Neemias 4 - BIBLIA - traduson antigu in Krioulo

Inimigus misti tuji tarbaju

¹ Oca ku Sambalat obi kuma no na kumpu mura, i paña raiba dimas, i kumsa na fasi trosa di judeus,

² i punta dianti di si kumpañeris ku tropas di Samaria: “Ke ku ki judeus fraku na fasi? Nta e na kumpu kau me? E na ngoda Deus ku sakrifisiu pa e pudi kaba tudu na un dia son? E na torna tira pedras ku bali na ki monton di reia tudu kemadu?”

³ Ki amonita Tobias staba ku el, i fala: “Nin ke kumpu mura di pedra, si kacur bai la, i na batil kinti kinti!”

⁴ “A no Deus! Obi kuma ku no na njutidu. Pui se trosa pa i kai riba di se kabesa, pa e pañadu na gera, e lebadu pa katiberasku na utru tera.

⁵ Ka bu kubri se kulpa, nin ka bu riska se pekadu bu dianti, pabia e koba jinti ku na tarbaja.”

⁶ Asin no bai dianti, no kumpu mura tok i ciga na metadi di si altura tudu na roda, pabia korson di pobu staba pruntu pa tarbaja.

⁷ Oca ku Sambalat ku Tobias, ku jinti di Arabia, Amon ku Asdod, obi kuma tarbaju di kumpu mura di Jerusalen na bai dianti, kuma burakus na tapaduba ja, e paña raiba ciu.

⁸ E ruma entri elis tudu pa bin geria kontra Jerusalen, pa pudi para ki tarbaju,

⁹ ma no ora no Deus, no pui guarda kontra elis di dia ku di noti.

¹⁰ Jinti di Judá fala: “Forsa di kargaduris kaba ja. Reia ciu dimas; no ka na bin pudi kumpu mura.”

¹¹ Tambi no inimigus fala: “E ka na sibi nada, nin e ka na nota, tok no yentra na se metadi, no mata elis. Asin no ta kaba ku ki tarbaju.”

¹² Judeus ku moraba na se metadi e bin avisanu des bias kuma inimigus na sai na tudu lugar pa bin atakanu.

¹³ Asin N pui guardas tras di mura nunde ki staba mas bas, mas abertu pa ataki. N pui jinti familia, familia, ku se spadas, kañakus ku mansasas.

¹⁴ N jubi kuma ku jinti staba, N lanta N fala garandis ku ŝefis ku restu di jinti: “Ka bo ten medu delis; bo lembra di SIÑOR, garandi, ku jinti dibi di medi; bo geria pa bo ermons, bo fijus, bo minjeris ku bo kasas.”

¹⁵ Oca ku no inimigus obi kuma no sibi ja ke ku ten, kuma Deus pajiga se planus, anos tudu no riba pa mura, kada kin pa si tarbaju.

¹⁶ Disna di ki dia, metadi di ña rapasis na tarbaja, ki utru metadi teneba kañakus, tajaderas, mansasas ku kasakus di metal. Ŝefis toma se lugar tras di tudu pobu di Judá

¹⁷ ku na kumpu mura. Kargaduris na tarbaja ku un mon, e pega feramentus di gera ku utru.

¹⁸ Kilis ku na kumpu mura, kada kin maraba si spada na rabada oca ki na tarbaja. Tokadur di korneta staba lungu di mi.

¹⁹ N fala garandis, ku ŝefis, ku restu di jinti: “No sta lunju di ŋutru; no spaja ciu ne tarbaju garandi.

²⁰ Na kau ku bo sta, si bo obi toku di korneta, bo ta bin junta ku nos la. No Deus na geria pa nos.”

²¹ Asin ku no pega na tarbaju; metadi delis e teneba kañakus disna ku sol mansi tok strelas na sai.

²² Na ki tempu tambi N fala jinti: “Kada kin ku si rapas pa e fika na Jerusalen pa e sedu suma guarda di noti, pa e pega tarbaju di dia.”

²³ Nin ami, nin ña ermons, nin ña rapasis, nin ña guardas, no ka tira ropa. Kada kin pega na si material di gera, nin si i na bai laba.