Numerus 26 - BIBLIA - traduson antigu in Krioulo

Resensiamentu di israelitas

¹ Dipus di ki praga pasa, SIÑOR papia ku Moisés ku Eleazar, fiju di saserdoti Aron, i fala elis:

² “Bo fasi konta di tudu kumunidadi di fijus di Israel, familia pa familia, bo skirbi kilis di vinti anu pa riba, ku ciga bai tropa.”

³ Na bulañas di Moab, pertu di riu Jordon, filadu ku Jerikó, Moisés ku saserdoti Eleazar papia ku pobu, e fala:

⁴ “Bo fasi konta di omis di vinti anu pa riba, konformi SIÑOR manda Moisés.” Esis i fijus di Israel ku sai na Ejitu:

⁵ Jorson di Ruben, purmeru fiju di Israel, i seduba: Enok, pape di familia di enokitas; Palú, pape di familia di paluitas;

⁶ Ezron, pape di familia di ezronitas; Karmi, pape di familia di karmitas.

⁷ Esis i familias di rubenitas; kilis ku kontadu e seduba 43.730.

⁸ Fiju di Palú i Eliab.

⁹ Fijus di Eliab i Nemuel, Datan ku Abiran. Ki Datan ku Abiran e kujiduba suma ŝefis di kumunidadi, ma e lanta kontra Moisés ku Aron, e junta ku jinti di Koré oca ke lanta kontra SIÑOR.

¹⁰ Con yabri, i nguli elis juntu ku Koré. Ki jinti di Koré e muri oca fugu kaba ku duzentus i sinkuenta omi. E torna suma avisu pa utru jinti,

¹¹ ma fijus di Koré ka muri.

¹² Jorson di Simeon, konformi se familias, e seduba: Nemuel, pape di familia di nemuelitas; Jamin, pape di jaminitas; Jakin, pape di jakinitas;

¹³ Zerá, pape di zeraitas; Saul, pape di saulitas.

¹⁴ Esis i familias di simeonitas; e seduba 22.200.

¹⁵ Jorson di Gad, konformi se familias, e seduba: Zefon, pape di familia di zefonitas; Aji, pape di ajitas; Suni, pape di sunitas;

¹⁶ Ozni, pape di oznitas; Erí, pape di eritas;

¹⁷ Arodi, pape di aroditas, Areli, pape di arelitas.

¹⁸ Esis i familias di fijus di Gad. Kilis ku kontadu e seduba 40.500.

¹⁹ Fijus di Judá e seduba Er ku Onan, ma e muri na tera di Kanaan.

²⁰ Jorson di Judá, konformi se familias, e seduba: Selá, pape di familia di selanitas; Perez, pape di perezitas; Zerá, pape di zeraitas.

²¹ Fijus di Perez e seduba: Ezron, pape di familia di ezronitas; Amul, pape di amulitas.

²² Esis i familias di Judá. Kilis ku kontadu e seduba 76.500.

²³ Jorson di Isakar, konformi se familias, e seduba: Tola, pape di familia di tolaitas; Puva, pape di puvitas;

²⁴ Jasub, pape di jasubitas; Sinron, pape di sinronitas.

²⁵ Esis i familias di Isakar. Kilis ku kontadu e seduba 64.300.

²⁶ Jorson di Zebulon, konformi se familias, e seduba: Sered, pape di familia di sereditas; Elon, pape di elonitas; Jaleel, pape di jaleelitas.

²⁷ Esis i familias di Zebulon. Kilis ku kontadu e seduba 60.500.

²⁸ Fijus di José, konformi se familias, e seduba Manasés ku Efrain.

²⁹ Fiju di Manasés i seduba Makir, pape di familia di makiritas. Makir padi Jilead, pape di jileaditas.

³⁰ Fijus di Jilead e seduba: Jezer, pape di familia di jezeritas; Elek, pape di elekitas;

³¹ Asriel, pape di asrielitas; Siken, pape di sikenitas;

³² Semida, pape di semidaitas; Efer, pape di eferitas.

³³ Zelofead, fiju di Efer, i ka teneba fiju macu, son femias ku teneba nomis di Makla, Noa, Ogla, Milka ku Tirza.

³⁴ Esis i familias di Manasés. Kilis ku kontadu e seduba 52.700.

