Numerus 25 - BIBLIA - traduson antigu in Krioulo

Israelitas peka ku minjeris di Moab

¹ Oca ku Israel sinta na Sitin, omis kumsa na ten relason seksual ku minjeris moabita.

² Ki minjeris kumbida elis pa sirmonias di se deusis. E kume, e mpina pa ki deusis.

³ Asin Israel junta ku jinti di Moab pa adora Baal-Peor. SIÑOR paña raiba kontra Israel,

⁴ i fala Moisés: “Toma tudu garandis di pobu, bu nforka elis di dia dianti di SIÑOR, pa raiba di SIÑOR para yardi kontra Israel.”

⁵ Moisés fala juisis di Israel: “Kada un di bos i na mata si omis ku junta pa bai adora Baal-Peor.”

⁶ Na ki ora un omi di Israel bin tisi un minjer midianita pa si parentis, na uju di Moisés ku tudu juntamentu di fijus di Israel, oca ke na coraba dianti di tenda di juntamentu.

⁷ Oca Fineias, fiju di Eleazar, fiju di saserdoti Aron, oja ki kusa, i lanta na metadi di juntamentu, i toma kañaku,

⁸ i bai tras di ki omi di Israel dentru di tenda, i ntranka omi tudu ku minjer ku kañaku na bariga. Asin praga ku atakaba Israel i para.

⁹ Kilis ku muriba na ki praga e seduba 24.000.

¹⁰ SIÑOR fala Moisés:

¹¹ “Fineias, fiju di Eleazar, fiju di saserdoti Aron, i disvia ña raiba ku staba riba di fijus di Israel, pabia el, na se metadi, i mostra mesmu siumi ku ami N sintiba. E ku manda N ka kaba ku fijus di Israel na ña siumi.

¹² Asin bu pudi kontal kuma N na dal ña kontratu di pas.

¹³ El ku si jorson e na tene ña kontratu di sedu saserdotis pa sempri, pabia i tenba siumi pa si Deus, i ranja purdon pa pekadu di fijus di Israel.”

¹⁴ Nomi di ki israelita ku matadu juntu ku minjer di Midian i sedu Zinri, fiju di Salu, ŝef di un familia simeonita.

¹⁵ Nomi di minjer midianita ku matadu i sedu Kozbi, fiju di Zur, ŝef di un grupu di familias midianita.

¹⁶ SIÑOR fala Moisés:

¹⁷ “Bo kastiga midianitas, bo mata elis,

¹⁸ pabia e kastiga bos ku ki nganu ke ngana bos na Peor, tambi pabia di se irma Kozbi, fiju di ŝef di midianitas, ku matadu na dia di praga ku bin pabia di Peor.”