otridadi ku el, pa tudu kumunidadi di Israel pudi obdisil.

²¹ I ten ku bai dianti di saserdoti Eleazar, ku ta usa Urin pa punta SIÑOR pa i risibi rasposta. Konformi si ordi el ku tudu fijus di Israel e na sai; konformi si ordi e na yentra.”

²² Moisés fasi kil ku SIÑOR mandal. I toma Josué, i lebal dianti di saserdoti Eleazar, ku tudu juntamentu,

²³ i pui si dus mon riba del, i dal ordis, suma ku SIÑOR falal pa i fasi.