Neemias 3 - BIBLIA - traduson antigu in Krioulo

Kumpuduris di mura

¹ Ŝef di saserdoti Eliasib ku si ermons saserdotis e lanta e kumpu porton di karnel, e pui si portas na lugar. E kontinua kumpu te na tori di Meá ku tori di Ananeel; e dedika kila tudu.

² Lungu di Eliasib omis di Jerikó kumpu se parti. Dipus Zakur, fiju di Inri, kumpu si parti.

³ Fijus di Asená kumpu porton di pis, e maderial, e pui si portas, tudu ku ficaduras ku trinkus.

⁴ Lungu delis Meremot, fiju di Urias, fiju di Koz, kumpu si parti. Mesulan, fiju di Berekias, fiju di Mesezabel, i kumpu lungu del. Dipus Zadok, fiju di Baaná, kumpu si parti.

⁵ Lungu del omis di Tekoa kumpu se parti, ma se garandis nega fasi tarbaju ku se ŝef da elis.

⁶ Jeoiada, fiju di Paseia, ku Mesulan, fiju di Besodeias, e kumpu porton beju, e maderial, e pui si portas, tudu ku ficaduras ku trinkus.

⁷ Lungu delis Melatias di Jibeon ku Jadon di Meronot, tudu ku omis di Jibeon ku Mizpá, e kumpu se parti te na palasiu di gubernadur di Trans-Eufrates.

⁸ Dipus Uziel, fiju di Araias, un di urivis, i kumpu si parti. Lungu del Ananias, fiju di un kumpudur di purfumu, i kumpu di sil; e fortifika Jerusalen te na mura largu.

⁹ Dipus Refaias, fiju di Ur, ŝef di metadi di Jerusalen, i kumpu si parti.

¹⁰ Lungu del Jedaias, fiju di Arumaf, kumpu dianti di si kasa. Dipus Atus, fiju di Asabneias, kumpu si parti.

¹¹ Malkias, fiju di Arin, ku Asub, fiju di Paat-Moab, e kumpu utru parti, ku tori di furnus.

¹² Lungu delis Salun, fiju di Aloés, ŝef di utru metadi di Jerusalen, i kumpu si parti; si fijus femia judal.

¹³ Anun ku moraduris di Zanoa kumpu porton di kobon, e pui si portas ku ficaduras ku trinkus; e kumpu tambi 450 metru di mura te na porton di muntudu.

¹⁴ Malkias, fiju di Rekab, ŝef di bairu di Bet-Akeren, i kumpu porton di muntudu, i pui portas na se lugar, tudu ku ficaduras ku trinkus.

¹⁵ Salun, fiju di Kol-Ozi, ŝef di bairu di Mizpá, i kumpu porton di fonti, i pui kankra riba del, i pui portas ku ficaduras ku trinkus na se lugar. Tambi i kumpu mura di pisina di Sela, lungu di jardin di rei, te na skada ku ta ria di prasa di Davi.

¹⁶ Dipus Neemias, fiju di Azbuk, ŝef di metadi di bairu di Bet-Zur, i kumpu te dianti di koba di Davi, te na pisina ku jinti kumpu, ku kasa di guardas.

¹⁷ Lungu del levitas kumpu, bas di Reun, fiju di Bani. Asabias, ŝef di metadi di Keila, i kumpu si parti na si bairu.

¹⁸ Dipus, si ermons kumpu se parti, bas di Bavai, fiju di Enadad, ŝef di utru metadi di Keila.

¹⁹ Lungu del Ezer, fiju di Jesua, ŝef di Mizpá, kumpu utru parti dianti di subida pa kasa di feramentus di gera, te na skina.

²⁰ Dipus Baruk, fiju di Zabai, tarbaja ku tudu korson, i kumpu utru parti, desdi skina te na porta di kasa di Eliasib, ŝef di saserdotis.

²¹ Lungu del Meremot, fiju di Urias, fiju di Koz, kumpu un sugundu parti, desdi porta di kasa di Eliasib te na si kabantada.

²² Dipus saserdotis ku moraba na roda di Jerusalen fasi se parti.

²³ Benjamin ku Asub kumpu dianti di se kasa; dipus Azarias, fiju di Maaseias, fiju di Ananias, kumpu pertu di si kasa.

²⁴ Lungu del Binui, fiju di Enadad, kumpu si parti, desdi kasa di Azarias te na skina ku kantu.

²⁵ Palal, fiju di Uzai, kumpu dianti di skina, ku dianti di ki tori ku ta sai na ki kasa di rei mas pa riba, lungu di kintal di kalabus. Dipus del Pedaias, fiju di Parós, kumpu si parti.

²⁶ Serventis di templu ku moraba na Ofel e kumpu te dianti di porton di yagu, pa ladu di saida di sol, te na tori altu.

²⁷ Dipus omis di Tekoa kumpu sugundu parti, dianti di ki tori kumpridu ku ta sai, te na mura di Ofel.

²⁸ Utru saserdotis kumpu desdi porton di kabalus, kada kin dianti di si kasa.

²⁹ Lungu delis Zadok, fiju di Imer, kumpu dianti di si kasa. Dipus del Semaias, fiju di Sekanias, guarda di porton di saida di sol, kumpu di sil.

³⁰ Dipus Ananias, fiju di Selemias, ku Anun, sestu fiju di Zalaf, e kumpu se parti. Lungu delis Mesulan, fiju di Berekias, kumpu dianti di si kuartu.

³¹ Dipus del Malkias, fiju di un di urivis, kumpu te na kasa di serventis di templu ku di nogosiantis, dianti di porton di guarda te na kuartu di kantu.

³² Urivis ku nogosiantis kumpu se parti desdi kuartu di kantu te na porton di karnel.