Numerus 20 - BIBLIA - traduson antigu in Krioulo

Mortu di Mirian

¹ Na purmeru mis, tudu kumunidadi di fijus di Israel ciga na lala di Zin, e bai fika na Kades. Mirian muri la, i nteradu la tambi.

Yagu sai na pedra

² I ka tenba yagu pa kumunidadi. Jinti junta kontra Moisés ku Aron,

³ e jusia ku Moisés, e fala: “I bon ba pa no muri oca ku no ermons kai mortu dianti di SIÑOR!

⁴ Ke ku manda bo tisinu pa e lala, pa no bin muri li, anos ku no limarias?

⁵ Pa ke ku bo tisinu di Ejitu pa e kau ku ka bali, kau ku ka tene nin miju, nin figus, nin uvas, nin romans, nin yagu pa bibi?”

⁶ Moisés ku Aron e fika elis, e bai pa entrada di tenda di juntamentu, e kai ku rostu na con; gloria di SIÑOR parsi riba delis.

⁷ SIÑOR fala Moisés:

⁸ “Toma manduku, bu junta pobu; abo ku bu ermon Aron bo papia ku pedra dianti di se uju; i na da si yagu. Asin bu na tira yagu na ki pedra, pa bu da pobu pa e bibi, ku se limarias.”

⁹ Moisés toma ki manduku na tenda di SIÑOR, suma ki dadu ordi.

¹⁰ El ku Aron e junta pobu dianti di ki pedra, i fala elis: “Abos rebeldis, bo sukuta! Nta no na tira yagu ne pedra pa bos?”

¹¹ Moisés yalsa si mon, i suta ki pedra dus bias ku manduku; i sai manga di yagu. Pobu bibi, ku se limarias.

¹² SIÑOR fala Moisés ku Aron: “Manera ku bo ka fia na mi, pa bo mostra ña santidadi dianti di fijus di Israel, bo ka na leba elis pa tera ku N fala kuma N na da elis.”

¹³ Es i sedu yagu di Meribá nunde ku fijus di Israel jusia ku SIÑOR; el i mostra elis si santidadi.

Moisés pidi lisensa pa pasa na Edon

¹⁴ Oca elis na Kades, Moisés manda jinti pa rei di Edon pa e falal: “Asin ku bu ermon Israel fala: Bu sibi tudu kansera ku bin riba di nos.

¹⁵ No papes di antigu bai pa Ejitu; no mora la manga di tempu. Ejipsius maltratanu, anos ku no papes.

¹⁶ Oca no coma SIÑOR, el i obi no fála, i manda un anju, i tiranu di Ejitu. Ali no sta na prasa di Kades, na frontera di bu tera.

¹⁷ Disanu pa no pasa na bu tera. No ka na pasa na nin un lugar ku ta labradu, nin na ortas di uva; no ka na bibi yagu di nin un fonti. No na yanda son na strada prinsipal; no ka na disvia pa direita nin pa skerda, tok no kaba pasa na bu con.”

¹⁸ Ma Edon ruspundi i falal: “Ka bu pasa na ña tera, pa N ka bin sai kontra bo ku spada.”

¹⁹ Fijus di Israel falal: “No na pasa son na strada prinsipal. Si anos o no limarias bibi bu yagu, no na pagau. Disanu son pa no pasa ku pe.”

²⁰ Ma Edon fala: “Bu ka na pasa.” I sai ku forsa pa da elis kontrada ku manga di tropa.

²¹ Suma ku Edon nega disa elis pasa na si tera, israelitas disinvita, e bai utru kamiñu.

Mortu di Aron

²² Tudu kumunidadi di fijus di Israel sai di Kades, e bai pa monti di Or.

²³ La na monti, na frontera di Edon, SIÑOR papia ku Moisés ku Aron, i fala elis:

²⁴ “Aron na muri; i ka na yentra na tera ku N fala N na da fijus di Israel, suma ku abos dus bo ka obdisi ña palabra na yagu di Meribá.

²⁵ Toma Aron ku si fiju Eleazar, bu subi ku elis na monti di Or.

²⁶ Dispi Aron ki ropa di saserdoti, bu bisti si fiju Eleazar, pabia Aron na muri la.”

²⁷ Moisés fasi manera ku SIÑOR falal. E subi na monti di Or na uju di tudu pobu.

²⁸ Moisés tira Aron ki ropa, i bisti si fiju Eleazar. Aron muri la riba di monti; Moisés ku Eleazar e ria di la.

²⁹ Oca ku tudu pobu di Israel sibi kuma Aron muri, elis tudu e coral trinta dia.