Numerus 21 - BIBLIA - traduson antigu in Krioulo

Israelitas ngaña kananeus

¹ Oca ku ki kananeu, rei di Arad, ku mora na banda di sul, i obi kuma Israel na bin na kamiñu di spions, i bai geria kontra elis, i prindi utrus.

² Israelitas fasi un votu pa SIÑOR e fala: “Si bu ntreganu e pobu na mon, no na kaba ku se prasas.”

³ SIÑOR obi pididu di Israel, i ntrega elis ki kananeus; elis tudu ku se prasas e danadu fep. Asin nomi di ki lugar i comadu Orma.

Kobra ku kumpudu ku metal

⁴ E sai di monti di Or pa kamiñu di Mar Burmeju, pa pudi da volta di tera di Edon, ma pobu pirdi pasensa na kamiñu.

⁵ E fala kontra Deus, tambi kontra Moisés, e punta: “Ke ku manda bu tiranu di Ejitu, pa no bin muri ne lala? Li i ka ten kumida nin yagu; no nfastia ja e koldadi kumida ku ka sabi nada!”

⁶ SIÑOR manda kobras venenosu na metadi di pobu; e murdi elis. Manga di fiju di Israel muri pabia di ki murdidura.

⁷ Pobu bai pa Moisés, e falal: “No peka, manera ku no papia kontra SIÑOR, tambi kontra bo. Ora, pa SIÑOR pudi tiranu e kobras.” Asin Moisés ora pa pobu.

⁸ SIÑOR fala Moisés: “Kumpu un kobra di metal, bu pul na un po altu. Tudu kil ku murdidu pa ki kobra venenosu, si i yalsa uju pa kil ku pudu na po, i ka na muri.”

⁹ Asin Moisés kumpu un kobra, i pul riba di un po altu. Si kobra murdi algin, si i jubi pa ki kobra di metal, i ta kapli di mortu.

Bias di israelitas

¹⁰ Fijus di Israel pega kamiñu, e bai kampa na Obot.

¹¹ E sai di Obot, e bai kampa na montisiñus di Abarin, na lala dianti di tera di Moab, na saida di sol.

¹² Di la e bai kampa pertu di riusiñu di Zered.

¹³ E sai di la, e bai kampa na banda di riu Arnon, ku sta na lala ku ta bai te na frontera di amoreus, pabia Arnon i frontera na metadi di Moab ku amoreus.

¹⁴ E ku manda i fala na libru di geras di SIÑOR: “N dadu Sufa ku riusiñu di Arnon,

¹⁵ te na riada di riusiñus ku ta bai te na tabanka di Ar, e pasa lungu di frontera di Moab.”

¹⁶ Di la e bai pa Beer, ku sedu ki fonti nunde ku SIÑOR fala Moisés: “Junta pobu, N ta da elis yagu.”

¹⁷ Na ki tempu Israel kanta e kantiga: “Yagu di fonti, subi bu inci! Abos, bo kanta aserka del!

¹⁸ Abo, fonti ku ŝefis koba, ku garandis di pobu yabri ku bingalas di renansa ku se mandukus.” E sai di ki lala, e bai pa Matana.

¹⁹ Di Matana e pasa pa Naaliel, dipus pa Bamot.

²⁰ Di Bamot e bai pa kobon na tera di Moab, pertu di monti di Pisga. Si algin sta na ponta mas altu di monti i pudi oja pa lala.

Sion ku Og ngañadu

²¹ Israel manda jinti pa Sion, rei di amoreus, ku e rekadu:

²² “Disanu pasa na bu tera; no ka na panti na lugaris labradu nin na ortas di uva; no ka na bibi yagu di nin un fonti, ma no na yanda son na strada prinsipal tok no kaba pasa na bu tera.”

²³ Ma Sion ka disa Israel pasa na si tera. I junta tudu si tropas, i sai pa da kontrada ku Israel na lala. I bin pa Jaaz, i geria ku Israel,

²⁴ ma Israel mata elis ku spada, e toma konta di se tera desdi Arnon te na Jabok, te na tera di Amon, pabia frontera di fijus di Amon staba fortifikadu.

²⁵ Asin israelitas toma tudu ki prasas di amoreus, e mora nelis, suma tambi na Esbon ku tudu si tabankas.

²⁶ Esbon i seduba prasa di Sion, rei di amoreus, ku geriaba kontra antigu rei di Moab, i tomal tudu si tera te na riu Arnon.

²⁷ E ku manda poetas ta fala: “Bo bin pa Esbon, prasa di Sion; pa i kumpudu, i fortifikadu.

²⁸ “Tropas sai di Esbon suma fugu, e sai di prasa di Sion suma ŝama, e kaba ku Ar di moabitas, ku moraduris di kaus altu di Arnon.

²⁹ Ai di bo, Moab! Bo sta pirdidu, abos ku ta adora Kemós! I da si fijus macu pa ba ta kurkuri, i da tambi si fijus femia suma katibus di Sion, rei di amoreus.

³⁰ “Ma anos no ngaña elis. Esbon i kabadu ku el te na Dibon. No kaba ku elis te na Nofá ku ta bai te na Medeba.”

³¹ Asin Israel bai mora na tera di amoreus.

³² Dipus di Moisés manda spions pa prasa di Jazer, israelitas toma si tabankas, e tira amoreus ku staba la.

³³ Dipus e rabida, e pega kamiñu pa Basan. Og, rei di Basan, ku tudu si tropas, sai kontra elis pa geria na Edrei.

³⁴ SIÑOR fala Moisés: “Ka bu ten medu del, pabia N ntregal na bu mon, ku tudu si jinti, ku si tera. Fasil suma ku bu fasi Sion, rei di amoreus, ku moraba na Esbon.”

³⁵ Asin e mata Og ku si fijus, ku tudu si jinti; nin un son ka kapli. E toma si tera tudu.