Neemias 6 - BIBLIA - traduson antigu in Krioulo

Inimigus misti tuji tarbaju

¹ Oca ku Sambalat, Tobias, ku ki arabi Jesen, ku restu di no inimigus, obi kuma N kumpu ja mura, N tapa burakus tudu, kontudu N ka puiba inda portas na portons,

² Sambalat ku Jesen manda falan pa N bai junta ku elis pa no fasi runion na un di tabankas na kobon di Onu, ma es i seduba planu pa fasin mal.

³ N manda jinti pa e fala elis: “N na fasi tarbaju importanti, di manera ku N ka pudi bai. Kuma ku N na disa e tarbaju para pa N bai kudi bos?”

⁴ E mandan mesmu rekadu kuatru bias; kada bias N ta ruspundi elis na mesmu manera.

⁵ Kintu bias Sambalat manda mesmu rekadu, ma si rapas bin ku karta abertu na si mon,

⁶ ku fala asin: “I faladu na metadi di nasons, Jesen tambi fala, kuma abo ku judeus bo misti lanta kontra rei; e ku manda bu na kumpu mura. Konformi e palabra ku no obi, abo propi bu na sedu se rei;

⁷ bu ranja anunsiaduris pa e ba ta fala na Jerusalen kuma abo i rei di Judá. E palabra na ciga nunde rei. Minjor bu bin pa no papia ne asuntu.”

⁸ N manda falal: “Tudu ku bu na fala i ka bardadi, ma i abo ku pensa e kusa na bu kabesa.”

⁹ Elis tudu e mistiba mitin medu, e na falaba: “Se mons na larga ki obra; i ka na kabantadu.” Ma N ora asin: “O Deus, fortifika ña mon.”

¹⁰ Un dia N bai pa kasa di Semaias, fiju di Delaias, fiju di Meetabel, pabia i ka pudiba bin pa mi. I falan: “No bai anos dus pa kasa di Deus, no yentra na kau sagradu, no fica portas, pabia e na bin matau; kualker noti e na bin pa matau.”

¹¹ N puntal: “Un omi suma mi dibi di kuri? O algin suma mi pudi yentra na kau sagradu, i fika ku vida? N ka na yentra la.”

¹² Dipus N bin ntindi kuma i ka Deus ku dal ki palabra, ma i fasi ki anunsiu kontra mi. Tobias ku Sambalat pagalba

¹³ pa i mitin medu pa N fasi ki kusa, N peka, pa e pudi dana ña nomi, e fala mal di mi.

¹⁴ N ora N fala: “Ña Deus, lembra di Tobias ku Sambalat pabia de kusas ke fasi, suma tambi ki minjer anunsiadur Noadias, ku ki utru anunsiaduris ku misti mitin medu.”

Tarbaju kompletadu

¹⁵ Dipus di sinkuenta i dus dia di tarbaju, mura kaba na dia 25 di mis di Elul.

¹⁶ Oca ku tudu no inimigus na tudu nasons na roda obil, e panta, e pirdi fiansa na se propi forsa, pabia e nota kuma e tarbaju fasidu ku ajuda di no Deus.

¹⁷ Na ki tempu utru garandis di Judá e ta skirbiba manga di karta pa Tobias; Tobias tambi i ta skirbiba pa elis,

¹⁸ pabia manga di jinti di Judá staba ligadu ku Tobias pa juramentu, suma ki kasa fiju di Sekanias, fiju di Ará; tambi si fiju Joanan kasaba ku fiju femia di Mesulan, fiju di Berekias.

¹⁹ E fika e na papia ña dianti di bon kusas ku Tobias fasi; e ta bai kontal kusas ku N fala. Tobias tambi ta skirbi kartas pa mitin medu.