Numerus 19 - BIBLIA - traduson antigu in Krioulo

Yagu di purifikason

¹ SIÑOR fala Moisés ku Aron:

² “Es i regra di lei ku SIÑOR manda: Konta fijus di Israel pa e tisiu un fiju femia di baka burmeju, ku ka tene nin difeitu nin manca, ku ka pudu na tarbaju.

³ Bo ntrega saserdoti Eleazar el pa i lebal fora di kampamentu, pa i dogoladu si dianti.

⁴ Saserdoti Eleazar na toma utru di ki sangi na dedu, i na wagal seti bias, viradu pa ladu di dianti di tenda di juntamentu.

⁵ Ki baka na kemadu si dianti, ku si kuru, karni, sangi ku tudu kusas di dentru.

⁶ Saserdoti na toma po di sedru, ku isopi ku lan burmeju, i na bota elis dentru di ki fugu.

⁷ Dipus i na laba si ropa; tambi i na laba kurpu. Asin i pudi yentra na kampamentu, ma i na fika impuru te di tardi.

⁸ Ki omi tambi ku kema baka i na laba si ropa ku yagu, tudu ku si kurpu; i na fika impuru te di tardi.

⁹ “Un omi ku sta puru i na paña sinsa di baka, i na pul na un kau puru fora di kampamentu; i na guardadu pa kumunidadi di fijus di Israel pa pui na yagu di purifikason. Ki baka i sedu oferta pa pekadu.

¹⁰ Ki omi ku paña sinsa di baka i na laba si ropa, i fika impuru te di tardi. Es na sedu un lei pa sempri pa fijus di Israel ku stranjerus ku mora na se metadi.

¹¹ “Algin ku toka na kadaver di un difuntu i na fika impuru pa seti dia.

¹² I na purifika ku ki yagu di purifikason na terseru ku setimu dia; dipus i na sta puru, ma si i ka purifika ku ki yagu na terseru ku na setimu dia, i ka na fika puru.

¹³ Tudu algin ku toka na kadaver di un difuntu, i ka bin purifika, i na kontamina tabernakulu di SIÑOR. Ki algin na tiradu na Israel. I na fika impuru pabia yagu di purifikason ka wagadu riba del; si impuresa na fika riba del.

¹⁴ “Si algin muri na un tenda, es i lei: Tudu algin ku yentra na ki tenda, ku kin ku sta la, i na fika impuru pa seti dia.

¹⁵ Tudu puti o tiẑela ku ka tapadu diritu na sta impuru.

¹⁶ “Si algin la fora toka na algin ku matadu ku spada, o ku muri mortu natural, o i toka na os di un difuntu, o na kau di nteru, i na fika impuru pa seti dia.

¹⁷ “Pa ki impuresa i na tomadu sinsa di ki baka ku kemadu pa tira pekadu, i na juntadu ku yagu na un jaru.

¹⁸ Un omi ku sta puru na toma un ramu di isopi, i mojal na yagu, i waga na ki tenda, riba di mobilia, ku tudu jinti ku mati, ku kil ku toka na os, ku kil ku toka na un algin ku matadu o ku muri, o ku toka na kau di nteru.

¹⁹ Na terseru ku setimu dia, ki algin ku sta puru i na waga ki yagu riba di kil ku sta impuru; na setimu dia i na purifikal. Dipus ki omi na laba si ropa ku si kurpu ku yagu; di tardi i na sta puru.

²⁰ Si ki algin impuru ka purifika, i na tiradu na kumunidadi, pabia i kontamina santuariu di SIÑOR. Yagu di purifikason ka wagadu riba del; i na fika impuru.

²¹ Es i lei pa sempri pa elis. Ki algin ku waga yagu di purifikason i na laba si ropa. Kil ku toka na ki yagu di purifikason i na fika impuru te di tardi.

²² Kualker kusa ku algin impuru toka nel, ki kusa na torna impuru tambi. Algin ku toka na ki kusa i na fika impuru te di tardi.”