³⁵ Fijus di Efrain, konformi se familias, e seduba: Sutela, pape di familia di sutelaitas; Beker, pape di bekeritas; Taan, pape di taanitas.

³⁶ Fiju di Sutela i seduba Eran, pape di familia di eranitas.

³⁷ Esis i familias di Efrain. Kilis ku kontadu e seduba 32.500. Esis i fijus di José, konformi se familias.

³⁸ Fijus di Benjamin, konformi se familias, e seduba: Belá, pape di familia di belaitas; Asbel, pape di asbelitas; Airan, pape di airanitas;

³⁹ Sufan, pape di sufanitas; Ufan, pape di ufanitas.

⁴⁰ Fijus di Belá e seduba Ard, pape di arditas, ku Naaman, pape di naamanitas.

⁴¹ Esis i fijus di Benjamin, konformi se familias. Kilis ku kontadu e seduba 45.600.

⁴² Fiju di Dan i seduba Suan, pape di familia di suanitas, konformi si familias.

⁴³ Tudu kilis di familias di suanitas ku kontadu e seduba 64.400.

⁴⁴ Fijus di Aser, konformi se familias, e seduba: Imna, pape di familia di imnaitas; Isvi, pape di isvitas, Berias, pape di familia di beriítas.

⁴⁵ Fijus di Berias e seduba Eber, pape di eberitas, ku Malkiel, pape di malkielitas.

⁴⁶ Nomi di fiju femia di Aser i seduba Sera.

⁴⁷ Esis i familias di fijus di Aser. Kilis ku kontadu e seduba 53.400.

⁴⁸ Fijus di Naftali, konformi se familias, e seduba: Jazeel, pape di familia di jazeelitas; Guni, pape di gunitas;

⁴⁹ Jezer, pape di jezeritas; Silen, pape di silenitas.

⁵⁰ Esis i jorson di Naftali, konformi se familias. Kilis ku kontadu e seduba 45.400.

⁵¹ Kilis di fijus di Israel ku kontadu e seduba 601.730.

Lei aserka di rapati tera

⁵² SIÑOR fala Moisés:

⁵³ “Tera na rapatidu pa yardansa konformi numeru di nomis.

⁵⁴ Bu na da yardansa mas garandi pa kilis ku ciu; kilis ku puku, bu na da elis yardansa mas puku. Kada jorson na dadu si yardansa konformi numeru delis ku sta na lista.

⁵⁵ Bu na juga sorti pa rapati tera, konformi nomis di papes di jorsons.

⁵⁶ Asin pa sorti tera na rapatidu pa yardansa konformi numeru di jinti na kada jorson.”

Levitas ku kontadu

⁵⁷ Esis e sedu levitas ku kontadu konformi se familias: Jerson, pape di familia di jersonitas; Koat, pape di koatitas; Merari, pape di meraritas.

⁵⁸ Familias di Levi e sedu libnitas, ebronitas, malitas, musitas ku koraitas. Koat padi Anran.

⁵⁹ Nomi di minjer di Anran i sedu Jokebed, fiju femia ku padidu na Ejitu na jorson di Levi. Elis e padi Aron ku Moisés ku se irma Mirian.

⁶⁰ Aron padi Nadab, Abiu, Eleazar ku Itamar,

⁶¹ ma Nadab ku Abiu e muri oca ke leba fugu dianti di SIÑOR, ku ka staba konformi lei.

⁶² Tudu macu di idadi di un mis pa riba ku kontadu e seduba 23.000. Elis e ka kontaduba juntu ku utru israelitas pabia e ka na dadu yardansa na Israel.

⁶³ Esis e seduba kilis ku Moisés ku saserdoti Eleazar konta oca ke fasi resensiamentu di fijus di Israel na bulaña di Moab lungu di riu Jordon di Jerikó.

⁶⁴ Nin un delis ka staba na konta oca ku Moisés ku saserdoti Aron fasi resensiamentu di fijus di Israel na lala di Sinai,

⁶⁵ pabia SIÑOR falaba aserka di kilis ku matiba na Sinai kuma e ten ku muri na lala. Asin nin un delis ka fika, si i ka sedu Kaleb, fiju di Jefoné, ku Josué, fiju di Nun.