Numerus 17 - BIBLIA - traduson antigu in Krioulo

Manduku di Aron flora

¹ SIÑOR fala Moisés:

² “Papia ku fijus di Israel pa e dau dozi manduku, un pa kada ŝef di jorson. Bu ta skirbi nomi di kada ŝef na si manduku.

³ Na manduku di Levi skirbi nomi di Aron. Kada ŝef di jorson na tene un manduku.

⁴ Pui ki mandukus na tenda di juntamentu dianti di arka di kontratu nunde ku N ta kontra ku bos.

⁵ Manduku di omi ku N kuji i na flora. Asin N ta kaba ku e ŋuniŋuni di fijus di Israel kontra mi ku bos.”

⁶ Asin Moisés fala ku fijus di Israel, i toma ki dozi manduku, suma ku kada ŝef di jorson tisi un son. Manduku di Aron i seduba un di ki dozi.

⁷ Moisés pui ki mandukus dianti di SIÑOR na tenda di tustumuñu.

⁸ Mansi di ki dia, Moisés yentra na tenda di tustumuñu, i oja manduku di Aron, ku na representa jorson di Levi, i rebentaba ja tok i flora, i padi fiju di amenduiña.

⁹ Moisés tira ki mandukus dianti di SIÑOR, i leba elis pa tudu fijus di Israel. E oja ki kusa; kada kin toma si manduku.

¹⁰ SIÑOR fala Moisés: “Torna manduku di Aron dianti di arka di kontratu, pa i guardadu suma sinal pa rebeldis. Asin N na kaba ku se ŋuniŋuni kontra mi, pa e ka muri.”

¹¹ Moisés fasi manera ku SIÑOR mandal pa i fasi.

¹² Israelitas fala Moisés: “Ali no na muri! No na pirdi! No na pirdi tudu!

¹³ Tudu algin ku ciga pertu di tenda di SIÑOR i na muri. Nta no na kaba tudu!”