Numerus 10 - BIBLIA - traduson antigu in Krioulo

Dus korneta di prata

¹ SIÑOR fala Moisés:

² “Fasi dus korneta di prata batidu ku na sedu pa coma jinti pa juntamentu o pa konta elis di saida.

³ Ora ke toka elis tudu dus, tudu jinti na junta bu dianti na porta di tenda di juntamentu,

⁴ ma si i un ku tokadu, ŝefis ku sedu kabesas di familias di Israel e na junta bu dianti.

⁵ Si bo tokal di kumpridu, jinti ku kampa na saida di sol e na lanta pa pega kamiñu pa bai.

⁶ Ora ku bo tokal sugundu bias di kumpridu, jinti ku kampa na sul e na lanta pa pega kamiñu pa bai. E na ba ta toka sempri di kumpridu pa jinti ba ta bai.

⁷ Pa pudi junta jinti bo na toka elis, ma i ka di kumpridu.

⁸ “Fijus di Aron, ku sedu saserdotis, elis ku na toka korneta; es i na sedu un lei pa bos ku bo jorson pa sempri.

⁹ Ora ku inimigu ataka bos na bo tera, bo na sai pa bai geria ku el, bo na toka kornetas di kumpridu; asin SIÑOR bo Deus na lembra di bos, i na kaplinti bos di bo inimigus.

¹⁰ Tambi na dia di bo kontentamentu, suma tambi na bo festivalis markadu, o na lua nobu, bo na toka kornetas riba di bo ofertas kemadu ku ofertas di pas. E na pui bo Deus pa i lembra di bos. Ami i SIÑOR bo Deus.”

Israelitas sai di Sinai

¹¹ Na dia 20 di sugundu mis di sugundu anu, nuven ku staba riba di tenda di juntamentu i lanta.

¹² Fijus di Israel sai na lala di Sinai, e pega kamiñu pa lala di Paran nunde ku nuven bai para nel.

¹³ Asin ke pega ki purmeru kamiñu konformi ordi ku SIÑOR da Moisés.

¹⁴ Tropas di kampamentu di Judá bai purmeru, ku se bandera. Se ŝef i Naason, fiju di Aminadab.

¹⁵ Ŝef di tropas di jorson di Isakar i Netanel, fiju di Zuar.

¹⁶ Eliab, fiju di Elon, i sedu ŝef di tropas di jorson di Zebulon.

¹⁷ Tenda dismontadu; fijus di Jerson ku fijus di Merari e lambul e leba.

¹⁸ Dipus tropas di kampamentu di Ruben e bai, ku se bandera. Se ŝef i Elizur, fiju di Sedeur.

¹⁹ Ŝef di tropas di jorson di Simeon i Selumiel, fiju di Zurisadai.

²⁰ Ŝef di tropas di jorson di Gad i Eliasaf, fiju di Deuel.

²¹ Dipus koatitas bai e lambu kusas di kau sagradu, e leba. Antis de ciga, kilis ku lebaba tenda e ta montalba ja.

²² Dipus tropas di kampamentu di Efrain e bai, ku se bandera. Se ŝef i Elisama, fiju di Amijud.

²³ Ŝef di tropas di jorson di Manasés i Gamaliel, fiju di Pedazur.

²⁴ Ŝef di tropas di jorson di Benjamin i Abidan, fiju di Jideoni.

²⁵ Na kabantada, tropas di kampamentu di Dan e bai ku se bandera suma guarda di tras. Se ŝef i Aiezer, fiju di Amisadai.

²⁶ Ŝef di tropas di jorson di Aser i Pajiel, fiju di Okran.

²⁷ Ŝef di tropas di jorson di Naftali i Aira, fiju di Enan.

²⁸ Es i ordi di marŝa di tropas di fijus di Israel oca ke na sai.

Moisés pidi Obab pa i bai ku elis

²⁹ Moisés fala Obab, si kuñadu, fiju di Reuel, ki midianita: “No na sai pa bai pa ki lugar ku SIÑOR fala i na danu. Bin ku nos; no na tratau diritu, pabia SIÑOR fala i na da bon kusas pa Israel.”

³⁰ Obab falal: “N ka na bai. N na riba pa ña tera ku ña parentis.”

³¹ Moisés falal: “Ten pasensa, ka bu disanu, pabia bu sibi nunde ku no pudi bai mora nel na lala. Bu ta sedu no ujus.

³² Si bu bai ku nos, tudu benson ku SIÑOR danu no na rapatil ku bo.”

³³ Asin e sai di monti di SIÑOR, e yanda tris dia. Tudu ki tempu arka di kontratu di SIÑOR staba se dianti pa buska elis lugar di diskansu.

³⁴ Nuven di SIÑOR ta staba riba delis di dia ora ke sai di kampamentu.

³⁵ Si arka na sai, Moisés ta fala: “SIÑOR, lanta! Pajiga bu inimigus, bu pui kilis ku ka gosta di bo pa e kuri bu dianti.”

³⁶ Si arka finkandadu, Moisés ta fala: “SIÑOR, riba pa e manga di milyaris di Israel.”